103
Lẽtáŋá Ãdróŋá drị̂
1 Ásị́ mádrị̂ mí ịcụ́ Úpí ꞌi,
ídri mádrị̂ agá pírí, ma ĩꞌdi rụ́ ãlá ri ịcụ́,
2 Ásị́ mádrị̂ mí ịcụ́ Úpí ꞌi,
ãzíla mí ãvĩ jõ ị́jọ́ ụ̃rọ̃drị́ Úpí drị̂ drị̃ gá ku.
3 Ĩꞌdi ị́jọ́ ũnzí mádrị̂ kí trũ pírí rá
ãzíla adrí ãyánĩ mádrị̂ kí pírí rá.
4 Apá ma drã agá rĩ sĩ rá,
wi mání sụ̃sụ́ lẽtáŋá drị̂ ãzíla andré áma ízákĩzã rá.
5 Fẽ mání agalé ãko múké rĩ kí sĩ,
Ị́jọ́ ꞌdĩ sĩ ma dó sĩ ũkpó kãrị́lẹ̃ drị̂ isụ́ úꞌdí ru cécé yụ́kụ́ drị̂ áni.
6 Úpí la ị́jọ́ mgbã rĩ nga,
ãzíla ĩꞌdi hákĩ ꞌbá ĩkpãlé ĩkpã-ĩkpã rĩ ꞌbadrị̂ kí fẽ rá.
7 Úpí lũ ị́jọ́ ĩꞌdi ꞌbã ụ̃tị̃lé rĩ kí Mụ́sã nĩ rá,
ãzíla iꞌda ị́jọ́ ĩꞌdiní mụlé ngalé ũkpó ĩꞌdidrị̂ sĩ rĩ kí ꞌbá Ịsịrayị́lị̃ drị̂ ꞌbaní rá.
8 Úpí ꞌbã ásị́ ị̃gbẹ́ ru ãzíla lẽtáŋá uyaŋá kóru rĩ trũ.
Ũmbã rụ ĩꞌdi gbõrú ku ãzíla lẽtáŋá ĩꞌdidrị̂ ukó ku.
9 Úpí uzá ãma drị̃ gá sáwã pírí sĩ ku,
ũmbã rụ ĩꞌdi jãꞌdâ ku.
10 Fẽ ãmaní drị̃rịma calépi rĩ sĩ ị́jọ́ ũnzí ãmaní ngalé rĩ kí vúŋá sĩ ku,
ãzíla ị́jọ́ ũnzí ãmaní idélé rĩ ꞌbã ãrígó tị ĩꞌdiní lẽlé rĩ áni ku.
11 Cécé ụ̃rụ́ꞌbụ̃ bã adrujó vũ drị̃lẹ́ gá ụrụgá rĩ áni;
ị́jọ́ ꞌdĩ sĩ lẽtáŋá ĩꞌdidrị̂ ĩꞌdi ãmbógó ru ꞌbá ĩꞌdi rulépi rá rĩ ꞌbaní.
12 Cécé ãngũ ị̃tụ́ ꞌbã agájó rĩ ꞌbã adrujó rá-rá ru ãngũ ị̃tụ́ ꞌbã ꞌdejó rĩ be rĩ áni,
Úpí wụ̃ vâ ị́jọ́ ũnzí ãmadrị̂ kí ãma rụ́ ꞌdâ rĩ sĩ álị́.
13 Cécé átẹ́pị ꞌbã adrujó ásị́ ị̃gbẹ̃ sĩ anzị ĩꞌdidrị̂ ꞌbarụ́ rĩ áni,
Úpí ꞌbã ásị́ vâ ị̃gbẹ́ ru ꞌbá ĩꞌdi rulépi rĩ ꞌbaní,
14 ãꞌdusĩku nị̃ ũkpó ãkõ ãmadrị̂ cé;
ãma pụ́trụ́ rĩ ꞌbã ị́jọ́ la agá ĩꞌdiní rá.
15 Ídri ꞌbádrị̂ ĩꞌdi ãlị́ŋá ru cécé ásé drị̂ áni,
cécé mãwụ́wã ásé agá rĩ kí áni, ãma zo rá ãzíla ũdrã rá.
16 Ãlụ́kụ́kụ̃ drĩ li la ꞌbo, ĩꞌdi ãvĩ rá,
ꞌbá ãzí ndre ĩꞌdi ĩdị́ ku.
17 Wó Úpí ꞌbã lẽtáŋá la adru ꞌbá ĩꞌdi rulépi rĩ ꞌbaní jãꞌdâ,
mũkẽ ĩꞌdidrị̂ la ru ị̃drị̃ anzị ꞌbã anzị ꞌba rụ́,
18 ãzíla ꞌbá mgbã tị icíma ĩꞌdidrị̂ ãꞌị̃lépi rá,
ꞌbá ãzị́táŋá ĩꞌdidrị̂ kí vú ũbĩlépi rĩ ꞌbanî.
19 Úpí ꞌbã úmvúke ĩꞌdidrị́ ũpĩ drị̂ ꞌbụ̃gá ꞌdãá ũkpó ru,
ãzíla ũpĩ ĩꞌdidrị̂ la ãngũ na pírí nĩ.
20 Ĩmi ịcụ́ Úpí ꞌi, ĩmi mãlãyíkã ũkpó trũ ꞌdĩ,
ĩmi ãzị́táŋá ĩꞌdidrị̂ kí vú ũbĩlépi ꞌdĩ,
ãzíla ị́jọ́ ĩꞌdi ꞌbã jọlé rĩ kí arelépi ꞌdĩ.
21 Ĩmi mãlãyíkã ãꞌdị́ ꞌdịlépi ꞌdĩ, ĩmi ịcụ́ Úpí ꞌi,
ĩmi ãtíꞌbó ĩꞌdidrị́ ị́jọ́ ĩꞌdi ꞌbã lẽlé rĩ ngalépi ꞌdĩ.
22 Ãko pírí Úpí ꞌbã ꞌbãlé ꞌdĩ, ĩmi ịcụ́ Úpí ꞌi
ãngũ pírí ĩꞌdiní sĩ ũpĩ najó rĩ kí agá.
Ásị́ mádrị̂ mí ịcụ́ Úpí ꞌi.