1 A ngwüjï ꞌdar ꞌdengenaci ngwelenya ngwanni ngwo ngwapu yelenya yere yanni giyo yïndï, ndi ari yelenya ꞌdar, yïndï Ngwaalu. Yeleny yanni yïndï gweneno, Ngwaalu ngwuru ngwugeꞌte je. 2 No, gwere gwanni gwa nyürtïjï yelenyanu, nginde gwünyürtïjä gegeꞌteng gwudi Ngwaalu a lanni lati nyurtanu, la aar je obalu. 3 Ndi ari ngwüjï ngwanni ngwati apepe yiꞌral yanni yijaw ngwati je ꞌti yedeny ïtï ngweleny aar be ru lanni lati apepe yiꞌral yanni yiki lanni lati je yedeny eny ngweleny. A gwunana ndi aar ang ꞌti yedeny ïtï ngwelenye? Ärrï je be yanni yijaw la je ngweleny orta. 4 Ndi ari deleny diru dïnäd däpïjä Ngwaalinga yiiru yanni yijaw yani nga. Ma be ari nga gwati ape gwanni gwuki, aar ang yedeny eny, ndi ari deleny dati ꞌti ꞌtüyä ngwujaꞌralu ngwulemanu ꞌdogo aꞌtur. Ndi ari nginde gwuru dïnäd däpïjä Ngwaalinga yiiru, dätï yiima ndi obalu dïjï danni dati apepe gwanni gwuki gwani güündä gidi Ngwaalu. 5 Yäy gu no yojema ndi aar ang yedeny eny nga ꞌdengenaci ngwelenya, gwani obalu gwudi Ngwaalu na gwani ligor ꞌto. 6 Yiru giyee yanni yati a je gäbïcï ngaa je be gïꞌtïjï ꞌto dulba. Ndi ari ngweleny ngwuru ngwïnäd ngwudi Ngwaalu ngwanni ngwugwuja yiiru yegen. 7 Ätädär dïjü guꞌru güngün. Ma dulba ru, geꞌta. Ma goola ru, geꞌta. Ma denya ru, aar je denya, ma näjï ru aar je näjï.

8 Aaꞌti ngaa lätäjïdï dämjä nono dere ngaa a be ämnäjïdï ru. Ndi ari gwanni gwati ämnï gwenggen, nginde gwuma mbutiyi yobo. 9 Ndi ari ngwujaꞌri ngwudi Ngwaalu ngwaru nu, “Aaꞌti nga gwa mïꞌrï ngwäyänü, aaꞌti nga gwa ꞌrinyidi, aaꞌti nga gwa ape yuꞌrimi, aaꞌti gong gang aranu.”13.9 Gwuruj 20.13–15,17; Täjïnïyä 5.17–19,21 Ngwujaꞌri ngwee ꞌdar na ngwujaꞌri ngwere mana ngwanni ngwo, ngwurkudu ngwujaꞌri ngwee ngwaru, “Ämnä gwanggalu nono ati a gu ämnï ligoꞌro lunga.”13.9 Ngwullawi 19.18 10 Ndi ari gwanni gwati ämnï gwenggen gwating ꞌti akana nono, no ämnï gwuru mbutiyi gwudi yobo ꞌdar.

11 Giyiꞌral giyee ꞌdar, ngaa lïlïngïdï ndi ari gaji giru nggee ganni gadi ge ꞌrita giyar. Ndi ari gaji ganni gadi aar nje Ngwaalu gïlängïdïyï gima jani gito ꞌdengge kaji ganni gämnär ge Ngwaalu. 12 Ngwaalu ngwuma ji gito ndi uꞌri, a lingen anda ar be gatani yiiru yidi dïrïm ar gwodananu ngwäbländï ngwe ngwudi buri ar ji mama ar dugidi yiꞌralinga le yanni yiki.13.12 Abijuj 6.13 13 Ar elelle elelleng gwanni gwüdünälü nono ngwüjï ngwïndï gilingenalu. Aaꞌti ya ji yani yïꞌrïnyïnä yidi rlälï na yütä, yïjïn na yidigany, kadi na yiꞌrinya. 14 Ngaa be manni üllänï Yicu Kirictung nono ati gu dïjï üllänï direda, aaꞌti ngaa la ji ndi ïräjï ngwäy kay gidi gwuji amiꞌrang gwudi drü danni diki.