2
Bino ka Tipo Naleng
1 Ï karë na nïnö më Pentekot örömö, ëlübkör Kiricito kïbëc onwongo ögürë gïnï kanya acël. 2 Athura wöö owinyere nakun öya kï ï polo na calö yamö na kudho na ger ëka opong ï öt ökö kïbëc kany onwongo gïn obedo ïë. 3 Cë gin mörö onen bothgï na cal kï lëb mac n'opokere ëka opye ï wi ngat acëlacël ï kin-gï. 4 Gïn kïbëc opong kï Tipo Naleng ëka öcakö gïnï dhümö lëb nökënë na papath kite na Tipo Naleng ömïögï më twakö.
5 Ï caa nön, onwongo Eyuda na bedo gïnï ï Jerucalem, jö n'onwongo wörö gïnï Obanga n'öya kï ï rok kïbëc na tye ï wi lobo thükül. 6 Ï karë na gïn owinyo wöö nön, lwak kïbëc ögürë na wigï ocung ökö, pïën ngat acëlacël onwongo winyogï ka twakö gïnï lëb thurgï kikome. 7 Cë ouro gïnï rwök nakun kobo gïnï nï, “Jö ni kïbëc na tye ka twak gïnï ba obedo jö më Galilaya? 8 Cë pïngö onu kïbëc etye ka winyogï nakun ngat acëlacël tye ka twak kï lëb thurgï kikome? 9 Wan jö më Parithia, jö më Media, jö më Elam, kï jö na bedo ï Mecopotamia, Yudea kï Kapadokia, Ponto ëka Acia, 10 Perugia kï Pampulia, Ejip kï lobo Libia na cwök kï Cirene, kï wele n'öya gïnï kï ï Roma 11 na gïn Eyuda kï jö nökënë n'ölökërë gïnï ï diniwa, Kurete kï jö Arab, wan ewinyogï ka tuco gïnï pï tic na döngö më twërö k'Obanga ï lëb onu kikome.” 12 Gïn kïbëc ouro na ba twërö gïnï nïang. Gïn openyere kën-gï nï, “Man körë nïngö?”
13 Ëntö jö nökënë okobo köp më anywar ï komgï nakun kobo gïnï nï, “Jö ni ömër amëra kï köngö.”
Köp na Petero ötwakö ï nïnö më Pentekot
14 Cë Petero ocung kanya acël k'ëkwëna apar acël, ötwak kï dwön na malö nakun kobo bothgï nï, “Un Eyuda ewodha, ëka un kïbëc nï bedo unu ï Jerucalem, bër inge unu köp ni, dök ïcïk ithwu më winyo twak na mëga. 15 Jö ni ba ömër kite na un ïthamö ködë, pïën caa pod adek këkën më kodiko. 16 Ëntö man köp na yam adwarpïny Joel ötwakö pïrë nakun kobo nï,
17 “ ‘Obanga okobo nï, ï karë më ajiki,
abino önyö Tipona ï kom jö kïbëc.
Ëthïnö awopewu ëka anyirawu bino dwaro adwar,
awopewu na thïnö bino nënö gïnï gin anyutha,
jöwu n'otii bino gïnï leko lek.
18 Naka thon eticna, na cwö ëka mon,
an abino önyö Tipona ï komgï ï karë nön,
ëka gïn bino dwaro adwar.
19 An abino nyutho gin më aura ï wi polo malö
ëka anyuth na papath pïny ï wi lobo,
remo, mac, ëka iro na dung.
20 Ceng bino cido ökö na cöl cuc,
ëka dwe bino lökërë dökö na kwar calö remo,
na bara nïnö na dit ëka nïnö më dheo ka Rwoth obino.
21 Ëka jö kïbëc na bino cwodo
nyïng Rwoth bino larë.’ ”
22 Petero ömëdërë anyim nakun kobo nï, “Un jö më Icarael, winy unu köp ni: Yecu më Najaret onwongo obedo dhanö n'Obanga onyutho bothwu kï tio tango, gin më aura, ëka anyuth n'Obanga otio kanya acël ködë ï kin onu, na calö un kikomwu ingeo.” 23 Yecu ni ëmïö bothwu kite na yam Obanga onwongo öyübö nakun ngeo gin na bino tïmërë ï anyim, ëka un iguro ën ï kom yath arïa, ineko unu kï cïng jö na ba ngeo cïk k'Obanga. 24 Ëntö Obanga ocero ën ökö kï ï kin jö n'öthöö nakun gönyö ën ökö kï kom arem më thöö, pïën thöö onwongo ba twërö moko ï kome. 25 Daudi okobo köp ï kome:
“ ‘Ï karë kïbëc an anënö nï Rwoth tye köda.
