78
Ãdróŋá ꞌi ãzíla ꞌbá ĩꞌdidrị̂ kî
1 ꞌBá mádrị̂ ĩmi are ímbátáŋá mádrị̂ ꞌi,
ãzíla ĩꞌbã ásị́ ị́jọ́ mání jọlé rĩ kí drị̃ gá.
2 Ma mụ ị́jọ́ ũndũwã ãni la kí jọlé
ãzíla ma mụ ị́jọ́ ru zị̃lépi zị̃zị̃ ídu rĩ kí icélé,
3 ị́jọ́ ãmaní arelé rá, ãmaní nị̃lé cé,
ãzíla ị́jọ́ ãmã áyị́pịka ꞌbã kí lũlé ãmaní rĩ kî.
4 Ãma icó kí zị̃lé anzị ãmadrị̂ ꞌbaní ku;
ãma anzị mụlé tịlé drị̃lẹ́ gâlé rĩ ꞌbaní
ũkpõ Úpí drị́ ãzíla ị́jọ́ ĩꞌdiní ngalé ãmbógó ĩꞌdidrị̂ ꞌbaní
rĩ kí vú nze ị́jọ́ ụ̃sụ̃táŋá ru ĩꞌdiní ngalé rĩ kí abe.
5 Fẽ ãzị́táŋá ꞌbá Ịsịrayị́lị̃ drị̂ ꞌbaní
ãzíla fẽ ãzị́táŋá anzị tịlé Yãkóꞌbõ ꞌbã drị̃lẹ́ ru rĩ ꞌbanî.
Imbá ãmã áyị́pịka kí sĩ
ãzị́táŋá ĩꞌdidrị̂ kí imbájó anzị ĩꞌbadrị̂ ꞌbanî,
6 ị́jọ́ ꞌdĩ sĩ anzị mụlé tịlé drị̃lẹ́ gâlé rĩ kí sĩ kí nị̃ angájó ĩꞌbadrị́,
anzị drị̃ tịlé ku rĩ kí
vâ sĩ amụ́ kí lũlé anzị ĩꞌbadrị̂ ꞌbanî.
7 ꞌDã ꞌbã ũngúkú gá, anzị ĩꞌbadrị̂ kí dó sĩ ásị́ ꞌbã Ãdróŋá drị̃ gá
ãzíla icó kí sĩ ị́jọ́ ĩꞌdiní idélé rĩ kí ãvĩlé ku,
wó ụ́ꞌdụ́ pírí sĩ kí dó sĩ ãzị́táŋá ĩꞌdidrị̂ kí vú ũbĩ.
8 ꞌBa adru kí cécé áyị́pịka kî áni ku
kí ándrá ꞌbá drị̃ ũnzí ãzíla ꞌbá ꞌbá arelépi ku la kî,
ꞌbá ásị́ ꞌbãlépi Ãdróŋá drị̃ gá ku
ãzíla ĩꞌdi ãꞌị̃lépi ku la kî.
9 Ãsĩkárĩ Ịfụrayị́mụ̃ drị́ ru itúlépi ụ́sụ ãzíla ꞌé trũ rĩ
mvu kí apálé ụ́ꞌdụ́ ãꞌdị́drị̂ sĩ rá.
10 Mba kí ị́jọ́ ĩꞌbaní tị icíjó Ãdróŋá be rĩ tã ku;
gã kí ãzị́táŋá ĩꞌdidrị̂ kí tãmbalé úmgbé.
11 Ãvĩ kí ị́jọ́ ĩꞌdi ꞌbã idélé rĩ rá,
ãzíla tálí ándrá ĩꞌdiní idélé ĩꞌbaní ndrelé cé rĩ kí rá.
12 Idé tálí kí ãngũ mgbọ Mị̃sị́rị̃ drị́ Zõwánĩ gá
ꞌdĩ sĩ ĩꞌbã áyị́pịka kí dị̃ ndre sĩ la.
13 Awa ị̃yị́ mĩrĩ drị̂ ãzíla agụ kí ala gâsĩ,
fẽ ị̃yị́ mĩrĩ drị̂ní pá tulé bõrõ áni.
