15
1 Alanga lanni gilo lojema nono ndi ämnï Ngwaalu, ar je geraci länï lanni gilo lïꞌdü ïꞌdïng gwudi amiꞌrati ndi ari aaꞌti yigoꞌro yege yinje jadanu. 2 A be alanga ꞌdar, ati dïjï mïnïjï gwenggen yiꞌral yanni yadi jadanu gwani jayi gwegen nunnu ar ojemeye nono. 3 Ndi ari ꞌdi ndi Kirictu giligoꞌro lüngün laꞌti jädänü a be gitab ari, “Lo gwudi ngwüjï gwanni gwüllüdäär gwe Ngwaalinga, gwuminy ïꞌdä nono.”15.3 Mäjïmür 69.9 4 Ngwujaꞌri ꞌdar ngwanni ngwüllïnä luubu, ngwüllïnä ndi ari aar nje enggaci ar ätï geꞌtajing ngwujaꞌri ngwe ngwanni ngwuju kitabanu ngwani mätï liguri na orꞌtemaji.
5 Ara je Ngwaalu ätädä mätïng liguri na orꞌtemaji ara je ätä gekajiding gwüpäng anaku gwuja gu Yicu Kirictung. 6 Nunnu ligor le leꞌte pu na ngwujaꞌri ngwe ngwulemanu ngweꞌte pu, ngaa näjï Ngwaalinga ngwuru Papa gwudi Deleny dege dani Yicu Kirictu.
Ämnäjïdär
7 No, ämnäjïdär gwani näjï Ngwaalinga anaku ma ara je gu Kirictu ämnï. 8 Ndi ari nggwa je ci Kirictu gwuru dïnäd didi Ngwüyäwüd ngwaalu ngwudi ngwujaꞌri ngwudi Ngwaalu ngwanni ngwuru ꞌdidanu, ngwügäbïcï ngwujaꞌri ngwanni ngwuca ngwe Ngwaalu papang je aar ätï ngwäyänü. 9 Nunnu ngwüjï ngwanni ngwuru Garany, ngwaji ngwa näjï Ngwaalinga gwani ïnä gwüngün. Anaku aru gu Däwüd kitabanu ndi ari,
“Yäy gu no, nggwa ang ortada ngwüjänü ngwuru Garany,
nyi elngaji ngwürïny ngwunga.”15.9 Mäjïmür 18.49; 2 Jämüwïl 22.50
10 Oꞌre aar ari,
“Jayaranu lanni liru Garany ngwüjïngä le ngwüngün.” 15.10 Täjïnïyä 32.43
11 Na oꞌre aar ari,
“Ürtädär Delenya nga nga ꞌdar liru Garany,
na ngwüjï ꞌdar, elngajar ngindeng ngaa ortada.”15.11 Mäjïmür 117.1
12 Na ꞌto dïjïr dani Ajaya ari,
“Guuwa gïlängïr lidi Yici ga ꞌtüdä
nginde gwanni gwa ꞌdïꞌrä ngwümäätä ngwüjï giyen,
gwa gu ngwüjï ngwuru Garany geꞌtaji.”15.12 Ajaya 1.10
13 Ara je gu Ngwaalu ngwanni ngwugeꞌtajar gu onjaji jayinganu na adatalu anaku ämnäcä gu nunnu ara je gu geꞌtaji ji gwïrälü yiima ye yidi Lïgïꞌrïm lanni Lijuꞌru.
Bulij gwapu yiiru ngwüjänü ngwuru Garany
14 Äny giligoꞌro lüny gwïcïnänü lani ngwänggärï ndi ari ngaa lapu gwonyadu gwujaw ngaa lenge bebereng ꞌdar ngaa ätï yiima ndi olajidi ꞌto. 15 Äny gwuꞌranu gwulleny ngaa je üllïjä ngwujaꞌri giyiꞌral yoko nunnu ngaa je gu diwayiniyi, ndi ari yïmïꞌrü ye yanni yätädäär nje Ngwaalu 16 ꞌdi nyi ru dïnäd didi Yicu Kirictu ngwüjï ngwuru Garany. Nyi ape yiiru yidi yirꞌdal ndi ondaji ngwujaꞌri ngwe ngwanni ngwujaw ngwudi Ngwaalu nunnu a ngwüjï ngwuru Garanyu ru gatalu gwanni gwüjädï Ngwaalinganu a je Lïgïꞌrïm lanni Lijuꞌru juꞌriyi.
