1 Ämnär gwanni gwamiꞌratu ämnïng Ngwaalu, degeꞌdajar aaꞌti dang de obalu ngwujaꞌri ngwüngün. 2 Gweꞌte nggwo gwati engga ämnï gwe Ngwaalu gwüngün ndi ari yaꞌti yere ndi ümnïcï ndi eny ngwonyalu ꞌdar, a be gweꞌte gwanni gwamiꞌratu ndi ämnï Ngwaalu gwüngün, gwati engga ndi ari ngweny dänyä ꞌdogo. 3 Dïjï danni dati eny ngwony ꞌdar, aaꞌti da ci gwenggenalu mireny gwanni gwati ꞌti ïtï ngwony ꞌdar. Na gwanni gwaꞌti ïtï ngwony ꞌdar aaꞌti gwa gwobalu gwenggen gwanni gwati eny ngwonyalu ꞌdar, ndi ari gwuma Ngwaalu ämnä. 4 Nga gwani yärü ndi obalu dïnädä de didi dïjï diꞌter? Gidoorta düngün, gwümätïnälü ya gwïꞌdü, gwa mätïnälü, ndi ari Deleny dätï yiima ndi mätïnïyälü.

5 Dïjï deꞌte ndo dati engga gomon geꞌte gijuꞌrana komon giꞌter, a deꞌte ꞌto engga ndi ari yomon ꞌdar yubidanu. Gäbïcär be a dïjï deꞌte deꞌte ïcïnänü ngwujaꞌri ngwe ngwüngün ngwaru ngwe. 6 Gwanni gwati engga gomon geꞌte giru ꞌter nggu ru gwani Deleny. Dïjï dati eny ngwüdï ngwating je eny gwani Deleny ndi ari gwati gu ci Ngwaalinga yäy ꞌtu. Nginde gwanni gwati ïnyïnï ndi eny ngwony ngwere, gwati gu ru gwani Deleny na nggu ci Ngwaalinga yäy ꞌtu. 7 Ndi ari dïjï dere daꞌti dati midi gwani ligoꞌro lüngün jücü na dere daꞌti dati ayi gwani ligoꞌro lüngün jücü. 8 Ma ar midi, ar midi gwani Deleny na ma ar ayi, ar ayi gwani Deleny. No manari a limidu, a manari a layu, alanga lidi Deleny liru. 9 Yiru giyee ndi ari Kirictu gwayu ngwoꞌre ngwumidu gwani yiiru giyee, ndi ari ngwuru Deleny didi ngwüjï ngwanni ngwayu na ngwanni ngwumidu. 10 A be nga, nga gwarra ati ang be obalu gwanggalu gwe? Ya nga gwarra ati ang ci gwanggalalu mireny? Aar be ru ndi ari alanga ꞌdar laji la dünäcï diduꞌralu didi Ngwaalu ndi aar nje otacalu. 11 A yüllïnä ndi ari Deleny daru nu,

13 Yäy gu no ar be dünäjï ndi obajidalu. Ar be manni geꞌte ndi ari aaꞌti a gwa ru gimle nga millici gwanggalu kayanu. 14 Äny gwülïngïdï nyi ïcïnänü ꞌdiꞌdidanu ndi Deleny dani Yicu, ndi ari ngwong ngwere ngwaꞌti ngwudi eny ngwürngü gwuꞌren. A be manari dïjï dere dima engga ndi ari gong gïrngü, ga be rngï ꞌdünggün jücü. 15 Manari yanni yati a je eny yati gäbïcï gwanggalu ngwïnï nono, apepe gwunga gwaꞌti äpïnä ämnï gwe Ngwaalu. Aaꞌti eny gwunga gwa geraji ämnïng Ngwaalu gwudi gwanggalu ndi ari Kirictu gwayu gwani nginde. 16 Aaꞌti nga gwa gäbïcï yiꞌral yanni yati a je engga yijaw a ye ngwüjï ondaji ndi ari yiki. 17 Ndi ari yeleny yidi Ngwaalu yaꞌti ani eny na ïyï, aar be ani dünälü, adatalu na jayanu Gïlïgïꞌrïm lanni Lijuꞌru. 18 Ndi ari dïjï danni dadi äpïjï Kirictu yiiru no, diru danni dati jada Ngwaalinganu a de ngwüjï gwällïnï.

19 Yäy gu no, ar be undi ngwäy ndi ärrï yiꞌral yanni yati apa adatingalu ar ye oda yigoꞌro yege. 20 Aaꞌti pädï yiiralu mbüny yidi Ngwaalu gwani eny! Ngwong ngwudi eny ꞌdar ngwujaw. Aar be ke manari nga gwuma eny gony ganni gadi gäbïcï dïjï ngwobalu. 21 Yijayana aaꞌti nga gweny ngwüdï nga ïyï diꞌrica ya nga ärrï yiꞌral yere yanni yadi gäbïcï gwanggalu ngwïꞌdï.

22 No yere yunga yanni yämnä gu giyiꞌral giyee, gäbïcä je aar ji giligoꞌro lunga na Ngwaalu. Gwonjacaar gwanni gwaꞌti übïdälü giligoꞌro lüngün mung ärrï yiꞌral yanni yänggädïng je yijaw. 23 A be gwanni gwati ngwaalu aci nono ndi eny gwüngün, gwa obalu mung eny, ndi ari gwaꞌti ïtï ligor le lämnä Ngwaalu, a yanni yati ꞌti äpïnä ämnï gwe Ngwaalu, yiru yanni yiki.