14 Ĩtụ́ sĩ, ri kí drị̃ ꞌdelé ụ̃rụ́ꞌbụ̃ ị́dị́ŋá áni rĩ sĩ,
ãzíla ị́nị́ sĩ ri kí drị̃ ꞌdelé ãcí ị́dị́ŋá áni rĩ sĩ.
15 Asi írã kõtórõ agá ꞌdãá rĩ kí ꞌa mgbọ,
ãzíla fẽ ĩꞌbaní ị̃yị́ calépi rá rĩ angájó ị̃yị́ kị́rị́ rĩ agá.
16 Fẽ ị̃yị́ ní agbẹ́jó írã agá,
ị̃yị̂ dị dó sĩ cécé mĩrĩ áni.
17 ꞌBá ri kí mụlé drị̃ gá ị́jọ́ izaŋá trũ Ãdróŋá rụ́,
ri kí drị̃ ũnzĩ idélé Ãdróŋá Ụrụgá Ãndânĩ rĩ ụrụꞌbá gá kõtórõ agâlé.
18 Drị̃ ũnzĩ sĩ ri kí Ãdróŋá ụ̃ꞌbị̃lé círí ru kí asị́ gá,
íná ĩꞌbaní nalé rĩ aꞌị́jó ũkpõ sĩ.
19 Unu kí Ãdróŋá ụrụꞌbá gá jọ kí,
“Ãdróŋá icó ãmaní íná fẽlé kõtórõ agá ꞌdâ ku.
20 Ĩꞌdi ãndá, gbã írã ꞌi ãzíla ị̃yị́ agbẹ́ ala gá rá,
ị̃yị́ dịlépi ꞌdĩ tị̃ ãmbógó ru.
Wó icó ꞌbá ꞌbaní ãkónã fẽlé rá yã,
jõku icó ĩzá fẽlé ꞌbá ĩꞌdidrị̂ ꞌbaní rá yã?”
21 Úpí Ãdróŋá la mụ ị́jọ́ ĩꞌbaní jọlé ꞌdĩ arelé ꞌbo, uꞌá dó ĩꞌbaní ũmbã sĩ;
ĩꞌdi ꞌa ve ãcí áni anzị Yãkóꞌbõ drị̂ ꞌbaní ãzíla
adrã ĩꞌdidrị̂ angá ꞌbá Ịsịrayị́lị̃ drị̂ kí drị̃ gá,
22 ãꞌdusĩku ãꞌị̃ kí ándrá Ãdróŋá ꞌi ku
jõku tị̃ kí ándrá ásị́ ị́jọ́ Ãdróŋá la kí pa rá rĩ drị̃ gá ku.
23 Wó Ãdróŋá fẽ ãzị́táŋá ụ̃rụ́ꞌbụ̃ ní ụrụgâlé
ãzíla ụ̃rụ́ꞌbụ̃ nzị̃ ru tị rá.
24 Ãdróŋá fẽ mãnã ní zõjó ꞌbá ꞌbaní nalé,
ãzíla fẽ ĩꞌbaní ãkónã angájó ꞌbụ̃ gâlé.
25 ꞌBá na kí ãkónã mãlãyíkã ꞌbadrị̂;
fẽ ĩꞌbaní ãkónã pírí ĩꞌbã kí lẽlé nalé rĩ kí rá.
26 Fẽ ũlí ní lijó angájó ị̃tụ̂ ꞌbã ãfũ agâlé ru,
ce ũlí ándrâlé ru rĩ ꞌbã drị̃ ũkpõ ĩꞌdidrị̂ sĩ.
27 Fẽ ꞌbá ĩꞌdidrị̂ ꞌbaní ãriŋa kí ĩzá ru zõlé pụ́trụ́ áni angájó ꞌbụ̃ gâlé,
ãriŋa ũꞌbí ꞌbaní zõjó cécé cínákí mĩrĩ tị gá rĩ áni.
28 Fẽ ãriŋa ꞌde kí kámbĩ ĩꞌbadrị̂ agá ágágá
hémã ĩꞌbadrị̂ kí andre gâsĩ trộkị́lịrị.
29 Ị́jọ́ ꞌdĩ sĩ ꞌbá na kí ãzíla aga kí rá;
Ãdróŋá fẽ ãko ĩꞌbaní vị́ talé rĩ kí ĩꞌbaní rá.