Pïën ën tye ï cïnga kucem,
an ba abino yengara.
26 Pï manön cwinya yom ëka thon lëba twak kï yom cwiny,
koma thon bino bedo kï gen,
27 pïën in ba ibino wëköna ï kin jö n'öthöö,
onyo ba ibino wëkö Dhanöni Naleng töp.
28 In inyutho nïna yoo na tera ï kwö,
in ibino mïöna abedo kï yom cwiny ï nyimi.’ ”
29 Petero ömëdërë anyim nakun kobo nï, “Utmegona, myero akob bothwu köp ï kom kwarö onu Daudi atïr nï yam ën öthöö ökö ëka eiko kome, ëka etye kï lyënë both onu kany naka tin. 30 Ëntö ën yam onwongo obedo adwarpïny, dök ongeo nï Obanga yam okwongo kwong bothe nï ebino ketho dhanö mörö na tye ï kin ëkwaë mërë më bedo ï then më löc mërë. 31 Ën yam önënö gin na bino tïmërë ï karë më anyim, ëka ötwakö köp ï kom cer ka Meciya, nï ën onwongo ba ëwëkö ï kin jö n'öthöö, kome thon ba ötöp. 32 Man ënë Yecu n'Obanga ocero ökö, onu kïbëc ebedo ecaden ï kom köp nön. 33 Etingo ën malö ï nget cïng Obanga kucem, ögamö Tipo Naleng na yam ëcïkö kï both Apap ëka öönyö ï komwa gin na dong un itye ka nënö kï wangwu ëka thon iwinyo unu kï ithwu. 34 Pïën Daudi yam ba öcïdhö ï polo, ëntö ën okobo nï,
“ ‘Rwoth Obanga okobo both Rwodha:
“Bed ï cïnga kucem
35 naka ka abino mïö langni
dökö gin më theno tyeni.” ’
36 “Pï manön myero jö më Icarael kïbëc onge gïnï rwök nï Obanga otyeko ketho Yecu ni, na un iguro ï kor yath arïa, më bedo Rwoth ëka Kiricito.”
37 Ï karë na jïï owinyo köp ni, ödönyö ï cwinygï rwök, cë openyo gïnï Petero ëka ëkwëna nökënë nï, “Utmegowa, ngö na myero wan ëtïm?”
38 Petero ögamö nï, “Ngut unu ëk ebaticawu, ngat acëlacël kï kinwu, ï nyïng Yecu Kiricito ëk ëtïm kïca ï kom bal na mewu. Ëka ibino unu gamö mïc ka Tipo Naleng. 39 Pïën cïkërë ni ëcïkö pïrwu k'ëthïnöwu ëka pï jö kïbëc na tye gïnï kanya bor, na Rwoth Obanga onu bino cwodogï.”
40 Cë Petero ömëdërë kï tïtö köp nökënë na pol nakun dwekogï nï, “Larë unu kenwu ïya unu ökö kï kom wang rok n'öbal ni.” 41 Ëka jö n'oyeo köp na ën okobo bothgï, ebaticagï ëka ömëdërë ï nïnö nön jö na römö elip adek.
Gürë ka jö n'oye
42 Jö n'oye kïbëc ömïrë kën-gï më winyo pwony k'ëkwëna, gürë kanya acël, poko ï ogati, ëka lëga. 43 Ëkwëna obedo tino tango ëka anyuth na pol, naka jö kïbëc lworo ömakögï. 44 Jö n'oye onwongo cökërë gïnï kanya acël, nakun nywakö gïnï jami kïbëc kanya acël. 45 Gïn öcadhö lönyögï ëka jamigï, cë gïn opoko both jö kïbëc kï ï kin-gï kite na miti ka ngat acëlacël tye ködë. 46 Gïn ömëdërë më gürë kanya acël nïnö kïbëc ï dyekal öt k'Obanga nakun poko gïnï ï ogati kï ï pecigï, n'ëcamö kï yom cwiny ëka kï cwiny na bër, 47 n'ëpakö Obanga, na dhanö kïbëc pwöyögï, ëka Rwoth obedo ka mëdö bothgï jö n'ölarë nïnö kï nïnö.