53
Ị́jọ́ ũnzĩ ꞌbá ꞌbadrị̂
1 ꞌBá azalépi aza-azâ rĩ kí jọ la kí ásị́ gâlé,
“Ãdróŋá ꞌbãngá ꞌdáyụ.”
Iza kí ru pírí rá,
ãzíla ị́jọ́ ĩꞌbã kí ngalé rĩ kí ũnzíríkãnã rú trẹ̃yị́;
ꞌbá ãzí ị́jọ́ múké ngalépi la ãluŋá la ꞌdáyụ.
2 Angájó ꞌbụ̃ gâlé, Ãdróŋá la ãngũ andré vũ gá ꞌdõlé sĩ ndrejó la,
ũri ꞌbádrị̂ agá ꞌbá ãzí ũndũwã rú,
ãzíla ĩꞌdi ndrụ̃lépi la nõ cí yã áni.
3 Wó ꞌbá pírí uja kí ru ũngúkú ĩꞌdiní áyụ,
iza kí ru pírí rá,
ꞌbá ãzí ị́jọ́ múké rĩ ngalépi la ꞌdáyụ, átã ãlu la ꞌdáyụ.
4 Ãdróŋá la zị la, ꞌBá ị́jọ́ ũnzí ngalépi rĩ icó kí ị́jọ́ ụ̃nị̃lé ku yã?
“Kí ꞌbá mádrị̂ kî na cécé mũkátĩ najó rĩ áni ãzíla zị kí ma ku.”
5 Wó ꞌdã ꞌbã ũngúkú gá ụ̃rị̃ ãmbógó
jõ drĩ ídu kí rụlépi ku la, la dó kí rụ nĩ;
Ãdróŋá la ĩfãkã mẹ́rọ́ꞌbá ĩmidrị̂ drị̂ kí iré kpékpé.
Ịsịrayị́lị̃ la mẹ́rọ́ꞌbá ĩꞌdidrị̂ kí ndẽ kpítã rá
Ãdróŋá ꞌbã kí gãjó úmgbé rĩ sĩ.
6 ꞌBárĩ, patáŋá drĩtá dó angá ꞌbá Ịsịrayị́lị̃ drị̂ ꞌbaní Zị̃yọ́nị̃ gâlé la tá múké fô!
Ãdróŋá la ꞌbá ĩꞌdidrị̂ kí fẽ acálé málĩ trũ ãzíla ãyĩkõ sĩ ị̃dị́ ãꞌdu tụ́ yã?
Lẽ Yãkóꞌbõ kí ꞌbá Ịsịrayị́lị̃ drị̂ kí abe ꞌba adru kí ãyĩkõ sĩ.