145
Úngó ịcụ́ŋá drị̂
1 Ma mụ ími ịcụ́lé Ãdróŋá ãzíla úpí mádrị̂,
ma ími rụ́ ịcụ́ jãꞌdâ ãzíla jãꞌdâ.
2 Ma ími ịcụ́ ụ́ꞌdụ́ pírí,
ma ími rụ́ ịcụ́ jãꞌdâ ãzíla jãꞌdâ.
3 Úpí ĩꞌdi ãmbógó ru ãzíla icó rá sĩ ĩꞌdi ịcụ́jó;
ꞌbá ãzí icó ãmbõgõ mídrị̂ ụ̃ꞌbị̃lé ku.
4 ꞌBá áyi ãlu agá ri kí drụ́zị́ ị́jọ́ míní ngalé rĩ kí ịcụ́ ꞌbá áyi ãzí rĩ agá rĩ ꞌbanî,
kí ãzị́ mídrị́ ũkpó míní ngalé ꞌdĩ kí vú nze.
5 Kí ị́jọ́ jọ dị̃zã ãzíla ãmbõgõ mídrị̂ drị̃ gá,
ãzíla ma mụ ị́jọ́ ũrãlé ãzị́ ụ̃sụ̃táŋá míní ngalé rĩ kí drị̃ gá.
6 ꞌBá kí mụ ị́jọ́ jọlé ị́jọ́ ụ̃sụ̃táŋá ru míní ngalé ri kí drị̃ gá,
ãzíla ma mụ ị́jọ́ ũlũlé ãmbõgõ mídrị̂ ꞌbã drị̃ gá.
7 Kí mụ ị́jọ́ ũlũlé mũkẽ mídrị̂ kí drị̃ gá pírí,
ãzíla kí mụ úngó ngolé ụ́ꞌdụ́kọ́ ụrụgá sĩ ãlãpĩtĩ mídrị̂ drị̃ gá.
8 Úpí ĩꞌdi lẽtáŋá ru ãzíla ĩꞌdi ꞌbã ásị́ ị̃gbẹ́ ru.
Ũmbã rụ ĩꞌdi gbõrú ku ãzíla lẽtáŋá ĩꞌdidrị̂ ukó ku.
9 Úpí ĩꞌdi múké ꞌbá pírí ꞌbanî;
ĩꞌdi ásị́ ị̃gbẹ̃ ru ãko pírí ĩꞌdiní ũꞌbãlé rĩ ꞌbanî.
10 Úpí, ãko pírí míní ũꞌbãlé ri kí mụ ími ịcụ́lé,
ãzíla ꞌbá mídrị́ ãlá ri kí mụ ími rụ́ ingalé ụrụgá.
11 Kí ị́jọ́ jọ dị̃zã sụ́rụ́ mídrị̂ drị̂ ꞌbã drị̃ gá,
ãzíla kí ị́jọ́ ũlũ ũkpõ mídrị̂ ꞌbã drị̃ gá,
12 ị́jọ́ ꞌdĩ sĩ ꞌbá pírí kí dó sĩ ị́jọ́ nị̃ ị́jọ́ míní ngalé ãmbogo rĩ kí drị̃ gá
ãzíla dị̃zã sụ́rụ́ mídrị̂ drị̂ be cé.
13 Sụ́rụ́ mídrị̂ ĩꞌdi sụ́rụ́ jãꞌdâ rĩ ꞌi
ãzíla ũpĩ na áyi ãlu ãlu sĩ.
Úpí, mi ị́jọ́ pírí míní azịlé rĩ kí tãmba rá
ãko pírí míní idélé rĩ ꞌbaní ími ásị́ ịgbẹ́ ru.
14 Úpí la ꞌbá aꞌdélépi vũ gá rĩ kí inga pírí ụrụgá
ãzíla ĩꞌdi ꞌbá ãvụ̃lépi tẹ́rị́ ãnzị sĩ ꞌdĩ kí ĩdrẽ ụrụgá rá.
15 ꞌBá pírí kí ãngũ ndre mírụ́ sĩ ãzãkoma ũtẽjó,
ãzíla mi ĩꞌbaní ãkónã fẽ sáwã múké rĩ gá.
16 Ídrĩ ími drị́ nzị̃ mgbọ rú,
mi ãbị́rị́ ãzíla ị̃yị́vị́ ãko pírí ídri trũ rĩ ꞌbadrị̂ kí fẽ ukólé rá.
17 Úpí ĩꞌdi ãlá ru ị́jọ́ pírí ĩꞌdiní ngalé ri kí agá,
ãzíla ĩꞌdi lẽtáŋá ru ị́jọ́ pírí ĩꞌdiní ngalé ri kí agá.
18 Úpí ĩꞌdi ãnirú ꞌbá pírí ĩꞌdi umvelépi rĩ kí andre gá,
ĩꞌdi ꞌbá pírí ĩꞌdi umvelépi ị́jọ́ mgbã sĩ rĩ ꞌbarụ́ ãnirú.
19 Ĩꞌdi ꞌbá ĩꞌdi rulépi rĩ ꞌbaní ị́jọ́ ĩꞌbã ásị́ ꞌbã lẽlé rĩ kí idé rá;
ĩꞌdi kí áwáŋá are rá ãzíla ĩꞌdi kí pa rá.
20 Úpí la ꞌbá pírí ĩꞌdi lẽlépi rĩ kí tãmba rá,
wó ĩꞌdi ꞌbá ũnzí ri kí ị̃lị̃kị̃ pírí rá.
21 Úpí, ma ị́jọ́ sĩ ími ịcụ́jó rĩ kí jọ,
Lẽ ãko pírí míní ũꞌbãlé ꞌdĩ ꞌbã ịcụ́ kí ími rụ́ ãlá rĩ
jãꞌdâ ãzíla jãꞌdâ.