1 Yäy gu no, anni ma aar nje dünïyälü ämnï gwe Ngwaalu, a lätï adatingalu Ngwaalinga le Deleny de dege dani Yicu Kirictu. 2 Nginde gwe gwanni gwuma ar gwe mbuji gay gadi ar ge änï gïyïmïꞌränü giyee yijar gu gwenene ämnï gwe Ngwaalu. Ar jayanu ndi geꞌtaji gwudi näjï gwudi Ngwaalu. 3 Yaꞌti gu rüdï no ꞌdogo, aar be ru ndi ari ar jayanu ꞌto giyiꞌrendeny yege, ndi ari a lïlïngïdï ndi ari yiꞌrendeny yati nje gäbïcï ar orꞌtemaji 4 na orꞌtemaji gwati nje gäbïcï ar jayi drü a jayi drü aar nje gäbïcï ar mbuji geꞌtajing 5 na geꞌtaji gwati nje ꞌti gäbïcä ndi gwäꞌränï ngwäyänü ndi ari Ngwaalu ngwuma ꞌdeja ämnïngälü gwüngün giyigoranu yege Lïgïꞌrïm le lanni Lijuꞌru lanni lima aar nje ätädä.

6 Anni ma ar amiꞌrati, a gaji ganni gimbutu ila a Kirictu ayi gwani ngwüjï ngwanni ngwuki drü. 7 Yojema ndi dïjï dudiyi ligoꞌro lüngün gwani dïjï danni dïdünälü. A gwani dïjï danni dijaw, dïjï deꞌte da gu mene ädïnï ndi ayi. 8 A be Ngwaalu ngwenggaci nje ämnïng gwüngün yiꞌral ye giyee a lijuna ndi ape gwanni gwuki, a Kirictu ayi gwani alanga.

9 Anni ma aar nje Ngwaalu dünïyälü yïn ye yüngün ya be ru ꞌtanaa ndi aar nje gïlängïdïyï küündä gidi Ngwaalu nginde gwe. 10 Ndi ari manari gwele gwerre, a liru güwän gidi Ngwaalu, gwuma ar le be oꞌrajidi yiꞌrany ye yidi Gïjï güngün, ya be ru ꞌtanaa, anni ma ar oꞌrajidi, ndi aar nje gïlängïdïyï midi gwe gwüngün. 11 Yaꞌti gu rüdï giyee ꞌdogo, a be yiru ndi ari, ar jayanu Ngwaalu Deleny de dege dani Yicu Kirictu gwanni gwuma ar gwe mbuji oꞌrajiding Ngwaalinga le gwenene.

12 Yiru giyee ndi ari ke gwändï gïdïdlä dïjï de deꞌte pu dani Adam, ke gwüngün ngwapa yiꞌrany, no yiꞌrany yima be badalu ngwüjänü ꞌdar ndi ari ngindenga ꞌdar liki. 13 Ndi ari ꞌtuꞌtu gwerre yobo yidi Müjä yaꞌtina ju, ke gwuju gïdïdlä. A be ke gwati aar ꞌti ïꞌräcä manari yobo yaꞌti. 14 A be yiꞌrany määtä ngwüjü ꞌtuꞌtu kaji gidi Adam ꞌdi aar ngwe obana kaji gidi Müjä, aar ädïnï ꞌto ngwüjï ngwaꞌti apu gwuki nono apa gu Adam. Adam gwuru dïꞌrïmbïl didi nginde gwani Kirictu gwanni gwadi ila gwodan. 15 A be nï gwudi angidaji gwudi Ngwaalu gwäꞌtüdï nono nï gwudi nyurtanu gwudi Adam. Ndi ari manari lonyadu layu gwani nyurtanu gwudi dïjï deꞌte pu, ya be ru ꞌtanaa yani yïmïꞌrü yidi Ngwaalu a angidaji gwanni gwïndï yïmïꞌrü ye yidi dïjï deꞌte pu dani Yicu Kirictu, ya ïrälü ngwüjï ngwonyadu. 16 A mana nï angidaji gwudi Ngwaalu gwäꞌtüdï nono nï gwudi ke gwudi dïjï deꞌte pu. Obalu gwugwujana kengalu gweꞌte pu gwuma obalu ngwüjï ngwe, a be angidaji gwugwuju kengalu gwonyadu gwudi ngwüjï, a gwuma apa dünïyïngälü. 17 Ndi ari manari nyurtanu gwudi dïjï deꞌte pu yiꞌrany yima ru ngwüjï dïjï de deꞌte pu, ya be ru ꞌtanaa ngwüjï ngwanni ngwadi ape yïmïꞌrä yidi Ngwaalu yanni yïrälü na angidaji gwudi dünälü aar ruyi ngwüjü ndi midi gwudi gwurꞌtaling ꞌto gïdïjï deꞌte pu dani Yicu Kirictu.

18 Anaku raar gu nyurtanu gwe gweꞌte pu, a obalu ji ngwüjï ꞌdar, no ꞌto ape gwe gweꞌte pu gwanni gwüdünälü gwudi Kirictu ngwuma geꞌte dünïyïngälü gwanni gwati äpïjä ngwüjü ꞌdar miding. 19 Anaku raar gu nyurtanu gwe gwudi dïjï deꞌte pu, gwuma gäbïcï ngwüjü ngwonyadu aar ke, no ꞌto ꞌdengenaji gwe gwudi dïjï deꞌte pu, lonyadu la aar je dünïyälü.

20 A be yobo ila nunnu a nyurtanu gendadi a ngwüjï engga. A be ngwaalu ngwadi gu nyurtanu gendani, a gu yïmïꞌrü gendani yonyadana, 21 nunnu anaku määtä gu ke ngwüjü aar ayi, no ꞌto yïmïꞌrü ya määtä ngwüjü dünälü gwe aar midi miding gwudi gwurꞌtaling Deleny de dege dani Yicu Kirictu.