3
Ngwaalu ngwuru ligor leꞌte pu
1 Yiru ange yanni yijayana, gïdïjï diru Dïyäwüd ya yiru ange yipana guꞌru ndi üꞌrïdänï? 2 Yonyadu yiꞌranu Ngwüyäwüd, ndi ari gwerre gwerre ꞌdar liru lanni lämnäcä je Ngwaalu ngwuje ätädä ngwujaꞌri ngwüngün.
3 Yiru ange manari loko ꞌdenggenanu lima ꞌti ätï ämnïng Ngwaalu? Ämnï Ngwaalu gwanni gwaꞌti aar ätï, gwa gäbïcï Ngwaalinga ngwa gwäꞌränï ngwäyänü ndi ärrï yiꞌral yanni yarung ye? 4 Bärï aꞌtur! A be manni Ngwaalu ru ngwanni ngwuru ꞌdidanu, a be dïjï danni dümnä ru danni diru diꞌduru. Anaku üllïnäär gu ndi ari,
“Nunnu a ngwüjï engga ndi ari nga gwuru Ngwaalu ꞌdidanu ma ang ondaji
a ma ang ngwe obalu, ang obaji.” 3.4 Mäjïmür 51.4
5 Manari dïjï dima ari ke gwege gwati manni inggidi reꞌdr ndi ari Ngwaalu ngwüdünälü, a ladi be araa? A ladi ari Ngwaalu ngwaꞌti dünälü güündä ge güngün ꞌdenggano? (Äny gwabingu ngwujaꞌri ngwudi dïjï dümnä.) 6 Bärï yaꞌti gu rüdï aꞌtur! Adinari aar gu ru, Ngwaalu gwaadi be obalu dïdlä de awa? 7 Dïjï dere da gu mene ondaji ndi ari, “Manari yiꞌduru yüny yati gendaci ꞌdidanung gwudi Ngwaalu no aar gendaci näjïng, a mene ange gwuru aar nyi gu be Ngwaalu ji na ndi obalu nono dïjü danni diki?” 8 Ange gwuru aar ꞌti aru anaku ma aar nje gu üꞌrïdädä yiꞌduru nono anaku araar gu ndi ari a lati ari, “Gäbïcär ar ärrï yiꞌral yanni yiki nunnu aar ji yanni yijaw?” Obalu gwädï gu ꞌdenggen.
Gwaꞌti gwanni gwüdünälü
9 A ladi be mïꞌrä ar ara? A lijayana lanni liru Ngwüyäwüde? Bärï aꞌtur! A lima geꞌte ndi ari Ngwüyäwüd na Garany ꞌdar gilo giyiima yidi yiꞌral yanni yiki. 10 Anaku üllïnäär gu ndi ari,
“Gwere gwaꞌti gwanni gwüdünälü, gwaꞌti ꞌdi gweꞌte pu
11 gwere gwaꞌti gwanni gwülïngïdï
gwere gwaꞌti gwanni gwubupa Ngwaalinga.
12 ꞌDar lima dudi,
ngindenga ꞌdar lima dudi guꞌru.
Gwere gwaꞌti gwanni gwati ape gwanni gwujaw,
gwaꞌti ꞌdi gweꞌte pu.”3.12 Mäjïmür 14.3; 53.1–3
13 “Ngwuullu ngwegen ngwuru nono ngwumomo ngwujalu mbüny,
ngwungla ngwegen ngwati ïꞌdäjänü.”3.13 Mäjïmür 5.9
“Yiiya yidi ngwüüngä giyo ngwünyü ngwegen.”3.13 Mäjïmür 140.3
14 “ꞌTäjï ngwünyü na ꞌre ngwünyü gwonyadu ngwulem ngwegen.”3.14 Mäjïmür 10.7
15 “Yora yegen yijalu ngwaany ndi ele ndi ꞌrinyidi.
16 Ngway ngwegen ngwani geradalu na anadalu.
17 Gay gidi adatalu gaꞌti aar lïngïdï.”3.17 Ajaya 59.7–8
18 “Denya gwere gwaꞌti aar ätï ngwäyänü ngwegen Ngwaalu.”3.18 Mäjïmür 36.1
19 Gweneno a lïlïngïdï ndi ari yanni yati ye yobo ondaji, yating ye ondaci ngwüjü ngwanni ngwätädäär je yobo, nunnu aaꞌti gwere gwätï ngwulem ndi ondaji na nunnu ngwüjï gïdïdlä ꞌdar a je Ngwaalu otacalu. 20 Yäy gu no, gwere gwaꞌti gwa aar gwe ari gwüdünälü ngwäyänü Ngwaalu gwuji gwe yobo. Ndi ari yobo yiru yanni yati gäbïcï dïjü ngwïcïnänü giligoranu yiꞌral ye yanni yiki.
Dünälü ämnï gwe Ngwaalu
21 A be gweneno, dünälü gwanni gwïndï Ngwaalu, gwanni gwaꞌti ïndï gwuji gwe yobo, gwuma aar geꞌte gwuma linginni, gwanni gwondaja gwe yobo na ngwïjïr. 22 Dünälü nggwee gwïndï Ngwaalu, gwating ätädä ngwüjü ꞌdar ämnï gwe gwegen ndi Yicu Kirictu. Yaꞌti ätï uting ngwüjänü gwere 23 ndi ari ꞌdar lima mbüjïnï liki a lamiꞌratu ndi olati ndi näjï gwudi Ngwaalu. 24 A lima aar je dünïyälü ꞌtur yïmïꞌrü ye yüngün, Yicu Kirictu gwe gwanni gwüꞌrädäjälü. 25 Gwanni gwugeꞌta Ngwaalu ngwuru mïꞌrïnï nono gwudi jaꞌrima ämnï gwe gwani yïn yüngün. Nginde gwärrü yiꞌral giyee nunnu ngwinggidi dünïngälü gwüngün, ndi ari gwerre gwümätïjä ngwüjü liguri aar ärrï yiꞌral yanni yiki ngwe ꞌti übïdälü gwani ke gwegen. 26 Gwärrü yiꞌral giyee nunnu ngwinggidi dünïngälü gwüngün gaji ge nggee, nunnu ngwuru gwanni gwüdünälü a ngwuru gwanni gwati dünïyï ngwüjälü ngwanni ngwämnï ndi Yicu.
27 Giyo be ne yanni yadi ar je ïrïngïnï? Yima gätïnï mbüny. Yima gätïnï mbüny ange gwe? Nunnu gwuji gwe gwudi yobo? Bärï, aar be ru ämnï gwe Ngwaalu. 28 Ndi ari a lati ari dïjï dati aar dünïyälü ämnï gwe Ngwaalu yaꞌti yani gwuji gwe gwudi yobo. 29 Ngwaalu ngwuru Ngwaalu ngwudi Ngwüyäwüd jüco? Nginde gwäꞌtüdï ꞌto Ngwaalu ngwudi Garanye? Yäy gwuru Ngwaalu ngwudi Garany ꞌto. 30 Ndi ari anni ru Ngwaalu ngweꞌte pu ꞌdogo, ngwuru ngwanni ngwadi dünïyï ngwüjälü ngwanni ngwuru Ngwüyäwüd ämnï gwe Ngwaalu gwegen na ngwanni ngwuru Garany ämnï gwe Ngwaalu nggwee gweꞌte gweꞌte. 31 Alanga la be gatu yobo mbüny ämnï gwe gwege Ngwaalu nggwee? Bärï aꞌtur! Ar be manni mätädä yobalu.