130
Ãdróŋá zịjó sĩ ãzãkoma aꞌị́jó
1 Úpí, ma ími zị sĩ áma ãzãkojó ũcõgõ mádrị́ ãmbógó rĩ sĩ.
2 Úpí, mí are drĩ ụ́ꞌdụ́kọ́ mádrị̂ ꞌi!
Mí ajá ími bị́lẹ́
sĩ mãmálá mání ꞌbãlé rĩ arejó!
3 Úpí, ídrĩ tá ị́jọ́ ũnzí ãmadrị̂ kí ũsĩ vũ gá la,
ãꞌdi la tá ru pa ị́jọ́ lịŋá gá nĩ yã?
4 Wó mi ꞌbá trũ ị́jọ́ ũnzí sĩ rá,
ꞌbá kí dó sĩ ími ụ̃rị̃ ị́jọ́ ꞌdĩ sĩ.
5 Ma Úpî ũtẽ áma ásị́ pírí sĩ,
ma ásị́ tị̃ ị́jọ́ ĩꞌdidrị̂ drị̃ gá.
6 Áma ásị́ la Úpî tẽ
ndẽ ꞌbá ãngũ aga tẽlépi ꞌbã ụ̃ꞌbụ́tị tẽjó ri rá,
ndẽ ꞌbá ãngũ aga tẽlépi ꞌbã ụ̃ꞌbụ́tị tẽjó ri rá.
7 Ĩmi ꞌbá Ịsịrayị́lị̃ drị́ ꞌdĩ, lẽ ĩtị̃ ásị́ Úpî drị̃ gá,
ãꞌdusĩku lẽtáŋá Úpí drị̂ ukó ku,
ãzíla ĩꞌdi ụ́ꞌdụ́ pírí sĩ ĩmi unze ị́jọ́ ũnzí kí agá rĩ sĩ rá.
8 Ĩꞌdi mụ ꞌbá Ịsịrayị́lị̃ drị̂ kí unzelé
ị́jọ́ ũnzí ĩꞌbadrị̂ kí agá pírí rá.