19
Ãko Ãdróŋá ꞌbã ũꞌbãlé rĩ kí ꞌdị̃zã ĩꞌdidrị̂ iꞌda
1 ꞌBụ̃ kí dị̃zã Ãdróŋá drị̂ iꞌda;
ãngũ ꞌbụ̃gá rĩ kí ãzị́ Ãdróŋá ꞌbã ngalé rĩ iꞌda!
2 Ụ́ꞌdụ́ ãlu ãlu la dị̃zã Ãdróŋá drị̂ iꞌda;
ị́nị́ ãlu ãlu la ãmbõgõ Ãdróŋá drị̂ iꞌda.
3 Jọ kí ị́jọ́ tị sĩ ku,
âre vâ kí ụ́ꞌdụ́kọ́ ku;
4 Wó ụ́ꞌdụ́kọ́ ĩꞌbadrị̂ la iré ụ̃nọ́kụ́ drị̃ gá ꞌdâ pírí;
ị́jọ́ ĩꞌbaní jọlé rĩ la ca kpere ụ̃nọ́kụ́ ị̃ndụ́ ꞌbã ãsị̃ agá.
Ãdróŋá idé ị̃tụ̂ ní ãngũ ꞌbụ̃ gá ꞌdãá rá;
5 ĩꞌdi agá ụ̃ꞌbụ́tị sĩ cécé ị́zị́gọ́ ãfũlépi ãyĩkõ sĩ ĩꞌdidrị́ jó agâlé rĩ áni,
ĩꞌdi cécé ágọ́bị́ ũkpó ụ́ngụ́lẹ́ cẹ̃lépi ãbálá ru ãyĩkõ sĩ rĩ áni.
6 Ị̃tụ̂ la agá ꞌbụ̃ ꞌbã wókõ ãzí rĩ gá,
ĩꞌdi mụ ị̃tụ̂rụ̃ kpere wókõ ꞌbụ̃ ꞌbã sĩ ãsị̃jó rĩ gá.
Ãko ãzí icó ru aꞌbólé koŋá la ãcí rĩ sĩ ku.
7 Ãzị́táŋá Úpí drị̂ kí pịrị;
kí ũkpõ fẽ úríndí nî.
Ãzị́táŋá Úpí drị̂ kí drị̃ gá ála ásị́ tị̃ rá,
kí ũndũwá fẽ ꞌbá ũndũwã ĩcẽlépi rá rĩ nî.
8 Ãzị́táŋá Úpí drị̂ kí ãlá ru,
kí ãyĩkõ fẽ ꞌbá ásị́ gá.
Ị́jọ́ Úpí ꞌbã azịlé rĩ kí pịrị,
kí ãngũ ji ꞌbá mịfị́ ní.
9 Úpí ụ̃rị̃jó rĩ ĩꞌdi ãlá ru,
ĩꞌdi mụ drị̃ gá ãsị̃ŋá kó ru.
Ãzị́táŋá Úpí drị̂ kí pịrị,
ãzíla kí pírí ãlá ru.
10 Ndẽ kí ãjẹ̃ sĩ gólũdĩ rá;
ndẽ kí gólũdĩ ũnĩ ambamba rĩ rá
ãzíla ị̃lị́kị̃lị́ sĩ ndẽ kí ãnụ́ rá,
ndẽ kí ãnụ́ rá.
11 Kí ãtíꞌbó mídrị̂ bị́lẹ́ ị̃ndụ́ li;
Kí tãmbajó rĩ la ụ̃rọ̃drị́ ãmbógó la ají.
12 ꞌBá ãzí icó ũnzĩkãnã ĩꞌdidrị̂ kí nị̃lé ku.
Ípa ma ị́jọ́ ũnzí mádrị́ ru zị̃lépi zị̃zị̃ rĩ kî sĩ.
13 Mí atrị ãtíꞌbó mídrị̂ ị́jọ́ ũnzí idéjó círí ru rĩ agá;
ífẽ ị́jọ́ ũnzí ꞌba adru áma drị̃ gá úpí ru ku.
ꞌDã ꞌbã ũngúkú gá, ma dó sĩ adru ị́jọ́ kọ́lị,
ãzíla ma dó sĩ adru ị́jọ́ ũnzí ãmbógó la kọ́lị.
14 Mí ãꞌị̃jõ mání ị́jọ́ ãfũlépi áma tị gá rĩ kí rá,
ãzíla ị́jó mání ũrãlé áma ásị́ agâlé rĩ ꞌbã fẽ kíjõ míní ãyĩkõ rá fô!
Úpí, mi ũkpó mádrị̂ ꞌi ãzíla ꞌbá áma anzélépi rĩ ꞌi!