72
Ãdróŋá zịjó Úpí nî
1 Ãdróŋá, mí imbá úpí ꞌi ị́jọ́ lịŋá mídrị́ pịrị rĩ sĩ;
ãzíla ífẽ úpí ngọ́pị ní ị́jọ́ liŋá múké rĩ ꞌi.
2 Ĩꞌdi dó sĩ ꞌbá mídrị̂ kí ị́jọ́ lị ị́jọ́ pịrị rĩ kî sĩ,
ĩꞌdi dó sĩ ꞌbá mídrị́ ĩkpãlé ĩkpã ꞌdĩ kí drĩ ce ị́jọ́ mgbã sĩ.
3 Ífẽ ụ̃nọ́kụ̂ ꞌba ají ꞌbá ꞌbaní ásị́ ị̃gbẹ̃,
ífẽ túpũ ꞌbã ka kí ífí mũkẽ drị̂ ꞌi.
4 Úpí la ꞌbá ĩkpãlé ĩkpã rĩ kí tãmba ꞌbá kí agá nĩ,
ãzíla ĩꞌdi anzị ꞌbá lẽmẽrí rĩ ꞌbadrị̂ kí ãzãko nĩ;
ĩꞌdi ꞌbá kí ĩkpãlépi rĩ kí ị̃lị̃kị̃ rá.
5 Lẽ ꞌbá mídrị̂ ꞌbã ị̃nzị̃ kí mi áꞌbị́ anzị pírí sĩ jãꞌdâ,
kpere ị̃tụ̂ ꞌbã kí adru agá ĩmbâ be ꞌdáyụ.
6 Úpí ũpĩ mídrị̂ ꞌba adru cécé uzogó ꞌdịlépi ámvụ́ mvẽlé rá rĩ drị̃ gá rĩ áni,
cécé uzogó ꞌbã ꞌdịjó ụ̃nọ́kụ̂ drị̃ gá rĩ áni.
7 Ụ́ꞌdụ́ ĩꞌdidrị̂ kí agá ꞌbá ãlá rĩ kí tụtụ̃
ĩmbâ drĩ jõ drĩ ãvĩ ku ásị́ ị̃gbẹ̃ ĩꞌbadrị̂ la adru jãꞌdâ.
8 Ĩꞌdi Ũpĩ na iꞌdójó mĩrĩ ãzí rĩ gá cajó mĩrĩ ãzí rĩ gá,
ãzíla ị̃yị́ Ũfũrátĩ gá kpere ụ̃nọ́kụ̂ tị ꞌbã ãsị̃ agá.
9 Sụ́rụ́ kõtórõ agá rĩ kí mụ ãvụ̃lé ĩꞌdi drị̃lẹ́ gá,
mẹ́rọ́ꞌbá ĩꞌdidrị̂ kí amụ́ ru ũlĩlé vụ̃rụ̂ sĩ ĩꞌdi drị̃lẹ́ gá.
10 Ũpi Tãrãsị́sị̃ gá rĩ kí ãzíla ãngũ ãꞌị́ ru lịlépi ị̃yị́ agá rĩ kí abe
kí mụ mụ̃sọ́rọ̃ ꞌbelé ĩꞌdinî;
Ũpi sụ́rụ́ Sébã gá rĩ kí
Síbã gá rĩ abe kí mụ ĩꞌdiní fẽtáŋá ajílé.
11 Ũpi pírí kí mụ ãvụ̃lé ĩꞌdi drị̃lẹ́ gá
ãzíla sụ́rụ́ pírí kí mụ ãzị́ ngalé ĩꞌdinî.
12 Ị́jọ́ ꞌdĩ sĩ ĩꞌdi dó mụ ꞌbá lẽmẽrí ru awálépi ãzãkoma sĩ rĩ kí ãzã kolé rá,
ꞌdĩ kí ꞌbá ị́jọ́ ꞌbã ndẽlé rá ꞌbá ãzí ꞌbã icólé ãzã kolé ku rĩ kî.
13 Ĩꞌdi mụ ꞌbá lẽmẽrí ru ãzíla ãzãkoma lẽlépi ꞌdĩ kí ị́jọ́ ꞌdụlé ãmbógó ru ĩꞌdi ꞌbã ásị́ gá
ãzíla ĩꞌdi ꞌbá ãzãkoma lẽlépi rĩ kí ídri pa drã agá rá.
14 Ĩꞌdi kí unze angájó ĩkpãŋá agá ãzíla ãꞌdị́ agá,
ãꞌdusĩku ãrí ĩꞌbadrị̂ ꞌbã ị́jọ́ ãmbógó ru ĩꞌdi mịfị́ gá.
15 Úpí ꞌbã uꞌá ídri ílí ãzo rú!
Lẽ úfẽ ĩꞌdiní gólũdĩ angálépi Sébã gá rĩ i;
lẽ ꞌbá ꞌbã zị kí ĩꞌdiní Ãdróŋá sáwã pírí agá;
lẽ ásị́ ị̃gbẹ̃ Ãdróŋá drị̂ ꞌbã adru ĩꞌdi be ụ́ꞌdụ́ pírí sĩ!
16 Lẽ ãkónã ꞌbã ka ãngũ drị̃ gá pírí rá ru;
ãkónã ꞌbã aku túpũ kí drị̃ pírí cí,
ife ífí ala gá rĩ ꞌbã ka kí Lébãnõnĩ gá rĩ áni.
Lẽ táwụ̃nị̃ ãmbogo-ãmbogo rĩ ꞌbã ga kí ꞌbá sĩ tré, cécé ásé ꞌbã dụjó cíkĩ-cíkĩ ámvụ́ agá rĩ áni.
17 Lẽ Úpí ꞌbã rụ́ ꞌbã kụ jãꞌdâ
ĩꞌdi ꞌbã rụ́ ꞌbã kụ jãꞌdâ cécé ị̃tụ̂ ꞌbã adrujó jãꞌdâ rĩ áni.
Sụ́rụ́ pírí kí ásị́ ị̃gbẹ̃ isụ́ ĩꞌdi rụ̂ sĩ,
ãzíla kí ĩꞌdi umve ꞌbá Ãdróŋá ꞌbã sĩ sụ̃sụ́ wijó ĩꞌdiní rá rĩ ꞌi.
18 Ĩmi ịcụ́ Úpí Ãdróŋá, Ãdróŋá Ịsịrayị́lị̃ drị̂ ꞌi!
Ĩꞌdi lú ꞌbá ị́jọ́ ụ̃sụ̃táŋá ru rĩ kí idélépi nĩ rĩ ꞌi.
19 Ị́cụ́ rụ́ ĩꞌdidrị́ dị̃zã rú rĩ jãꞌdâ;
lẽ ụ̃nọ́kụ̂ ꞌba ga tré dị̃zã ĩꞌdidrị̂ sĩ.
Ámĩnã ãzíla Ámĩnã.
20 ꞌDĩ Ãdróŋá zịŋá Dãwụ́dị̃ Yésẽ ngọ́pị ꞌbã sĩ ãsị̃jó rĩ ꞌi.