77
Asị́ ũŋmĩŋá ịsụ́jó sáwã ũcõgõ drị̂ sĩ
1 Má awá ụ́ꞌdụ́kọ́ ụrụgá sĩ Ãdróŋá rụ́;
má awá Ãdróŋá rụ́, ꞌba are sĩ ma.
2 Sáwã ũcõgõ drị̂ kí agá, ma Úpí Ãdróŋá zị;
ị́nị́ sĩ ma áma drị́ kí inga ụrụgá sĩ Ãdróŋá zịjó,
wó má ịsụ́ ásị́ ũŋmĩŋá ku.
3 Ádrĩ ị́jọ́ agá Ãdróŋá drị̃ gá, ma awá awâ,
ádrĩ ị́jọ́ ũrã drị̃ la gá, áma úríndí la acá ũkpó kóru.
4 Mi áma fẽ uꞌálé mịfị́ mgbọ rú ị́nị́ ãrã,
áma ásị́ ũcõgõ rú, má icó dó sĩ ị́jọ́ jọlé ku.
5 Ma ị́jọ́ ũrã ụ́ꞌdụ́ ídu rĩ kí drị̃ gá,
ílí ídu alịlépi ꞌbo rĩ kí drị̃ gá.
6 Má ũrã dó ị́jọ́ úngó mání ngolé ị́nị́ sĩ rĩ kí drị̃ gá,
áma ásị́ la ị́jọ́ ũrã ãzíla ĩꞌdi ị́jọ́ ụzị áma agâlé.
7 “Úpí la dó ãma gã kpítã rú jãꞌdâ yã?
Icó dó adrulé ãmaní ásị́ ị̃gbẹ̃ sĩ ị̃dị́ ku yã?
8 Lẽtáŋá ĩꞌdidrị́ ukólépi ku rĩ de dó ru kpítã rá yã?
Ị́jọ́ ĩꞌdiní azịlé rĩ icó dó ru idélé sáwã pírí agá ku yã?
9 Ãdróŋá ãvĩ dó ị́jọ́ ĩꞌdiní adrujó ãma abe ásị́ ị̃gbẹ̃ sĩ rĩ rá yã?
Ũmbã ĩꞌdidrị̂ ndẽ dó ásị́ ị̃gbẹ̃ ĩꞌdidrị̂ rá yã?”
10 ꞌDã ꞌbã ũngúkú gá, ájọ dó ị́jọ́ íni, “Ị́jọ́ áma azálépi ãndânĩ rĩ ĩꞌdi ꞌdĩ:
Ãdróŋá Ũkpó ꞌDị́pị adru dó ũkpó trũ ị̃dị́ ku.”
11 Ma ị́jọ́ Úpí ꞌbã idélé rĩ kí agá,
ãndá, ma ị́jọ́ ídu ĩꞌdiní idélé ụ̃sụ̃táŋá ru rĩ kí agá.
12 Ma ị́jọ́ ũrã ãzị́ pírí míní ngalé rĩ kí drị̃ gá,
ãzíla ma ị́jọ́ míní ngalé múké ꞌdĩ kí ị́jọ́ agá pírí.
13 Ãdróŋá, gẹ̃rị̃ mídrị̂ kí ãlá ru.
Ãdróŋá íngõ icó dó adrulé ũkpó ru Ãdróŋá ãmadrị̂ áni nĩ yã?
14 Mi Ãdróŋá ị́jọ́ ụ̃sụ̃táŋá ru rĩ kí idélépi rĩ ꞌi,
mi ũkpõ mídrị̂ iꞌda ꞌbá kí agá.
15 Drị́ ũkpó mídrị̂ sĩ mí anzé ándrá ꞌbá mídrị̂ kí rá,
ꞌdĩ kí drị̃lẹ́ka Yãkóꞌbõ ꞌbadrị́ Yụ̃sụ́fụ̃ be rĩ kî.
16 Ị̃yị́ mĩrĩ drị̂ ndre kí mi rá Ãdróŋá,
ndre kí mi rá ãzíla idé kí ụ̃rị̃ sĩ,
ị̃yị́ kị́rị́ rĩ yã kí ụ̃rị̃ sĩ yã-yã.
17 Ụ̃rụ́ꞌbụ̃ fẽ kí uzogó ní ꞌdịlé,
ụ̃rụ́ꞌbụ̃ agá ãvi la ụ̃kpẹ̃ nĩ,
ꞌé mídrị́ ãvi drị̂ kí ãngũ ji wókõ pírí agá.
18 Ãvi mídrị̂ ụ̃kpẹ̃ dó, âre ĩꞌdi lọ̃bị́yọŋá agá.
Ãvi mídrị̂ la ãngũ ji ụ̃nọ́kụ́ drị̃ gá,
ụ̃nọ́kụ́ aya ru ãzíla ũyã-ũyã.
19 Íri acị́lé mĩrĩ agâsĩ,
íri acị́lé ị̃yị́ ãmbógó rĩ kí agâsĩ,
wó ꞌbá ãzí icó ími pámvú ndrelé ku.
20 Íce ándrá ꞌbá mídrị̂ kí drị̃ cécé ꞌbá kãbĩlõ ucélépi rĩ ꞌbã kãbĩlõ kí drị̃ cejó rĩ áni,
drị́ mídrị̂ sĩ ífẽ Mụ́sã ce kí ándrá ꞌbá mídrị̂ kí drị̃ Ãrọ́nị̃ be rá.