30 Wó ĩꞌbaní drĩ ãko ĩꞌbã kí vị́ talé rĩ na agá ꞌdâ,
ĩzâ drĩ adru agá kí tị gá ꞌdâ ꞌdĩ,
31 ũmbã Ãdróŋá drị̂ acá ĩꞌba rụ́
ụꞌdị́ dó sĩ ãgọbị ĩꞌbadrị́ ũkpõ trũ,
anzị Ịsịrayị́lị̃ drị́ kãrị́lẹ̃ rú rĩ kí rá.
32 Ị́jọ́ ꞌdĩ kí agâ sĩ pírí, ꞌbá rĩ kí ị́jọ́ ũnzí idélé;
ị́jọ́ ĩꞌdi ꞌbã idélé ụ̃sụ̃táŋá ru ꞌdĩ kí agâ sĩ pírí tị̃ kí ásị́ drị̃ la gá ku.
33 Ị́jọ́ ꞌdĩ sĩ Ãdróŋá ụꞌdị́ dó kí rá acá kí dó ãzị́ kóru
ãzíla ídri ĩꞌbadrị̂ ga tré ụ̃rị̃ ãmbógó la sĩ.
34 Ãdróŋá drĩ dó ãzí rĩ kí ụꞌdị́ ꞌbo, ãzí acelépi cí rĩ kí dó ĩꞌdi ndrụ̃ rá,
kí ásị́ uja ãzíla kí Ãdróŋá ndrụ̃ ásị́ pírí sĩ.
35 Agá kí ị́jọ́ Ãdróŋá ĩꞌdi ꞌbá kí tãmbalépi
ãzíla Ãdróŋá Ụrụgá Ãndânĩ ándrá kí anzélépi nĩ rĩ rá.
36 Wó ꞌdã ꞌbã ũngúkú gá kí ị́jọ́ jọ tị sĩ,
ị́jọ́ ĩꞌba kí jọlé rĩ kí pírí ĩnzõ rú.
37 Fẽ kí ru ĩꞌdiní ásị́ mgbã sĩ ku;
kí vâ ãꞌị̃táŋá kọ́lị tị icíma ĩꞌbadrị́ Ãdróŋá trũ rĩ gá.
38 Wó ĩꞌdi ásị́ ị̃gbẹ́ ru ꞌbá ĩꞌdidrị̂ ꞌbanî,
ũtrũ ĩꞌbã ị́jọ́ ũnzí kí rá
ãzíla ị̃lị̃kị̃ kí ku.
Ĩꞌdi sáwã pírí gá ũmbã ĩꞌdidrị̂ umvi vúlé
ãzíla inga ũmbã ĩꞌdidrị̂ ku.
39 Ị́jọ́ ꞌdĩ kí ꞌbá ụrụꞌbá ãrí trũ rĩ kî rĩ agá dó ĩꞌdiní,
kí cécé ãlụ́kụ́kụ̃ lilépi ãgõlépi ku rĩ áni.
40 Sáwã pírí sĩ ri kí ĩꞌdi tị gãlé kõtórõ agâlé úmgbé;
pá alé ũꞌbí ru rĩ kí ĩꞌdiní ásị́ ãzá fẽlé!
41 Ri kí ĩꞌdi ụ̃ꞌbị̃lé ị̃dị́-ị̃dị́,
ãzíla fẽ kí ásị́ ãzá Ãdróŋá Ãlá Ịsịrayị́lị̃ drị̂ní.
42 Ãvĩ kí ị́jọ́ ũkpõ ĩꞌdidrị́ ãmbógó rĩ drị̃ gá rá,
ãzíla ụ́ꞌdụ́ ándrá ĩꞌdiní kí apájó mẹ́rọ́ꞌbá ĩꞌbadrị̂ kí drị́gá rĩ drị̃ gá rá.
43 Ãvĩ kí ị́jọ́ ị́jọ́ ụ̃sụ̃táŋá ru ãzíla tálí ru ĩꞌdiní idélé Mị̃sị́rị̃ gâlé,
ãzíla ị́jọ́ ụ̃sụ̃táŋá ru ãngũ gbayi Zõwánĩ drị̂ agá rĩ kí drị̃ gá rá.
