71
Ãdróŋá ꞌbá delépi rá rĩ ꞌbã zịlé rĩ
1 Úpí, ma apá sĩ áma zị̃jó ími agá;
ífẽ má ịsụ́ jõ drị̃nzá ku fô!
2 Ípa ma ãzíla mí anzé ma mũkẽ mídrị̂ sĩ;
mí ajá ími bị́lẹ́ má rụ́ ꞌdõlé sĩ áma arejó ãzíla ípa ma.
3 Mí adru írã mádrị́ mání sĩ áma zị̃jó ala gá rĩ rú,
ma ụ́ꞌdụ́ pírí sĩ mụ áma zị̃lé ala gá;
ífẽ ãzị́táŋá sĩ áma pajó rĩ ꞌbo,
ãꞌdusĩku mi írã ãzíla bõrõ ũkpó mádrị̂ ꞌi.
4 Ãdróŋá mádrị̂, ípa ma ꞌbá ũnzí rĩ kí drị́gá,
ípa ma ꞌbá ásị́ ũnzí ãzíla ị́jọ́ ũnzí rĩ kí drị́ gá,
5 Úpí mádrị̂, mi ꞌbá mání sĩ ásị́ tị̃jó drị̃ la gá rĩ ꞌi,
ãꞌdusĩku áꞌbã ásị́ ími drị̃ gá iꞌdójó ãnzị̃rị̃ŋã sĩ.
6 Má iꞌdó áma ãtị̃lé mírụ́ sáwã áma tĩjó rĩ sĩ;
sáwã áma tĩjó rĩ sĩ, mí ũfũ ma mâ ãndrẽ agá rĩ sĩ mi ꞌi,
ma ími ịcụ́ jãꞌdâ.
7 Ídri mádrị̂ ĩꞌdi ꞌbá ũꞌbí ꞌbaní ícétáŋá ru,
ãꞌdusĩku mi ãngũ ũkpó mání sĩ apájó áma zị̃jó ala gá rĩ.
8 Ma ími ịcụ́ ụ́ꞌdụ́ pírí sĩ,
ãzíla ma dị̃zã mídrị̂ ꞌbã ị́jọ́ ũlũ ụ́ꞌdụ́ pírí sĩ.
9 Ígã ma sáwã mání adrujó ãmbá ru rĩ sĩ ku;
mí aꞌbe jõ ma sáwã áma ũkpõ ꞌbã ru dejó ꞌbo rĩ sĩ ku fô,
10 ãꞌdusĩku mẹ́rọ́ꞌbá mádrị̂ kí ị́jọ́ jọ áma drị̃ gá,
kí ị́jọ́ itú ãngũ ãlu gá áma ụrụꞌbá gá sĩ lẽjó áma ꞌdịjó.
11 Jọ kí Ãdróŋá aꞌbe dó ĩꞌdi ꞌbo;
ĩdro ĩꞌdi vú ãzíla ĩmi arụ́ ĩꞌdi;
ꞌbá ãzí icólépi ĩꞌdi palépi la ꞌdáyụ.
12 Ãdróŋá mí adru má be rá-rá ru ku fô
Ãdróŋá, mí ĩlãgũ ma gbõrú sĩ áma ãzã kojó.
13 Ífẽ ꞌbá áma tõlépi rĩ ꞌbã ũdrã kí drị̃nzá sĩ,
ífẽ ꞌbá áma ndrụ̃lépi sĩ áma adrájó rĩ
ꞌbã ịsụ́ kí drị̃nzá kí ãrútáŋá ãkõ be fô.
14 Wó ma ásị́ ꞌbã ími drị̃ gá,
ma mụ ími ịcụ́lé ị̃dị́-ị̃dị́
15 Ma mụ mũkẽ mídrị̂ ꞌbã ị́jọ́ lũlé,
patáŋá mídrị́ ụ́ꞌdụ́ pírí rĩ sĩ rĩ be ꞌbá pírí ꞌbaní,
ádrĩ táni kãlãfe la íngõpí yã rĩ nĩ agá ku tí.
16 Ma mụ ị́jọ́ ãmbogo ãmbogo míní idélé rĩ kí ũlũlé Úpí Ãdróŋá;
Ma lú mũkẽ mídrị̂ ꞌbã ị́jọ́ igá áꞌdụ̂sĩ.
17 Ãdróŋá, mí imbá ma mi ꞌi iꞌdójó ãnzị̃rị̃ŋã sĩ,
Kpere ãndrũ ma drĩ ị́jọ́ míní idélé ụ̃sụ̃táŋá ru rĩ kí vú nze.
18 Ádrĩ táni de rá ãzíla áma drị̃ꞌbị́ drĩ táni mve rá tí,
Ãdróŋá mí aꞌbe jõ ma ku fô,
kpere mání ũkpõ mídrị̂ iꞌda agá anzị drị̃lẹ́ gá lé rĩ ꞌbanî,
ũkpõ mídrị́ ꞌbá pírí mụlépi amụ́lépi rĩ ꞌbanî rĩ.
19 Ãdróŋá, mũkẽ mídrị̂ ca kpere ꞌbụ̃ gâlé ꞌdã,
mí idé ãko ãmbogo ãmbogo ꞌdĩ kí mi ꞌi.
Ãdróŋá, ꞌbá mí áni rĩ ãꞌdi ꞌi?
20 Ídrĩ táni ándrá mání fẽ ũcõgõ ũꞌbí la kí áma rụlé rá tí
mi mání mụ ídri fẽlé ị̃dị́ rá;
mi mụ áma ingalé ídri rú ị̃dị́,
angájó ụ̃nọ́kụ́ mgbi rĩ agâlé.
21 Mi mụ mání ãrútáŋá ãmbógó la fẽlé ịsụ́lé
ãzíla mi áma ásí ũŋmĩ pâlé ãlu ĩdí rá.
22 Ãdróŋá, ma ími rụ́ ịcụ́ ụ̃ꞌdị́ sĩ,
ãꞌdusĩku mi ị́jọ́ mgbã rĩ nga.
Ma úngó ími rụ́ ịcụ́jó rĩ ngo ụ̃ꞌdị́ sĩ.
Mi Ãdróŋá ãlá Ịsịrayị́lị̃ drị̂ ꞌi.
23 Míní áma pajó rĩ sĩ!
Ma uzá ãzíla ma ãyĩkõ idé, ma úngó ngo sĩ ími rụ́ ịcụ́jó
áma ásị́ pírí sĩ.
24 Ma mụ ị́jọ́ míní idélé ãlápítí ꞌdĩ kí ũlũlé
ụ́ꞌdụ́ pírí sĩ
ãꞌdusĩku ꞌbá ndrụ̃lépi sĩ áma adrálépi rĩ kí
úndẽ dó kí rá ãzíla ịsụ́ kí dó drị̃nzá ãmbógó la ꞌbo.