1 Äny gwa je ola gwani diweengga dege diru gera dani Pïbï gwanni gwati gendaji guy giyiiru kiꞌdoonga gidi Kanggiriyang.*16.1 Gündär gani Kanggiriya, giju gito gito kündär gani Küründüj. Yiiru 18.18 2 Mätär ꞌdanggalu gwuru diweengga Gideleny ngaa ärrïjï yiꞌral yidi ngwïkïrïjïn ngwudi Ngwaalu. Gendacar guy giyiꞌral yere yanni ying je bupi ngwaalu ngwere ꞌdanggalu, ndi ari gwugataja ngwüjü düwä ngwonyadu aar nyi gataji düwä ꞌto.

3 Agannar Bärjïkïlläng je Äkïllä gwe lanni liru nyii le gimaad giyiiru ndi Yicu Kirictu. 4 Ngindenga linanu ndi mïꞌrïnï nono yigoꞌro ye yegen gwani äny. Nyi ꞌti be rüdï jücü gwuca je yäy ꞌtu, aar be ru ꞌdar lidi giꞌdoonga gidi ngwüjï ngwuru Garany lica je yäy ꞌtu.

5 Agannar ꞌto giꞌdonga ganni gati oꞌrajidalu ꞌdunu ꞌdenggen.

Agannar Apenetojing gwanni gwämnïny gwanni gwuru giꞌra ndi ru dïkïrïjïn didi Kirictu ngwaalu ngwani Ajiya.

6 Agannar Märïyämïng gwanni gwundu ngwäy ndi ara je äpïjï yiiru gwerre.

7 Agannar Andrunikujing je Yuniya gwe, liru ngwüjï ngwüny lanni liju nyii le korkon. Ngindenga lilinginna ngwooꞌranu ngwükäjär je. Liru ngwïkïrïjïn ndi Kirictu gwerre gwerre ꞌdünggüny.

8 Agannar Ambliyatujing, gwanni gwämnïny Gideleny.

9 Agannar Yurbanujing gwanni gwuru nyii le gimaad giyiiru ndi Kirictu, na Ijitagij gwanni gwämnïny.

10 Agannar Apelejing gwanni gwuma inggidi ndi ari gwuma gwällïnï ndi Kirictu.

Ngaa aganni ngwuꞌduna ngwudi Arijtubulij.

11 Agannar Yïrüdïyünïng gwuru dïjï düny.

Ngaa aganni ngwuꞌduna ngwudi Narkijuj lanni liru ngwïkïrïjïn Gideleny.

12 Agannar Täräbïnäng na Täräbüjäng liru ngwaw ngwanni ngwundu ngwäy giyiiru Gideleny.

Agannar Bïrjïjïng gwanni gwämnïny gwuru gweꞌte mana ngwaanu gwundu ngwäy giyiiru yonyadu Gideleny gwerre.

13 Agannar Rubujing gwanni gwäbrä Deleny na nanni gwüngün gwanni gwuru nono nanning gwüny ꞌto.

14 Agannar Äjïnïkïrtüjïng na Palegon na Armij na Batrubaj na Armaj ngaa aganni ngwengga ngwanni ngwati aar le oꞌrajidalu.

15 Agannar Payiligujing na Jülïyä, Neroj na gera giru gwenggen, Uliyimbaj na ngwüjï ꞌdar ngwudi Ngwaalu ngwanni ngwati aar le oꞌrajidalu.

16 Agannajidar giyinenanu agannajiding gwanni gwujuꞌru.

Yiꞌdoonga ꞌdar yidi Kirictu, yaganna je.

17 Nggwa je päcälü lani ngwänggärï, ndi ari ngaa arngani ngwüjü ngwanni ngwati gwogaji ngwüjü aar üꞌrïꞌtïdänü, aar je millici kay ngwujaꞌri ngwe ngwaꞌti aar ïndï ngwujaꞌri ngwe ngwanni gwenggacaar a je gwuma lenge. Ngwüjï ngwanni ngwuru gu no, ꞌtüdär gu. 18 Ndi ari lanni liru gu no, laꞌti äpïjä Delenya dege dani Kirictu yiiru aar je be apada ndi amiꞌra ngwegen, ngwujaꞌri ngwe ngwami ngwulemanu aar ngwe mamiꞌri ngwüjänü ngwuru ngwumulu aar je dudiyi yaꞌranya. 19 Lonyadu liꞌdingina ꞌdengenaci gwe gwalu Delenya. Yiminy be gäbïcï nyi jayanu gwani nga nga. Nyi be mïnï ndi aang bebera giyiꞌral yanni yijaw ngaa jayi nono giyiꞌral yanni yiki.

20 Ngwaalu ngwudi adatalu, ngwo gito ngwa mireny dijegoꞌro giꞌranu giyoranu yalu.

Ara je gu yïmïꞌrü ji yidi Deleny dege dani Yicu.

21 Diweengga dani Timijawuj, gwuru gimaad güny giyiiru gwaganna je. Ara je Lukuyuj, Yajun, na Jujipatar liru ngwüjï ngwüny aganna ꞌto.

22 Äny gwani Tïrtïyüj gwanni gwüllïjä Bulijing ngwujaꞌri ngwee ngwükäcärä je, nggwaganna je ngwürïny ngwe ngwudi Deleny.

23 Gayuj, gwanni gwugeꞌta nje ngwugeꞌte giꞌdongalu ꞌdar gidi Ngwaalu gïyïrnü yijaw ngwuꞌdun ngwüngün, gwaganna je.

Arictuj gwanni gwati määtä gola gidi ngwüjï ngwudi gündär nginde na diweengga dege dani Kwartuj laganna je.†16.23 Yitab yoko yati ari, Ara je gu yïmïꞌrü ji ꞌdar yidi Deleny dani Yicu Kirictu. Yiru gu!