104
ꞌBá ãma ꞌbãlépi rĩ ịcụ́jó
1 Ásị́ mádrị̂, mí ịcụ́ Úpí ꞌi,
Úpí, Ãdróŋá mádrị̂, mi ãmbógó ru;
Ísụ̃ ími rụꞌbágá rụ́ kụma kí dị̃zã be.
2 Ísụ̃ ími rụꞌbágá dị̃zã cécé bõngó áni.
Mí aja ꞌbụ̃ cécé hémã ajajó rĩ áni,
3 ísị lị́cọ́ mídrị̂ ụrụgá ụ̃rụ́ꞌbụ̃ ị̃yị́ fẽlépi rĩ kí drị̃ gá.
Mí idé ụ̃rụ́ꞌbụ̃ kí gárĩ mídrị́ ãꞌdi drị̂ kî ru
ãzíla mi unga ụ́pụ́pị́ ãlụ́kụ́kụ̃ drị̂ sĩ.
4 Ãlụ́kụ̃ kí ị́jọ́ mídrị̂ kí ují nĩ,
ãcí ꞌbã idraká tị kí ãtíꞌbó mídrị̂ kî.
5 Íꞌbã ụ̃nọ́kụ̂ ꞌbã ị̃ndụ́ mi ꞌi,
ị́jọ́ ꞌdĩ sĩ icó ru ayalé ku.
6 Mí aku ụ̃nọ́kụ̂ mĩrĩ ãmbógó rĩ kî sĩ cécé bõngó áni;
ị̃yị́ iti kí ꞌbé kí rá.
7 Ụ́ꞌdụ́kọ́ míní uzájó rĩ sĩ, ị̃yị́ mvu kí apálé rá,
ụ́ꞌdụ́kọ́ mídrị́ ãvi drị̂ áni rĩ sĩ, afụ kí ru apálé rá,
8 dị kí ꞌbé kí drị̃gâ sĩ,
dị kí vụ̃rụ́ áꞌbụ kí agâsĩ,
ãngũ pẽlé ĩꞌbaní sĩ ãsị̃jó rĩ gá.
9 Íꞌbã ĩꞌbaní lõkókõrí ĩꞌbaní icólé drị̃ alịlé ku la,
ị̃yị́ icó ụ̃nọ́kụ́ drị̃ akulé ị̃dị́ ku.
10 Mi ị̃yị́ fẽ agbẹ́lé kídí kí agâlé ꞌdịlé áꞌbụ kí agâ sĩ,
kí dị ꞌbé kí drĩdríŋĩ gâsĩ.
11 Kí ị̃yị́ fẽ ãnãkpá ásé agá rĩ ꞌbaní pírí,
ị̃yị́ vị́ kãyĩnõ ásé agá rĩ ꞌbadrị̂ kí dejó.
12 Ãríŋá ꞌbụ̃gá rĩ kí jõrõvũ sị ife ị̃yị́ tị gá rĩ kí sị́gá;
kí úngó ngo ife ꞌbã kénĩ kí sị́ gâsĩ.
13 Ĩꞌdi uzogó ũsũ ꞌbé kí drị̃ gá angájó lị́cọ́ ĩꞌdidrị́ ꞌbụ̃gâlé rĩ gá,
ãzíla ụ̃nọ́kụ́ la ga tré ãyĩkõ sĩ ãzị́ míní ngalé rĩ sĩ.
14 Mi ásé kí fẽ zolé tị́ ꞌbaní ị̃rẹ́bị́ ru,
mi ãko dụlépi rĩ kí fẽ ꞌbá ꞌbaní ayúlé,
mi kí fẽ ãkónã ũfũlé angájó ụ̃nọ́kụ́ gá,
15 mi ãyĩkõ ajị́ kí ásị́ gá wáyĩnĩ sĩ,
mi ãdu fẽ ĩꞌbã mẹ́lẹ́tị ní sĩ dị̃jó dị̃-dị̃,
ãzíla ãkónã fẽ ĩꞌbaní ũkpó ịsụ́jó.
16 Ife Úpí drị̂ kí ị̃yị́ ịsụ́ ĩyõ rú,
ꞌdĩ kí márígó ife ĩꞌdi ꞌbã salé Lébãnõnĩ gá rĩ kî.
17 Ãriŋa kí jõrõvũ ĩꞌbadrị̂ kí sị kí sị́gá ꞌdãá;
kápáya kí jõrõvũ ĩꞌbadrị̂ kí sị ife ãzo rĩ kí sị́gá.
