39
Ụ́ꞌdụ́ ꞌbání adrujó ídri rĩ kí lú were
1 Ájọ, “Álẽ adrulé mịfị́ trũ ị́jọ́ mání idélé rĩ kí sĩ,
ãzíla ma ámã idra tãmba ị́jọ́ ũnzí sĩ,
ma áma tị ãzụ̃ cí;
sáwã ꞌbá ũnzí rĩ ꞌbã kí adrujó áma andre gá rĩ sĩ.”
2 Ájọ ándrá ị́jọ́ ku, má ĩyãŋã tútú,
ájọ ị́jọ́ ãzí múké la jõku ũnzí la ku,
ũcõgõ mádrị̂ ri tụlé drị̃ gá drị̃ gá.
3 Áma ásị́ ko dó sĩ agâlé ãcí ru,
mání ị́jọ́ ũrã agâ ꞌdĩgá ꞌdâ, áma ásị́ acá dó ũcõgõ rú ị̃dị́-ị̃dị́
ꞌdã ꞌbã ũngúkú gá ájọ dó ị́jọ́ áma tị sĩ.
4 “Úpí, mí iꞌda mání ídri mádrị̂ la ãsị̃ ãꞌdụtụ́ yã rĩ,
ãzíla ụ́ꞌdụ́ mádrị̂ ꞌbã kãlãfe kî;
ílũ mání ídri mádrị̂ la ãsị̃ ãꞌdụtụ́ yã rĩ ꞌi.”
5 Índre drĩ, mí idé ídri mádrị̂ ãlị́ŋá ru,
áma ídri la iꞌdá ími mẹ́lẹ́tị gá ãzị́ kóru.
Ãndá-ndá ru ídri ꞌbá ãlu ãlu drị̂ ĩꞌdi ãlụ́kụ́kụ̃ áni.
6 ꞌBá ĩꞌdi índréléndri áni ĩꞌdiní acị́ agá ándrá ãzíla ụ́rụ́:
ĩꞌdi ru ĩcãndĩ úyé
ĩꞌdi málĩ tra rá, wó nị̃ ãꞌdi la mụ ayúlé la nĩ yã rĩ gá ku.
7 Wó úꞌdîꞌda Úpí, ma dó ãꞌdu ndrụ̃?
Átị̃ ásị́ ími drị̃ gá.
8 Ípa ma ị́jọ́ ũnzí mádrị̂ kí agá rĩ sĩ pírí,
ífẽ ꞌbá azalépi aza-azâ rĩ ꞌbã gụ kí ma ku.
9 Ánzị̃ ándrá áma tị ku; má ĩyãŋã ándrá tútú,
ãꞌdusĩku míní ị́jọ́ ꞌdĩ idéjó mi ꞌi rĩ sĩ.
10 Mí aꞌbe áma coŋá cã
áma ũkpó ukó rá míní áma cojó rĩ sĩ.
11 Mi uzá ãzíla mi ꞌbá kí ị̃ndụ́ co ị́jọ́ ũnzí ĩꞌbadrị̂ kí sĩ,
mi málĩ ĩꞌbadrị̂ kí mbe cécé ụ̃dụ̃dụ̃ ꞌbã kí mbelé rĩ áni
ꞌbá ãlu ãlu ꞌbã ídri ĩꞌdi cécé ãlụ́kụ́kụ̃ áni.
12 Mí are áma zịtáŋá fô, Úpí,
mí are áma áwáŋá ãzãkoma aꞌị́jó rĩ;
mí ĩyãŋã mání tú tú ku áma mị́ndrẹ ꞌbã asu agâ,
ma acị́ mí be cécé ãmị́yọ́ŋá áni,
ma ꞌbá amụ́lépi amụ́ amụ̂ la cécé má áyị́pịka kí áni.
13 Mí aꞌbe ma cã, ma dó sĩ mání ãyĩkõ ịsụ́ ị̃dị́
ꞌdĩ sĩ ádrã drĩ ku rú ãzíla má ãvĩ drĩ ku rú.