40
Ãzãkoma aꞌị́jó Úpí drị́
1 Ári Úpí ũtẽlé jãjã rú,
uja ru tị má rụ́ ãzíla are áma áwáŋá rá.
2 Anzé ma ꞌbụ́ ũré rĩ agá rĩ sĩ rá,
anzé ma ãmvé ũdrí agá ãzíla áté agá rĩ sĩ,
ꞌbã áma pá írã drị̃ gá,
fẽ mání pá tulé ãngũ ũkpó drị̃ gá.
3 Imbá ma úngó úꞌdí la ngolé,
úngó sĩ Ãdróŋá ãmadrị̂ rụ́ ịcụ́jó rĩ ꞌi.
ꞌBá ũꞌbí kí ndre la ãzíla kí idé ụ̃rị̃ sĩ
ãzíla kí ásị́ ꞌbã Úpî drị̃ gá.
4 ꞌBá ásị́ tị̃lépi Úpî drị̃ gá,
ãngũ ndrelépi ꞌbá ãfó ru rĩ ꞌbarụ́ ku,
ru icílépi ꞌbá ãdróŋá ĩnzõ rú rĩ kí ị̃nzị̃lépi rĩ abe ku rĩ ĩꞌdi drị̃lẹ́ba rú.
5 Úpí, Ãdróŋá ãmadrị̂,
mí idé ãmaní ị́jọ́ ụ̃sụ̃táŋá ru rĩ kí ũꞌbí ru.
Ị́jọ́ míní ụ̃tị̃lé ãmaní rĩ kí,
ꞌbá ãzí icó kí kãlãfe lãlé ku,
ádrĩ tá ị́jọ́ jọ kí drị̃ gá ãzíla kí ũlũ yã áni,
kí tá adru mání ambamba sĩ kí iꞌdajó.
6 Ídétáŋá kí ãwãꞌdĩfô be fẽ kí míní ãyĩkõ ku;
mí aꞌị́ ãnãkpá ídétáŋá ru ivélé ãlĩtárĩ drị̃ gá rĩ kí,
ídétáŋá ị́jọ́ ũnzí idejó rĩ kí abe ku.
Wó kẹ̃jị́ la gá ífẽ mání bị́lẹ́ sĩ ị́jọ́ mídrị̂ kí arejó.
7 ꞌDã ꞌbã ũngúkú gá, ájọ dó, “Ma ꞌdõ, má amụ́ dó ꞌbo,
úsĩ ị́jọ́ áma drị̃ gá ꞌdĩ bụ́kụ̃ mídrị́ ãzị́táŋá drị̂ agá.
8 Ãdróŋá mádrị̂, álẽ ị́jọ́ míní lẽlé rĩ kí ngalé,
ámba ãzị́táŋá mídrị̂ kí tã áma ásị́ gá rá.”
9 Úpí, ãngũ ũꞌbí mídrị̂ ꞌbã kí ru trajó rĩ gá,
ma ị́jọ́ pịrị mídrị́ míní sĩ áma pajó rĩ ꞌbã vú nze.
Míní nị̃lé rá rĩ áni, má icó ĩyãŋãlé tú sĩ kí vú nzejó ku la ku.
10 Ázị̃ ị́jọ́ pịrị mídrị̂ ꞌbã ị́jọ́ áma ásị́ gá ku;
sáwã pírí sĩ ma ị́jọ́ jọ míní ị́jọ́ míní azịlé rĩ tãmbajó rá rĩ drị̃ gá patáŋá mídrị̂ be.
Má ĩyãŋã lẽtáŋá mídrị́ ãzíla ị́jọ́ mgbã mídrị̂ ꞌbã ị́jọ́ trũ tú
ũꞌbí mídrị́ ru tralépi rĩ ꞌbaní ku.
11 Úpí, mí atrị ásị́ ị̃gbẹ̃ mídrị̂ mání ku fô!
Lẽtáŋá mídrị́ ukólépi ku rĩ kí ị́jọ́ mgbã mídrị̂ be kí áma tãmba nĩ.
12 Ũcõgõ ũꞌbí lãlé ku la ce kí áma andre nĩ;
ị́jọ́ ũnzí mádrị̂ ndẽ kí dó ma rá, má icó ãngũ ndrelé ku;
ndẽ kí ũꞌbĩkãnã sĩ drị̃ꞌbị́ áma drị̃ gá rĩ kí rá,
ãzíla ásị́ mbaŋá mádrị̂ ukó dó rá.
13 Úpí, ípa ma!
Úpí, mí amụ́ áma ãzãkolé gbõrú fô!
14 ꞌBá lẽlépi áma ꞌdịlépi ꞌdĩ
ꞌba ịsụ́ kí drị̃nzá ãzíla ꞌbã ãbã kí ãbã-ãbã;
lẽ ûja ꞌbá pírí lẽlépi áma ị̃lị̃kị̃lépi rĩ kí
vúlé ãzíla ꞌbã acá kí drị̃nzá sĩ.
15 Lẽ ꞌbá jọlépi la mâ sĩ, “Ãhá! Ãma ịsụ́ dó ị̃ndụ́ la ꞌbo” rĩ,
ꞌbã acá kí drị̃nzá sĩ ꞌbání kí ndẽjó rĩ sĩ,
16 wó ꞌbá pírí ími ndrụ̃lépi rĩ
ꞌbã ũnũ kí ru mî sĩ ãzíla ꞌbã uꞌá kí ãyĩkõ sĩ;
lẽ ꞌbá pírí patáŋá mídrị̂ lẽlépi rĩ
ꞌbã jọ kí, “Úpí, ĩꞌdi ãmbógó ru!”
17 Ma mâ ngá lẽmẽrí ãzíla ũkpó kó ru,
Úpí, mí ũrã ị́jọ́ áma drị̃ gá.
Mi ꞌbá áma ãzãkolépi ãzíla áma palépi rĩ ꞌi;
Ãdróŋá mádrị̂ mí iza sáwã ku fô!