97
Ãdróŋá ĩꞌdi Úpí ũkpó ꞌdị́pị ꞌi
1 Úpî ĩꞌdi úpí ru nĩ! Lẽ ụ̃nọ́kụ́ ꞌba uꞌá ãyĩkõ sĩ!
Ĩmi ꞌbá uꞌálépi ị̃yị́ tị gá ꞌdĩ, ĩmi uꞌá ãyĩkõ sĩ.
2 ✡97:2 Ãzị́táŋá Amviŋá 4:11; 5:22Ụ̃rụ́ꞌbụ̃ ịnị ãnzị la ce kí ĩꞌdi cí,
Ũpĩ ĩꞌdidrị̂ tu pá ị́jọ́ mgbã drị̃ gá ãzíla ị́jọ́ lịŋá pịrị rĩ drị̃ gá.
3 Ãcí la mụ ĩꞌdi drị̃lẹ́ gá
ãzíla ĩꞌdi mẹ́rọ́ꞌbá ĩꞌdidrị̂ kí ivé wókõ pírí gâsĩ.
4 Ãvi ĩꞌdidrị̂ la ụ̃nọ́kụ̂ ji,
ụ̃nọ́kụ̂ la ndre la ãzíla ĩꞌdi ru aya ayâ.
5 Úpî drị̃lẹ́ gá, ꞌbé kí aká cécé ísékísé áni,
Úpí ụ̃nọ́kụ́ drị̃lẹ́ gá pírí rĩ drị̃lẹ́ gá.
6 ꞌBụ̃ kí ị́jọ́ ũlũ ị́jọ́ ãlá ĩꞌdidrị̂ drị̃ gá
ãzíla ꞌbá pírí kí dị̃zã ĩꞌdidrị̂ ndre.
7 ꞌBá pírí ãdroŋa ĩnzõ rú rĩ kí ị̃nzị̃lépi rĩ
ãzíla adrulépi ãfó ru ãdroŋa ĩnzõ rú rĩ kí sĩ kí drị̃nzá ịsụ́ rá.
Lẽ ãdroŋa pírí ꞌbã ị̃nzị̃ kí Úpí ꞌi.
8 ꞌBá Zị̃yọ́nị̃ drị̂ are kí rá ãzíla uꞌá kí dó ãyĩkõ sĩ,
ãzíla ꞌbá tọ̃rọ́mẹ́ Yụ́dã drị̂ agá rĩ kí ãyĩkõ sĩ,
ị́jọ́ Úpí míní lịlé rĩ kí sĩ,
9 ãꞌdusĩku Úpí mi ụ̃nọ́kụ́ drị̃ gá ꞌdâ ãndânĩ,
ãmbõgõ sĩ índẽ ãdroŋa pírí kí rá.
10 Lẽ ꞌbá Úpî lẽlépi rá rĩ ꞌbã ngụ̃ kí ị́jọ́ ũnzí rĩ ũnzí,
ãꞌdusĩku Úpí la ꞌbá ĩꞌdidrị́ ãꞌị̃táŋá trũ rĩ kí tã mba
ãzíla ĩꞌdi kí upa angájó ꞌbá ũnzí rĩ kí drị́gá rá.
11 Dị̃zã la dị̃ ꞌbá ãlá rĩ kí drị̃ gá,
ãzíla ꞌbá ásị́ mgbã trũ rĩ kí ãyĩkõ ịsụ́ rá.
12 Ĩmi uꞌá ãyĩkõ sĩ Úpí agá ĩmi ꞌbá ãlá ꞌdĩ,
ãzíla ĩfẽ ĩꞌdiní ãwãꞌdĩfô rụ́ ĩꞌdidrị́ ãlá rĩ sĩ.