96
Ãdróŋá úpí Ũkpó ꞌdị́pị
1 Ĩngo úngó úꞌdí la Úpí nî!
Ĩngo úngó Úpí ní ꞌbá pírí ụ̃nọ́kụ́ drị̃ gá ꞌdĩ!
2 Ĩngo úngó Úpí ní ãzíla ĩmi ịcụ́ ĩꞌdi.
Ụ́ꞌdụ́ pírí sĩ ĩmi ũlũ ị́jọ́ mgbã ĩꞌdidrị́ ĩꞌdiní sĩ ãma pajó rĩ.
3 Ĩmi ũlũ dị̃zã ĩꞌdidrị̂ ꞌbã ị́jọ́ sụ́rụ́ pírí ꞌbanî,
ĩmi ũlũ ị́jọ́ ụ̃sụ̃táŋá ru ĩꞌdiní idélé rĩ kí ꞌbá pírí ꞌbanî.
4 Ãꞌdusĩku Úpí ĩꞌdi ãmbógó ru wó, lẽ ị́cụ́ ĩꞌdi ásí pírí sĩ;
lẽ úfẽ ĩꞌdiní ãrútáŋá ãdroŋa pírí ꞌbaní ãndânĩ,
5 ãꞌdusĩku ãdroŋa sụ́rụ́ ãzí ꞌdĩ ꞌbadrị̂ kí pírí ãdroŋa idélé drị́ sĩ la kî,
wó Ãdróŋá ꞌbã ꞌbụ̃ kí nĩ.
6 Dị̃zã kí ãmbõgõ be ce kí andre la nĩ;
ũkpó kí ũnĩ be ga kí jó ĩꞌdi ị̃nzị̃jó rĩ agá tré.
7 Ĩmi ịcụ́ Úpí ꞌi ĩmi ꞌbá pírí ụ̃nọ́kụ́ drị̃ gá ꞌdĩ,
Ĩmi ịcụ́ Úpí ꞌi, ũkpõ ãzíla dị̃zã ĩꞌdidrị̂ sĩ!
8 Ĩmi ịcụ́ Úpí ꞌi ũkpõ ãzíla dị̃zã rụ́ ĩꞌdidrị̂ drị̂ sĩ!
Ĩmi ají ídétáŋá ĩmidrị̂ kí ãzíla ĩmi afí lị́cọ́ ꞌa ĩꞌdidrị̂ agá!
9 Ĩmi ị̃nzị̃ Úpí ꞌi ũnĩ ãzíla ãlã ĩꞌdidrị̂ sĩ;
lẽ ụ̃nọ́kụ́ ꞌbã yã pírí yã-yã ĩꞌdi drị̃lẹ́ gá.
10 Ĩlũ sụ́rụ́ pírí ꞌbaní, “Úpí ĩꞌdi Úpí ꞌi.
Ụ̃nọ́kụ̂ tu pá ũkpó ru ãngũ ĩꞌdidrị̂ gá, icó ru ayalé ku;
ĩꞌdi ꞌbá pírí kí ị́jọ́ lị trũtrũ.”
11 Lẽ ãko pírí ꞌbụ̃gá rĩ ꞌbã uꞌá kí ãyĩkõ sĩ, lẽ ụ̃nọ́kụ̂ ꞌbã uꞌá ãyĩkõ sĩ!
Lẽ mĩrĩ ꞌbã ịcụ́ kí ĩꞌdi ãko ala gá rĩ kí abe pírí.
12 Lẽ amvụ́ ãzíla ũri ãla gá rĩ kí abe ꞌbã uzá kí ãyĩkõ gá!
Lẽ ife mị̃rị́ agá rĩ ꞌbã ịcụ́ kí ĩꞌdi.
13 Kí dó mụ úngó ngolé Úpî drị̃lẹ́ gá sáwã ĩꞌdiní amụ́jó rĩ sĩ.
Ĩꞌdi mụ amụ́lé ụ̃nọ́kụ̂ ị́jọ́ lilé,
ĩꞌdi ụ̃nọ́kụ́ ị́jọ́ lị ị́jọ́ pịrị sĩ,
ãzíla ĩꞌdi ꞌbá kí ị́jọ́ lị ị́jọ́ mgbã sĩ.