144
Ãwãꞌdĩfô fẽjó Ãdróŋá ní ãꞌdị́ ndẽŋá sĩ
1 Ma ími ịcụ́ Úpí, mi ꞌbá áma tã mbalépi rĩ ꞌi!
Mi áma imbá sĩ ãꞌdị́ ꞌdịjó,
ãzíla mi áma itú sĩ ãꞌdị́ ꞌdịjó.
2 Mi Ãdróŋá áma lẽlépi ãzíla áma tãmbalépi rĩ ꞌi,
mi bõrõ ũkpó mádrị̂ ꞌi ãzíla ꞌbá áma palépi rĩ ꞌi,
mi gọ́bẹ́rẹ́ mádrị́ mání sĩ áma zị̃jó rĩ ꞌi,
mi sụ́rụ́ ãzí rĩ kí ndẽ rá ãzíla mi kí ꞌbã áma pálé gá.
3 Úpí, ꞌbá ĩꞌdi mgbã rĩ gá ãꞌdu míní sĩ ị́jọ́ ũrãjó drị̃ la gá,
míní sĩ ị́jọ́ ũrãjó ꞌbá ꞌbá ru rĩ drị̃ gá?
4 ꞌBá ĩꞌdi cécé ũlí áni;
ụ́ꞌdụ́ ĩꞌdidrị̂ kí alị cécé índréléndri áni.
5 Úpí, ị́nzị̃ ꞌbụ̃ ꞌbã tị mgbọ, ãzíla mí asị́ dó sĩ vụ̃rụ́ ꞌdõlé;
mí aló ꞌbé kí, ãcíkã ꞌbã fũ dó sĩ.
6 Mí ãpẽ ãvi tị ãzíla mí iré mẹ́rọ́ꞌbá mídrị̂ kî;
mí agbẹ́ ꞌé mídrị̂ kí ãzíla ꞌbã apá kí dó sĩ.
7 Mí asú ími drị́ vụ̃rụ́ ꞌdõlé angájó ꞌbụ̃ gâlé,
mí ánzé ma ãzíla ípa ma angájó ị̃yị́ kị́rị́ rĩ agâlé,
ípa ma ũkpó ãmị́yọ́ŋá ꞌbadrị̂ agá,
8 kí tị ga tré ĩnzõ sĩ,
ãzíla kí ĩnzõ alị́ drĩ kí táni ũyõ na agâ.
9 Ãdróŋá, ma míní úngó úꞌdí la ngo;
ma míní úngó co ụ̃ꞌdị́ ĩbáká mụdrị́ rĩ sĩ.
10 Mi ũpi kí fẽ ãꞌdị́ ndẽlé mi ꞌi,
ãzíla mi ꞌbá ándrá ãtíꞌbó mídrị́ Dãwụ́dị̃ palépi ménéŋá sị́ gá rĩ ꞌi.
11 Ípa ma mẹ́rọ́ꞌbá mádrị́ ásị́ ũnzí ri kí drị́ gá
ípa ma ũkpó ãmị́yọ́ŋá ꞌbadrị̂ agá,
kí tị ga tré ĩnzõ sĩ,
ãzíla kí ĩnzõ alị́ drĩ kí táni ũyõ na agâ.
12 ꞌDã ꞌbã ũngúkú gá, lẽ anzị ãmadrị̂ kí ꞌbã kãrị̃lẹ̃
ꞌba adru kí cécé ũri zolépi ũkpó ru rĩ kî áni.
Ífẽ izonzị ãmadrị̂ ꞌba adru kí cécé ị́dị́ŋá
sĩ jó úpí drị̂ ꞌbã kónã ꞌbãjó ũnĩ-ambamba rĩ áni.
13 Ífẽ ĩrá ãmadrị̂ ꞌbã ga kí tré
ãkónã ũví pírí sĩ.
Kãbĩlõ ãmadrị̂ ꞌbã tị kí kãlãfe sĩ álĩfũ álĩfũ,
ꞌbã adru kí álĩfũ mụdrị́ sĩ drị̃ gâlé ru.
14 Tị́ ãmadrị́ ꞌa trũ rĩ ꞌba adru kí wẽwẽ rú,
mvaka la ꞌba aꞌbé kí ku jõku ꞌbã ũdrã kí ku.
Ífẽ áwáŋá ũcõgõ drị̂ ꞌbã adru gẹ̃rị̃ ãmadrị̂ kí agá ku.
15 Drị̃lẹ́ba sụ́rụ́ ị́jọ́ ꞌdĩ ꞌbaní ru ngajó ĩꞌbaní rá rĩ ꞌbanî;
drị̃lẹ́ba sụ́rụ́ Ãdróŋá ĩꞌbadrị̂ ꞌbã adrujó Úpí ꞌi rĩ ꞌbanî.