44 Uja ị̃yị́ kí ãrí ru,
ꞌbá Mị̃sị́rị̃ rú rĩ icó kí dó sĩ ị̃yị́ ĩꞌbadrị́ áꞌbụ agá rĩ kí mvụlé ku.
45 Pẽ ụ́nụ́nụ́ ũꞌbí kí tị kí drĩdríŋĩ gá kí tilé,
ãzíla ụ́drụ́gọ́ kí ãngũ ĩꞌbadrị̂ izalé.
46 Fẽ ụ̃ꞌbụ iza kí ãkónã ĩꞌbadrị̂ kí rá;
úmbí na kí ãkónã ĩꞌbadrị́ amvụ́ agá rĩ kí rá.
47 Pẽ sí tị sĩ zãbíbũ ĩꞌbadrị̂ kí cojó
ãzíla iza úlúgó ife ĩꞌbadrị̂ kí sí filépi ndrú-ndrú rĩ sĩ.
48 Ụꞌdị́ tị́ ĩꞌbadrị̂ kí sí sĩ
ãzíla kãbĩlõ ĩꞌbadrị̂ kí ãvi sĩ.
49 Fẽ ũmbã ĩꞌdidrị́ ãcíꞌbíríto rĩ ní ꞌdejó kí ụrụꞌbá gá,
adrã ĩꞌdidrị̂, ásị́ veŋá ãzíla ũcõgõ
amụ́ kí dó mãlãyíkã lị́kị̃ ajílépi rĩ kí abe.
50 Pẽ ũmbã ĩꞌdidrị́ ũkpó trũ rĩ tị;
fẽ ꞌbá Mị̃sị́rị̃ drị̂ ꞌbaní ũdrãjó rá,
ụꞌdị́ kí jụ́wẹ̃ sĩ.
51 Ụꞌdị́ anzị kãjãní ꞌbá Mị̃sị́rị̃ rú rĩ ꞌbadrị̂ kí lị́cọ́ ãlu ãlu agâ sĩ,
ụꞌdị́ ãgọbị anzị kãjãní lị́cọ́ Hámũ drị̂ agá rĩ kí rá.
52 ꞌDã ꞌbã ũngúkú gá, ce dó ꞌbá ĩꞌdidrị̂ kí drị̃ cécé kãbĩlõ ũꞌbí rĩ kí áni; ꞌbã kãbĩlõ kí drị̃ ꞌdejó rĩ áni;
ꞌde kí drị̃ kõtórõ agâ sĩ múké múké.
53 ꞌDe kí drị̃ múké múké, idé kí dó sĩ ụ̃rị̃ sĩ ku;
wó mĩrĩ iti mẹ́rọ́ꞌbá ĩꞌbadrị̂ kí mũꞌdũ.
54 Ãdróŋá agụ ꞌbá Ịsịrayị́lị̃ drị́ ꞌdĩ kí kpere ãngũ ĩꞌdidrị́ ãlá rĩ gá,
ãngũ ꞌbé ꞌa ru ĩꞌdi ꞌbã ꞌdụlé ũkpó ĩꞌdidrị̂ sĩ rĩ gá.
55 Adro sụ́rụ́ kí kí drị̃lẹ́ gá ꞌdãá
ãzíla awa ãngũ ĩꞌbadrị̂ kí ĩꞌbaní ãwítã rú;
iri sụ́rụ́ ĩꞌdidrị́ Ịsịrayị́lị̃ kí lị́cọ́ ĩꞌbadrị̂ kí agá.
56 Wó ꞌbá ꞌdĩ ụ̃ꞌbị̃ kí Ãdróŋá ꞌi
ãzíla gã kí Ãdróŋá Ũkpó ꞌDị́pị tị arelé úmgbé
mba kí vâ ãzị́táŋá ĩꞌdidrị̂ kí tã ku.
57 Kí ị́jọ́ kí idé mũlũmbẽ sĩ cécé áyị́pịka kí áni ãzíla kí ãꞌị̃táŋá kọ́lị,
útị̃ ásị́ kí drị̃ gá ku cécé ụ́sụ tĩlé bẽdẽ-bẽdẽ ꞌé gbẹlépi ku rĩ áni.
