59
Tãmbaŋá zịjó Ãdróŋá drị́ rĩ
1 Ãdróŋá mádrị̂, mí apá ma mẹ́rọ́ꞌbá mádrị̂ kí drị́gá;
ímba ámatã ꞌbá amụ́lépi márụ́ ãꞌdị́ gá rĩ kî sĩ!
2 Ípa ma ꞌbá ũnzí kí drị́gá;
mí apá ma ꞌbá ꞌbá ãrí asulépi rĩ kí drị́gá!
3 Índre drĩ Úpí! Kí áma ũtẽ ꞌdịlé;
ꞌbá ũnzí rĩ tra kí ru áma drị̃ gá,
adru ị́jọ́ ũnzí mání ngalé la sĩ ku.
4 Má iza drĩ ị́jọ́ ãzí ku, wó kí ꞌbãngá bábá sĩ lẽjó áma ꞌdịjó.
Úpí, índre drĩ ị́jọ́ ru idélépi ꞌdĩ kí,
mí angá dó sĩ áma ãzãkojó!
5 Úpí Ãdróŋá Ũkpó ꞌDị́pị, mi Ãdróŋá Ịsịrayị́lị̃ drị̂ ꞌi,
mí angá sĩ drị̃rịma fẽjó sụ́rụ́ pírí ꞌbanî;
mí iꞌda ásị́ ị̃gbẹ̃ ꞌbá ũnzí ị́jọ́ izalépi rĩ ꞌbaní ãluŋá la ku.
6 Kí ãgõ vúlé ĩndró sĩ,
kí ãgbọ̃ cécé ũcógó áni
ãzíla kí táwụ̃nị̃ tị apí.
7 Mí are drĩ úꞌdáŋá ãzíla gbọ́rọ́kọ̃ ãfũlépi kí tị gá rĩ,
Kí idra la ꞌbá sõ cécé ménéŋá sị́ ãcí rĩ áni,
ũrã kí ꞌbá ãzí are drĩ ị́jọ́ ĩꞌbã kí jọlé rĩ ku.
8 Wó Úpí, mi kí gụgụ̃;
mi sụ́rụ́ ị́jọ́ mídrị̂ kí ãꞌị̃lépi ku rĩ kí gụgụ̃.
9 Ma ũkpó ru la mî sĩ;
Ãdróŋá, mi bõrõ ũkpó mání sĩ áma zị̃jó alagá rĩ ꞌi.
10 Ãdróŋá mádrị̂ lẽ ma rá ãzíla ĩꞌdi amụ́ má rụ́ ꞌdõlé rá;
ĩꞌdi áma fẽ mẹ́rọ́ꞌbá mádrị̂ kí ꞌbã ndẽŋá ndrelé rá.
11 Ãdróŋá, mí ụꞌdị́ kí ku, jõ íni ku ꞌbá mádrị̂ kí ị́jọ́ ímbátáŋá ru ꞌdĩ áni rĩ kí ãvĩ rá.
Mí iré kí ũkpó mídrị̂ sĩ ãzíla índẽ kí rá,
Úpí, ꞌbá ãma palépi rĩ.
12 Ị́jọ́ ũnzí ãfũlépi kí tị gá rĩ sĩ;
ị́jọ́ ĩꞌbã kí jọlé ĩꞌbã tị sĩ rĩ sĩ, kí ũnzí-ũnzí;
ífẽ úrụ kí ãfó ĩꞌbadrị̂ agá ãꞌdusĩku kí ꞌbá tri ãzíla kí ĩnzõ jọ.
13 Mí ị̃lị̃kị̃ kí ũmbã mídrị̂ sĩ;
mí ị̃lị̃kị̃ kí kpere ĩꞌbã ãzí ãlu la ꞌbã ace gá ku.
ꞌDã ꞌbã ũngúkú gá, ꞌbá pírí kí dó sĩ nị̃ la rá Ãdróŋá ĩꞌdi Úpí ru Ịsịrayị́lị̃ gá nĩ,
ãzíla ũpĩ ĩꞌdidrị̂ ụ̃nọ́kụ́ drị̃ gá ꞌdâ pírí.
14 Kí ãgõ vúlé ĩndró sĩ,
kí ãgbọ̃ cécé ũcógó áni
ãzíla kí táwụ̃nị̃ tị apí.
15 Kí ãngũ pi léru-léru cécé ũcógó ãkónã ndrụ̃lépi rĩ kí ani,
ko kí ụ́ꞌdụ́ ku kpere ĩꞌbaní aga agá rá ká.
16 Wó mã mụ úngó ngolé ũkpõ mídrị̂ drị̃ gá;
ụ̃ꞌbụ́tị ãlu-ãlu sĩ ma úngó ngo ụ́ꞌdụ́kọ́ ụrụgá sĩ lẽtáŋá mídrị́ ukólépi ku rĩ ꞌbã ị́jọ́ sĩ,
ãꞌdusĩku mi bõrõ ũkpó mádrị́
mání sĩ áma zị̃jó ala gá sáwã ị́jọ́ ꞌbã kí adrujó ũkpó-ũkpó rĩ sĩ rĩ ꞌi.
17 Ãdróŋá, mi ũkpó mádrị̂ ꞌi, mã mụ úngó ngolé ími rụ́ ịcụ́jó,
ãꞌdusĩku mi bõrõ ũkpó mání sĩ áma zị̃jó ala gá rĩ,
mi Ãdróŋá áma lẽlépi ambamba rĩ ꞌi.