18 Ãnãkpá ásé agá indrélépi ị̃ndrị́ áni rĩ kí uꞌá ꞌbé ãzo mbílíko rĩ kí sị́gá,
ãzíla kílẽ kí ru ụ̃zị̃ ụ̃jị́gọ́ ꞌbé sị́ gá rĩ ká agâ sĩ.
19 Ĩmbá la áyi kí uja nĩ,
ãzíla ị̃tụ́ nị̃ sáwã ĩꞌdiní sĩ ꞌdejó rĩ cé.
20 Íꞌbã ị́nị́ mi ꞌi, ãngũ la dó sĩ nị,
ãnãkpá ásé agá rĩ kí ãfũ acị́lé.
21 Kẹ̃mị̃ kí ãkónã ĩꞌbaní rĩ ndrụ̃ áwáŋá trũ
ãzíla kí ãkónã ĩꞌbadrị̂ ịsụ́ angájó Ãdróŋá drị́.
22 Ị̃tụ́ drĩ agá ꞌbo, kí gõ vúlé,
kí ru ula vụ̃rụ́ ĩꞌbadrị́ ụ̃jị́gộ agá ꞌdãá.
23 ꞌBá kí mụ ãzị́ ĩꞌbadrị̂ kí agâlé,
kí ãzị́ nga kpere ĩndró gá.
24 Úpí, mí idé ãko ídri trũ rĩ kí ũꞌbí ru!
Mí idé kí pírí ũndũwã sĩ;
ụ̃nọ́kụ́ gá tré ãko ndú ndú míní ũꞌbãlé rĩ kí sĩ.
25 Mĩrĩ ĩꞌdi ꞌdã, ĩꞌdi ãmbógó ru ãzíla mgbọ ru,
ga tré ãko míní ũꞌbãlé ãmbógó ãzíla níríŋá
ídri trũ rĩ kî sĩ, ícó kí lãlé ku.
26 Mẹ́lị̃ kí ací drị̃ la gâsĩ, ꞌdõlé ãzíla ꞌdã gâlé,
ãzíla ãnãkpá ãmbógó rĩ kí avá alagá ꞌdãá.
27 Tị̃ kí pírí ásị́ ími drị̃ gá,
míní sĩ ãkónã ĩꞌbaní nalé rĩ kí fẽjó sáwã múké rĩ gá.
28 Ídrĩ ĩꞌbaní fẽ la ꞌbo,
kí ũkũnã la,
ídrĩ ími drị́ nzị̃ ꞌbo,
kí aga tré ãko múké rĩ sĩ.
29 Ídrĩ ími mẹ́lẹ́tị zị̃ cí,
kí idé ụ̃rị̃ sĩ,
ídrĩ kí ává nze ꞌbo
kí ũdrã rá ãzíla kí gõ pụ́trụ́ gá vúlé.
30 Ídrĩ úríndí mídrị̂ tị pẽ ꞌbo,
ídri úꞌdí la la ru ꞌbã nĩ,
ãzíla mi ídri úꞌdí la fẽ ụ̃nọ́kụ̂ ní.
31 Lẽ dị̃zã Úpí drị̂ ꞌbã mụ drị̃ gá jãꞌdâ,
lẽ Úpí ꞌba uꞌá ãyĩkõ sĩ ãko ĩꞌdiní idélé rĩ kí sĩ.
32 Úpí drĩ ãngũ andré ụ̃nọ́kụ́ gá ꞌdõlé, ụ̃nọ́kụ̂ la yã yã,
drĩ ꞌbé kí aló, ãcíkã la ãfũ nĩ.
33 Ma Úpí ní úngó ngo áma ásị́ pírí sĩ,
Ma Ãdróŋâ ịcụ́ ụ́ꞌdụ́ mání adrujó ídri rĩ kí sĩ pírí.
34 Lẽ ị́jọ́ mání ũrãlé rĩ ꞌbã adru kí ãyĩkõ rú mínî,
ma ãyĩkõ mádrị̂ ịsụ́ Úpí agá.
35 Wó lẽ î ị̃lị̃kị̃ ꞌbá ị́jọ́ ũnzí ngalépi rĩ kí ụ̃nọ́kụ́ drị̃ gá ꞌdâ rá,
lẽ ꞌbã ãvĩ ụ̃nọ́kụ́ drị̃ gá ꞌdâ rá.
Ásị́ mádrị̂, mí ịcụ́ Úpí ꞌi.
Ícụ́ Úpí ꞌi.