58 Inga kí ũmbã ĩꞌdi ásị́ gá ĩꞌbã kí ãngũ ãdroŋa ĩꞌbaní ĩnzõ rú rĩ kí ị̃nzị̃jó rĩ kí sịjó rĩ sĩ,
inga kí ãjã Ãdróŋá ásị́ gá ãdroŋa ĩꞌbã ãni ĩnzõ rũ rĩ kí sĩ.
59 Ãdróŋá la mụ ị́jọ́ ꞌdĩ kí arelé ꞌbo ũmbã na ĩꞌdi trẹ̃yị́,
gã dó sĩ ꞌbá Ịsịrayị́lị̃ drị̂ kí kpítã úmgbé.
60 Aꞌbe dó ãngũ sĩ ĩꞌdi ị̃nzị̃jó Sị́lọ̃ gá rĩ rá,
hémã ĩꞌdiní sĩ uꞌájó ꞌbá ĩꞌdidrị̂ kí drĩdríŋĩ gá rĩ.
61 Fẽ mẹ́rọ́ꞌbá ãmadrị̂ pa kí Sãndụ́kụ̃ tị icíma drị̂ rá,
fẽ ícétáŋá ĩꞌdidrị́ dị̃zã drị̂ mẹ́rọ́ꞌbá kí drị́gá.
62 Ãdróŋá acá dó ũmbã sĩ ꞌbá ĩꞌdidrị̂ ꞌbaní,
Fẽ ꞌbá ĩꞌdidrị̂ kí ụlị́lé ménéŋá sĩ.
63 Ụꞌdị́ anzị kãrị́lẹ̃ rú rĩ kí ãꞌdị́gá rá,
ãzíla ꞌbá izonzi kí ĩgbãlépi ũkú ru la kí dó ꞌdáyụ.
64 Ãtalo ĩꞌbadrị̂ kí ụ́ꞌdị́ kí ménéŋá sĩ,
ãzíla ãwụzị ĩꞌbadrị̂ kí âꞌị̃ ĩꞌbaní awálé ku.
65 ꞌDã ũngúkú gá Úpí angá dó cécé angá ꞌbã rĩ ụ́ꞌdụ́ gá rĩ áni,
cécé ꞌbá ũkpó uꞌálépi ãyĩkõ sĩ íwá sĩ rĩ áni.
66 Dro ĩꞌdi bã mẹ́rọ́ꞌbá kí vúlé,
ãzíla fẽ ĩꞌbaní drị̃nzá ukólépi ku la.
67 Gã anzị Yụ̃sụ́fụ̃ ꞌbã drị̃lẹ́ka rú rĩ kí úmgbé;
pẽ vâ sụ́rụ́ Ịfụrayị́mụ̃ drị̂ ku.
68 Pẽ sụ́rụ́ Yụ́dã drị̂ kí kẹ̃jị́ gá
ãzíla ꞌbé Zị̃yọ́nị̃ drị́ ĩꞌdiní lẽlé rĩ áyụ.
69 ꞌDãá sị dó sĩ jó ĩꞌdi ị̃nzị̃jó rĩ ụrụgá ꞌbụ̃ áni,
idé ĩꞌdi ũkpó ru cécé ĩꞌdi ꞌbã ụ̃nọ́kụ́ idéjó rĩ áni.
70 Pẽ dó sĩ ãtíꞌbó ĩꞌdidrị́ Dãwụ́dị̃ ꞌi,
umve ĩꞌdi angájó ãngũ kãbĩlõ kí ucéjó rĩ agâlé,
71 ĩꞌdiní kãbĩlõ kí ucé agá ásé agâlé
ãzíla ꞌbã ĩꞌdi ꞌbá ĩꞌdidrị́ Yãkóꞌbõ drị̂ kí drị̃lẹ́ gá úpí ru
ꞌbá Ãdróŋá drị̂ kí ucélé.
72 Dãwụ́dị̃ mba kí tã ásị́ mgbã sĩ
ãzíla ce kí drị̃ ãlị̃gọ̃ sĩ.