52
Lẽtáŋá Ãdróŋá drị́ uyaŋá kóru rĩ
1 ꞌBá ũkpó trũ rĩ, mi ími ịpị́ ị́jọ́ ũnzí sĩ íni ãdu sĩ yã?
Mi ꞌbá drị̃nzá ajílépi Ãdróŋá mịfị́ gá ꞌdĩ;
Ínị̃ ị́jọ́ lịŋá Ãdróŋá drị́ pịrị rĩ ĩꞌdi adru jãꞌdâ rĩ ku yã?
2 Mi ị́jọ́ ụ̃tị̃ ꞌbá kí ị̃lị̃kị̃jó;
ími ĩdra cí cécé ị̃drị́ŋá sị́ áni.
Mi sáwã pírí sĩ ĩnzõ úꞌdí la alị́.
3 Ílẽ ị́jọ́ ũnzí ndẽ ị́jọ́ múké rĩ rá,
ílẽ ĩnzõ ndẽ ị́jọ́ pịrị rĩ nzejó rĩ rá.
4 Mi ꞌbá ĩnzõ alị́lépi ꞌdĩ, ílẽ mi ꞌbá kí ũzãŋá sĩ ími ĩdra sĩ íni ãꞌdu ị́jọ́ sĩ yã?
5 Wó Ãdróŋá la mụ ími ị̃lị̃kị̃lé rá ãndá ãndá ru;
ĩꞌdi ími anzé mídrị́ jó agâlé, ĩꞌdi ími andi kpékpé rá;
Ãdróŋá la ími anzé ízókí trũ gbụ́ ꞌbá ídri rĩ kí drĩdríŋĩ gá rĩ sĩ rá.
6 ꞌBá ãlá rĩ kí ị́jọ́ ꞌdĩ kí ndre ãzíla kí idé ụ̃rị̃ sĩ;
kí dó ími gụ ãzíla kí jọ la,
7 “Ĩndre drĩ ágọ́bị́ ándrá ru ꞌbãlépi Ãdróŋá icó îtã mbalé nĩ ku,
wó ásị́ ꞌbãlépi málĩ ĩꞌdidrị́ wẽwẽ rĩ kí drị̃ gá,
ãzíla ũkpõ ịsụ́lépi drị̃ gá drị̃ gá ị́jọ́ ũnzĩ ĩꞌdidrị̂ kí sĩ rĩ ꞌi!”
8 Wó ma cécé ife mị̃zẹ̃yị́tụ̃ drị́ dịlépi jó Ãdróŋá drị̂ agá rĩ áni;
átị̃ ásị́ lẽtáŋá Ãdróŋá drị́ aꞌdélépi ku jãꞌdâ rĩ drị̃ gá.
9 Ãdróŋá, ma ími rụ́ ịcụ́ ị́jọ́ míní ngalé rĩ kí sĩ jãꞌdâ.
ꞌBá mídrị̂ kí drị̃gâsĩ, ma ími rụ́ ịcụ́ jọjó la, mi múké.