1 A ladi be araa, ar gwuji keng nunnu ati aar nje gu yïmïꞌrü yidi Ngwaalu gendade? 2 Bärï aꞌtur! Ange gwuru ar be ru lanni layu giyiima yidi ke ar be oꞌre ar gu midi mana? 3 A mene ngaa laꞌti lïngïdï ndi ari alanga ꞌdar liminje nyïnyädä ndi Yicu Kirictu a lima acajidi giyiꞌrany yüngüne? 4 No, a lima gätïnï Yicunga le nyïnyïnï gwe gwani yiꞌrany nunnu anaku ma gu Kirictu ꞌdïꞌrä giyiꞌranyanu näjï gwe gwudi Papa, alanga ꞌto gwuma ar le ꞌdïꞌrï limidu midi gwanni gwuyang.

5 Manari gwuma ar le ru leꞌte pu nono giyiꞌrany yüngün, ya gu ru ꞌto ndi ari gwa ar le ru leꞌte pu ndi ꞌdïꞌrï gwüngün. 6 Nunnu a lïlïngïdï ndi ari lingeno lege lanni luꞌrin lima aar pädä küꞌrï ngindenga le nunnu a amiꞌra gwege gwudi lingeno lidi ke, aar dünäjï, nunnu aaꞌti ba be a la ru ngwïnäd ndi ke. 7 Ndi ari gwere gwanni gwuma ayi, gwuma gwäꞌdänï linginalu giyiima yidi ke.

8 Gwenene manari a layu Kirictunga le, a lämnï Ngwaalu ndi ari alanga ꞌto gwa ar le midi. 9 Nunnu a lïlïngïdï ndi ari anni ma aar ꞌdïꞌrïyä Kirictung giyiꞌranyanu, gwaꞌti a be gwa ayi mana. Yiꞌrany yaꞌti a be ätï yiima yere ꞌdünggüngünälä. 10 Ndi ari yiꞌrany yanni yayung je, yayung je nunnu ngwukiyi yiima yidi ke gomonanu geꞌte pu bupud a midi gwanni gwumidung, gwümïdädïng Ngwaalu.

11 No ꞌto, anijar yigoꞌro yalu ngaa layu ndi ke ngaa be midi Ngwaalu ndi Yicu Kirictu. 12 Yäy gu no, aaꞌti ba be ngaa la gäbïcï keng ndi ara je määtä gilingeno lanni lati medadi lalu lanni layu nunnu ngaa ꞌdengenaci amiꞌrang gwüngün gwanni gwuki. 13 Aaꞌti ngaa la gäbïcï ngwangina ngwalu ngwere aar ru ngwong ngwudi ape yiꞌral yanni yiki. Ngaa be manni ätädä lingina lalu Ngwaalinga ndi ari lima je ꞌdïꞌrïyälü giyiꞌranyanu limidu, ngaa ätädä Ngwaalinga ngwangina ngwalu aar ru ngwong ngwudi ape yiꞌral yanni yïdünälü. 14 Ndi ari yiꞌral yanni yiki yaꞌti ya je määtä ndi ari ngaa laꞌti ba be ïndï yobo ye, ngaa be ele yïmïꞌrü ye.

15 Yiru be ange? A la be ke nunnu a laꞌti giyobanu a gilo gïyïmïꞌräno? Bärï yaꞌti gu aꞌtur! 16 Ngaa laꞌti lïngïdï ndi ari ma aang ätädä ngwangina ngwalu dïjü, ngaa ꞌdengenaci nono ngwïnädä, ngaa liru ngwïnäd gïdïjï danni dati aang ꞌdengenaci ya ngaa liru gwudi ke gwanni gwati apa yiꞌrany ya gwani ꞌdengenaci gwanni gwati apa dünïngälo? 17 A be yäy ꞌtu gwani Ngwaalu ndi ari gwele ngaa liru ngwïnäd ngwudi yiꞌral yanni yiki, ngaa lima be ꞌdengenaca ꞌtuꞌtu giyigoranu yalu ꞌdar ngwujaꞌri ngwenggacaar je ngaa je ape. 18 Lima je gwäꞌdälü gwenene giyirna yidi yiꞌral yanni yiki ngaa lima ru ngwïnäd ngwudi yiꞌral yanni yïdünälü.

19 Äny gwondaja ngene ngwujaꞌri ngwe ngwudi dïjï dümnä, ndi ari ngaa lamiꞌratu ndi lenge gwalu. Ndi ari anaku ätädä gu ngwangina ngwalu yïnädä yidi rngï ngaa je ärränï yanni yiki, no ꞌto gwenene, ätädär ngwangina ngwalu yïnädä gwani dünälü giyiiru yanni yijuꞌru. 20 Gwele anni rangaa ngwïnäd ngwudi ke, ngaa laꞌti ju ndi ärrï yiꞌral yanni yïdünälü. 21 Bile gwuru ange gwanni gwuma aang mbuji kaji nggoo gwani yiꞌral yanni giyo yapiya je yaaru gweneno? Yiꞌral giyee, ji gwegen gwani yiꞌrany! 22 A be gweneno, lima je gwäꞌdälü giyiꞌral yanni yiki a ngaa lima ru ngwïnäd ngwudi Ngwaalu. Bile gwanni gwa aang mbuji gwa je ogtada ndi juꞌri a gwa je äpïjä miding gwudi gwurꞌtaling. 23 Ndi ari dämjü didi yiꞌral yanni yiki dani yiꞌrany, a be angidaji gwudi Ngwaalu gwani midi gwudi gwurꞌtaling Deleny de dege dani Yicu Kirictu.