146
Ãdróŋá ꞌbá palépi rĩ ịcụ́jó rĩ
1 Ĩmi ịcụ́ Úpí ꞌi,
ásị́ mádrị̂ mí ịcụ́ Úpí ꞌi!
2 Ma mụ Úpî ịcụ́ŋá trũ drị̃ gá ídri mádrị̂ agá pírí,
ma úngó ngo Ãdróŋá mádrị̂ ní ụ́ꞌdụ́ mání adrujó ídri rú rĩ kí agá pírí.
3 Ítị̃ ásị́ ꞌbá drị̃lẹ́ ru rĩ kí drị̃ gá ku,
ꞌbá ꞌbá ru rĩ icó ími palé ku.
4 ꞌBá drĩ drã ꞌbo, ĩꞌdi ru uja ũdrí ru,
ụ́ꞌdụ́ ꞌdã sĩ ị́jọ́ ĩꞌdiní itúlé ri kí ãsị̃ rá.
5 ꞌBá Ãdróŋá Yãkóꞌbõ drị̂ ꞌbã sĩ ĩꞌdi ãzãkojó nĩ rĩ ĩꞌdi drị̃lẹ́ba rú,
ãzíla ꞌbá ru ãtị̃lépi Úpí Ãdróŋá ĩꞌdidrị̂ rụ́ rĩ ĩꞌdi drị̃lẹ́ba rú.
6 Ũꞌbã ꞌbụ̃ kí ụ̃nọ́kụ́ be nĩ,
mĩrĩ kí ãko ala gá rĩ kí abe pírí nĩ.
Ĩꞌdi ụ́ꞌdụ́ pírí sĩ ũyõ ĩꞌdiní nalé rĩ ꞌbã tãmba rá.
7 Ĩꞌdi ị́jọ́ lị ꞌbá ĩkpãlé ĩkpã-ĩkpã ri kí drị̃ gá múké
ãzíla ĩꞌdi ꞌbá ãbị́rị́ trũ rĩ ꞌbaní ãkónã fẽ rá.
8 Úpí la ꞌbá mịfị́ ãzụ̃lépi cí rĩ kí mịfị́ nzị̃ rá.
Ĩꞌdi ꞌbá uꞌdelépi vũ gá rĩ kí inga ụrụgá rá.
Úpí lẽ ꞌbá ãlá ri kí rá.
9 Úpí la ꞌbá ãmị́yọ́ŋá ru uꞌálépi ãmadrị́ ãngũ gá rĩ kí tãmba rá,
ĩꞌdi ãwụzị kí tãmba ĩmvú kí abe rá,
wó mba ꞌbá ũnzí rĩ kí tã ku.
10 Úpí la adru úpí ru jãꞌdâ.
Zị̃yọ́nị̃, Ãdróŋá mídrị̂ la mụ ũpĩ nalé sáwã pírí sĩ nĩ.
Ĩmi ịcụ́ Úpí ꞌi!