4
Petero ëka Jon ï nyim athuko më öd okiko k'edong
1 Ï karë na Petero ëka Jon onwongo tye ka twak gïnï kï jïï, ëlamdhök ëka adit acikari më öt k'Obanga ëka Ecadukayo obino gïnï bothgï. 2 Ëtëla ni onwongo öngö gïnï nï Petero ëka Jon onwongo tye ka pwonyo jïï nï, kï twër më nyïng Yecu, jö n'öthöö bino cer gïnï ökö. 3 Gïn ömakö Petero ëka Jon cë ekethogï ï buc naka othuno kodiko, pïën pïny onwongo ocido ökö. 4 Ëntö jö na pol n'owinyo köpgï oyee, ëka wel jö n'oye Yecu n'obedo gïnï cwö ömëdërë othuno elip abic.
5 Kodiko mërë na pïny dong oru, ëlöc ëka edong, k'epwony cïk öcökërë gïnï ï Jerucalem. 6 Anac Alamdhök na Dit onwongo tye kany nön, ëka Kayapa, Jon, Alegijanda, ëka jö kïbëc na tye gïnï ï dholokek k'Alamdhök na Dit. 7 Gïn okelo Petero ëka Jon ï nyimgï nakun penyogï nï, “Koth tëkö mënë na un itye ka tic ködë onyo kï nyïng nga?”
8 Cë Petero, opong kï Tipo Naleng ëka okobo bothgï nï, “Un ëlöc ëka edong ka lwak! 9 Ka tin ipenyowa unu köp ï kom tic na bër n'ötïmërë ï kom angwalo ëka kite na ën öcang ködë, 10 cë dong un kïbëc ëka jö më Icarael myero inge unu nï, pï nyïng Yecu Kiricito më Najaret na un iguro ï kom yath arïa, n'Obanga ocero ökö kï ï kin jö n'öthöö, ënë ëcwö ni ocung ï nyimwu n'öcang ökö. 11 Ënë obedo
“ ‘kidi na un egedo ïkwërö unu ökö,
n'ölökërë ödökö kidi na pïrë tëk më gwïc öt.’
12 Larë ope both ngat mörö nökënë, pïën Obanga ba ömïö nyïng mörö nökënë ï lobo kany both dhanö na myero onu ëlarë ködë.”
13 Ï karë na jö na tye ï öd athuko önënö gïnï tëk cwiny Petero ëka Jon cë önïang gïnï nï gïn onwongo obedo jö na ba ökwanö ëka ba ngeo gïnï gin mörö. Obedo gïnï kï ur ëka önïang gïnï nï cwö ni yam obedo kanya acël kï Yecu. 14 Ëntö ka gïn önënö ëcwö n'öcang ocung ï ngetgï, köp mörö na gïn myero okobi ölöögï ökö. 15 Ëka ëcïkögï më dönyö yökö kï ï athuko më öd okiko k'edong, cë öcakö gïnï yübö köp kën-gï, 16 nakun kobo gïnï nï, “Ebino tïmö jö ni nïngö? Jö kïbëc na bedo gïnï ï Jerucalem otyeko ngeeno nï gïn otio anyuth na kome nen, na onu ba ëtwërö kwërö. 17 Ëntö më jükö ëk kür ökëth öröm kin jïï, bër ëcïkgï ëk kür ömëdërë gïnï më kobo nyïng ni both ngat mörö këkën.” 18 Cë ecwodogï më dwogo cen, ëka ëcïkögï nï kür ötwak onyo opwony gïnï köp mörö kï nyïng Yecu. 19 Ëntö Petero ëka Jon ögamö gïnï nï, “Un ïngöl köp kenwu ka cë nen na bër ï wang Obanga më winyowu na löö winyo Obanga, 20 pïën wan ba ëtwërö wëkö kobo gin na yam wan ënënö ëka ewinyo.”
21 Kinge bürögï, cë gïn öwëkögï öcïdhö, gïn ba onwongo yoo më ketho pwod ï komgï, pïën jïï kïbëc onwongo pakö gïnï Obanga pï ngö n'ötïmërë. 22 Dhanö na tango më cangö ötïmërë ï kome, onwongo mwaka mërë kadhö pyer angwën ökö.
Lëga ka jö n'oye
23 Cücüth n'ëgönyögï, Petero ëka Jon ödök gïnï both jö n'oye nökënë ëka okobo nïgï ngö n'ëlamdhök na dito ëka edong okobo gïnï. 24 Ï karë na gïn owinyo köp ni, jö n'oye kïbëc okok gïnï kanya acël kï dwön na malö më lëga both Obanga na kobo gïnï nï, “Rwoth Obanga won twër, in iketho polo kï lobo ëka nam kï jami kïbëc na tye ïë, 25 cön ïtwak kï dhö kwaröwa Daudi n'obedo aticni kï tëkö ka Tipo Naleng n'okobo nï,
“ ‘Pïngö erok wöö gïnï kanya acël,
ëka pïngö rok na pol yübö köp na köny mërë ope?
26 Rwodhi më lobo yübërë gïnï pï lwëny,
ëka ëlöc cökërë kanya acël
ï kom Rwoth
ëka ï kom Ngat n'ewiro.’
27 Adyer Erode ëka Pontio Pilato k'Erok ëka jö më Icarael ögürë gïnï kanya acël ï pacö ni ï kom aticni Yecu na leng na in iwiro. 28 Gïn ötïmö ngö na tëköni ëka mitini omoko nï bino tïmërë. 29 Ëka kobedini Rwoth Obanga, winy büragï ëka ïmïïwa eticni, ëk ëtït köpni kï tëk cwiny. 30 Ryë cingi më cangö jïï, ëk anyuth më tango ëka gin më aura na pol ötïmërë kï nyïng aticni Yecu na leng.”
31 Kinge na dong ölëgö gïnï, kabedo na gïn ögürë ïë oyengere. Ëka gïn kïbëc opong kï Tipo Naleng, cë ötïtö gïnï köp k'Obanga kï tëk cwiny abonge lworo mörö.
Jö n'oye önywakö gïnï jamigï
32 Jö n'oye kïbëc onwongo nöthërë gïnï kanya acël ï cwiny ëka ï thama. Ngat mörö ope na kobo nï gin na ën etye ködë onwongo obedo mëgë, ëntö gïn önywakö jami kïbëc na gïn onwongo tye ködë. 33 Ëkwëna ömëdërë gïnï më mïö caden më cer ka Rwoth Yecu kï tëkö rwök, ëka gum na thwönë opodho ï komgï kïbëc. 34 Onwongo ngat mörö ope na gin mörö orem bothe, pïën jö n'onwongo tye kï pwothigï onyo udigï öcadhö gïnï ökö, ëka okelo gïnï lïm n'öya kï ïë, 35 cë ömïö gïnï both ëkwëna ëka më poko both ngat acëlacël kite na mïtërë ködë.
36 Kömanön Yocepu n'obedo Alebi më Caiprac, n'ëkwëna cwodo nï Baranaba (na thërë nï, “Wod k'ajïng cwiny jö”). 37 Ën öcadhö pwodho mërë na ën onwongo tye ködë ëka okelo cïlïng both ëkwëna.