58
Ãdróŋá ĩꞌdi ꞌbá ụ̃nọ́kụ́ ꞌbã ị́jọ́ lịlẹ́pi rĩ ꞌi
1 Ĩmi ꞌbá ꞌbá kí drĩ celépi ꞌdĩ, ĩmi ínĩngá ị́jọ́ pịrị la jọ rá yã?
Ĩmi ꞌbá kí ị́jọ́ lị pịrị rá yã?
2 Yụ! Ĩmi ásị́ gâlé ĩmi ị́jọ́ mũlũmbẽ rú rĩ kí ũrã áyụ,
ĩmi ãlí fẽ kpẹ̃lé ụ̃nọ́kụ́ drị̃ gá ꞌdâ ĩmi ꞌi.
3 ꞌBá ũnzí rĩ kí ũnzĩkãnã trũ iꞌdójó kí ãndrẽ agâlé,
kí ĩnzõ trũ iꞌdójó kí ãndrẽ agâlé.
4 Ũjũ ĩꞌbadrị̂ cécé ị̃nị̃ drị̂ áni;
kí cécé galaꞌbá lẽlépi ị́jọ́ arelépi ku rĩ kí áni,
5 ị́jọ́ ꞌdĩ sĩ are kí dó sĩ ụ́ꞌdụ́kọ́ jaligó vulé rĩ drị̂ ku,
ꞌbá la vulépi la rĩ drĩ táni vu la ãlị̃gọ̃ sĩ rá tí.
6 Ãdróŋá, mí ũnũ kí sị́ rá;
Úpí, mí aco sị́sọ̃ kẹ̃mị̃ ꞌbadrị̂ kí rá!
7 Lẽ ꞌbã ãvĩ kí cécé ị̃yị́ dịlépi rá rĩ ꞌbã nzụlé rĩ áni;
drĩ kí ụ́sụ ĩꞌbadrị̂ kí ꞌa nzã, lẽ ꞌé ĩꞌbadrị̂ kí sị́ ꞌbã ci ku.
8 Lẽ ꞌbã adru kí cécé átíríkó akálépi ụ̃mvụ́sụ́ ru rĩ áni;
ꞌbã adru kí cécé ngọ́tị́ŋá ãfũlépi káyĩ ị̃tụ́ ndrelépi ku rĩ áni.
9 Nị̃ kí drĩ ku rú, ála kî lị vũ gá cécé ãvúkí áni;
ũmbã Ãdróŋá drị́ ãmbógó rĩ sĩ, ĩꞌdi kî vu rá, drĩ kí táni adru ídri rú!
10 ꞌBá ãlá ri kí uꞌá ãyĩkõ sĩ drĩ kí ndre la ála kí ãrígó tị ũfẽ ꞌbá ũnzí rĩ kí ụrụꞌbá gá rĩ gá;
kí dó ru pá ũjĩ ãrí ꞌbá ị́jọ́ ũnzí ngalépi rĩ ꞌbadrị̂ agá.
11 ꞌDã ꞌbã ũngúkú gá, ꞌbá kí dó jọ la,
“Ãndá-ãndá ru ála ꞌbá ãlá ri kí ũfẽ rá;
ãndá-ãndá ru Ãdróŋá ị́jọ́ ꞌbá ụ̃nọ́kụ́ gá ꞌdĩ ꞌbadrị̂ lịlẹ́pi la cí.”