17 Yäy gu no, äny gwujayanu ndi Yicu Kirictu ndi äpïjï Ngwaalinga yiiru. 18 Ngwaꞌti gwa ädïnï ndi ondaji yiꞌral ye yere ꞌdogo yanni yima je Kirictu mbutiyi äny gwe ndi okta ngwüjü ngwuru Garany ndi ꞌdengenaci Ngwaalinga ngwujaꞌri ngwe ngwanni ngwuminy ngwe ari na yiiru ye yanni yiminje ape. 19 Ape gwe yiima yidi yiꞌremna na allalu ndïr na yiima ye yidi Lïgïꞌrïm. No, äny gwondaca ngwüjü ngwujaꞌri ngwanni ngwujaw ꞌtuꞌtu Üräjälïm ꞌdi aar obani ngwaalu ngwani Alirkun, nyi gu gwondaja ngwujaꞌri ngwudi Kirictu ku. 20 Äny gwati arnga giyomon ꞌdar ndi ondaji ngwujaꞌri ngwanni ngwujaw ngwaalu ngwanni ngwaꞌti gu ngwüjï lïngïdï Kirictung nunnu aaꞌti nggwa oda kidingo ganni gigeꞌta dïjï diꞌter. 21 A be anaku ullu dïjïr dani Ajaya kitabanu gwani Kirictu ngwari,
“Lanni laꞌti aar je ondaca nginde gwe la engga,
na lanni laꞌti ꞌdingina nginde gwe la lenge.”15.21 Ajaya 52.15
22 Yiru giyee yanni yïgäbïcïny nyi ꞌti be burna yomon yonyadu ndi ila ꞌdanggalu.
A Bulij geꞌta ndi ele Ruma
23 A be gwenene, ngwaalu ngwere ngwaꞌti ba be ndi nyi gu ape yiiru ngene. A anni jädï nyi gu ꞌtuꞌtu ngwüdläyü ngwonyadu ndi ila nga je engga. Äny gwugeꞌta gu ndi a je engga 24 minyi ila nggwadi ele Ajipaniya. Äny gwugeꞌtaja ndi ila ꞌdanggalu nyii gendaci guy gïdïlä ndi ele Ajipaniya manari a lima acajidi lamanu yomon cong. 25 Äny gwenene nggwo kay nggwadi ele Üräjälïm nyi äpïjï ngwïkïrïjïnä yiiru ngenone. 26 Ndi ari ngwïkïrïjïn ngwudi Majiduniyang na Akayiya ngwujayanu ndi ïmäjïdï ngwuy aar gataji ngwengga düwä ngwanni ngwuru ngwuwayi Üräjälïmïng. 27 Lanni liru Garany lïjädï gu ndi aar je ärrï giyee na ꞌdidanu yiru dämjü ꞌdenggen gwani Ngwüyäwüd. Ndi ari manari Ngwüyäwüd ngwuru ngwäpïjä ngwüjü ngwuru Garany ngwujaꞌri ngwanni ngwujaw ngwudi onjaci gwudi lïgïꞌrïm, yiru gu ꞌto dämjü ngwüjï ngwuru Garany emadi Ngwüyäwüd ngwe onjaci gwegen gwe gwudi lingeno. 28 No manari äny gwuma medaja yiiru giyee, minyi gu lenge ndi ari yima aar je ape, nggwa be ꞌdïꞌrä nggwila nyi ele Ajipaniya. 29 Nyi be lenge ndi ari minyi ila ꞌdanggalu, nggwila gwonjaca Kirictu gwulleny.
30 Nggwa je päcälü ngwänggärï gwani Deleny dege dani Yicu Kirictu, na gwani ämnäjïdï gwudi Lïgïꞌrïm ndi ari ar acajidi ndi undi ngwäy gwüpäng ndi otaci Ngwaalingalu gwani äny. 31 Nunnu aaꞌti nggwïꞌdï kuyanu gidi ngwüjï ngwäꞌtüdï ngwïkïrïjïn Yäwüdïyä na ndi ari a ngweengga Üräjälïm ämnï yiiru yüny. 32 ꞌDi manari Ngwaalu ngwuma ari yäy nyi ila ꞌdanggalu, nyi ila ligor le lijayanu aar jalu gwüpäng ar oꞌradalu. 33 Ara je gu Ngwaalu ngwanni ngwuru adatalu ji ꞌdar. Yiru gu.