1 Ï nïnö mörö acël, Petero ëka Jon öcïdhö gïnï ï öt k'Obanga ï caa më lëga, caa abungwën më kothyeno. 2 Onwongo tye dhanö mörö n'ongwal cakërë ï karë n'ënywölö ën ködë, n'etingo atinga ï wangkac më Öt k'Obanga n'ecwodo nï Wangkac na Bër, ëk ökwa köny nïnö kï nïnö kï both jö na dönyö ï Öt k'Obanga. 3 Ï karë na ën önënö Petero ëka Jon tye ka dönyö gïnï, angwalo ökwaögï cïlïng. 4 Petero ëka Jon öcïkö wang-gï ï kome. Cë Petero okobo nïnë nï, “Nënwa!” 5 Angwalo oketho cwinye më nënögï, nakun geno nï ebino mïönë gin mörö. 6 Ëntö Petero okobo nï, “An ba atye kï lïm mörö, ëntö an amii ngö na an aute ködë. Ï nyïng Yecu Kiricito më Najaret, yaa malö ïcak woth.” 7 Cë Petero ömakö cïng angwalo më kucem ëka otingo ën malö, cë cücüth odon tyënë ödökö na tëk. 8 Angwalo opye kï tyënë ëka öcakö woth. Cë ödönyö ködgï ï Öt k'Obanga nakun wotho, pye, ëka pakö Obanga. 9 Ï karë na jïï kïbëc önënö angwalo ka wotho ëka pakö Obanga, 10 gïn önïang nï ënë dhanö na yam kwaö köny kï ï wangkac më Öt k'Obanga n'ecwodo nï Wangkac na Bër. Gïn obedo kï ur rwök ï kom ngö n'ötïmërë ï kome.

11 Gïn kïbëc öngwëcö kanya acël kï ur ï tyën öt ka Colomon, kanya angwalo onwongo omoko ï kom Petero ëka Jon. 12 Ï karë na Petero önënö köp ni, ën okobo bothgï nï, “Un jö më Icarael, ngö na mïöwu iuro unu ngö n'ötïmërë? Pïngö un itye ka rïpöwa kömanön calö wan ënë ëtïmö kï tëköwa onyo kite na wan elworo k'Obanga ködë ënë ömïö angwalo ni owotho? 13 Obanga k'Abraam, Icaka ëka Jakob, Obanga ka kwerewa, oketho dheo mërë ï kom atic mërë Yecu. Un ïmïö ï cïng Pilato ëk enek ën nakun ïkwërö unu ökö ï karë na Pilato mïtö gönyö ën. 14 Un ïkwërö Ngat na Leng ëka na kite Atïr, cë ïkwaö unu nï ëk ëgöny niwu dhanö n'obedo anek. 15 Un ineko ngat na mïö kwö, ëntö Obanga ocero ën kï ï thöö. Ëka wan ënë ebedo ecaden më köp ni. 16 Pï yee ï nyïng Yecu, ënë ömïö ëcwö ni onwongo tëkö kite na un ïnënö ëka ingeo. Obedo nyïng Yecu ëka yee ï kome ënë ömïö ën öcang ï nyimwu kite na un kïbëc itye ka nënö ködë.

17 “Kobedini dong utmegona, an angeo nï yam ïtïmö unu köp ni ï karë më kwia pïny, kamë ëtëlawu. 18 Ëntö kite na yam Obanga ötwak kï ï dhö edwarpïny kïbëc nï Kiricito mërë myero ölïm can, ëka dong ocobere kakarë nï kömanön. 19 Ngut unu dong, ëka ïlökërë unu both Obanga, ëk balwu ëjwa ökö, 20 ëk karë më yweo na yaa kï both Rwoth obin bothwu, ëka ën bino oro Yecu, na ënë Meciya n'ëyërö niwu. 21 Ën myero obed ï polo naka ka karë örömö n'Obanga bino dwökö jami kïbëc kakarë, kite na yam ën öcïkërë ködë k'edwarpïny mërë na leng. 22 Muca yam okobo nï, ‘Rwoth Obangani bino oro adwarpïny mörö niwu, na bino yaa kï ï kin utmegowu kite na ën oora ködë. Un ibino winyo unu ën ï köp kïbëc na ën bino kobo niwu. 23 Ngat mörö na ba bino winyo ën, ebino rwenyo wangë ökö kï kin jö thurgï.’

24 “Cakërë kï ï kom adwarpïny Camuel, edwarpïny kïbëc ötwakö köp ï kom ngö na tye ka tïmërë ï kom karë ni. 25 Un ibedo ëkwaë k'edwarpïny nön, ëka un ënë ekethowu ï cïkërë k'Obanga both kwerewu. Pïën Obanga okobo both Abraam nï, ‘Rok kïbëc më wi lobo bino nwongo gum kï both ëkwaëni.’ 26 Ï karë na dong Obanga oketho atic mërë, ën öcakö oro bothwu ëk ömïïwu gum na mïö ngat acëlacël lökërë wëkö tïmö bal.”