2
Kwany Kiin Nyoge Amahn
1 2:1 2:1-9; Mat 5:45; Tiihy 10:34; Rom 2:11; 10:12; Gal 2:6; Epi 6:9; Klo 3:25; 1Pii 1:17 Jo'a wa ka nahgu nyoge maa ayiiho yi lum Ruohdho Jeacuu Kriihjto ge wiihe amoar ni, kiin nyoge keá kwanyu kejea ngaa moogo beer kedea ngaa moogo raaj. 2 Koohbo kejea nyoge ariow ge abeehn ka maa amahd yaa akuud yaa yiihoe yea. Ngaa moogo kiin gen beehda ngaa maa alony maa angaab waare maa awuob me ngien gen teeg kedea lweede ne joadh gihr dhaahb. Kedea ngaa moogo beehda ngaa maa angoohng maa angaab jwaahd waare. 3 Nea ngaan angaab waare maa awuob e ne ngahyi ke loro urubi yihre kobi, “Ngaan duohng, kar piih maa awuob e man. Piihi.” Abea yihr ngaan angaab jwaahd waare yih urubo yihre kobi, “Nyieh, cuung kari noono wale beehn ne piih piny yi ngoom kan thaahdh tiena,” 4 ngahda e kiinu akwanyu kedea rogu ayugu ne nyoge me kihmo abea giih paru ge giih anyoohne ne?
5 2:5 1:9; Luk 6:20-21; 1Kor 1:26-28; Any 2:9 Lihngu gihn jo'a maa anhyaara. Ngahda Juog akwany nyoge maa angoohng me giih wiih piny tooro yihr gen kedea uyuge gen ne nyoge me lony gen beehda yiiho ne? Kedea ngahda Dhaahr Juog gihn akob Juoge kejea ngo ucube yihr yaa anhyaare, ucube yihr gen ne? 6 Yaa angoohng koohm gen adhahlu ne cohg! Ngahda yaa alony ge ne kaahn wun ke cing nyooro ne? Ngahda ge naa yaa piej wun ne kedh nyum ruohdhe yi lug ne? 7 Ngahda ge ne rob giih me reje ke nying Jeacuu ngaan adoohngu ne yaae ne?
8 2:8 Mat 22:39; Rom 13:9 Yih unahg ngaa maa atiihy gihn maa athiir me ne cohg nea loohng ruohdh gihn agweed yi kitaab Juog naa,
“Nhyaar wadu wa ka nhyaari rihi,”
ngo be dhahli. 9 2:9 2:1 Abea nea ke dhe yoohn gihn niidi e ne poji kiin nyoge pojo e adhemuohm ayugi kedea yih ke kihmo wa mar yaa toar loohnge. 10 2:10 Mat 5:19; Gal 3:10; 5:3 Bang gihn keehd maa amagi loohnge cang unahge ke nye gihn me thiin mee e naa atoari yihdh gen, e beehd loohng nu cang ge naa atoari. 11 Bang gihn ngaa anaa arob ngo kea, “Kea ngaa kaab dhaago,” anaa arubo thiow kea, “Kea ngaa nahg dhaano.” Nea yih kuu akahbo ke dhaago abea dhaano e naa anahgi, e poohde loohng yea atoari.
12 2:12 1:25 Nea yih urubo, kea rubi kedea tiihyi neehn nyoge me kedh ne kihmo ke loohng me cub laahw wihj. 13 2:13 Mat 5:7; 7:1; 18:32-35 Rubi kedea tiihy wa gihn nu bang gihn ukihm me cwihny be duu caahn yug Juoge yihr ngaan cwihnye be duu caahn rih dhaano. Duu cwihny caahn en ne wiihe ne maalo yihr ukihm.
Yiiho Caahdh Kaa Tiihj Me Beer
14 2:14 Mat 7:21; 1Jon 3:17 Jo'a gihn e ne konye nea dhaano ukoohbo kea yihre ne yiiho abea giih me beeye me tiihye tooro? Wahye be rom kwaad yiiho me wa gihn nu ke boadho. 15 2:15 Mat 25:35-36 Koohbo kejea umiiho wale nyemiiho maa ngad yiiho yihre tooro waare kedea gihn me came. 16 Nea dhaano kiinu urubo yihre kea, “Yih ucaahdhi ke yoohm rihi. Yih uyihdi ke waaro me wumi rihi yi koohyo kedea cam uyoadi.” Nea giih nu ge arob ngaan nu yihr umen wale nyemen maa ngad yiiho abea gihn me cube tooro ne kony ngo, e ngaan nu akony gihn? 17 2:17 Gal 5:6, 16, 22-24; 1Jon 3:18 Wa gihn nu thiow, yiiho e keede, nea be caahdh kaa tiihy giih beeye e ngo beehda yiiho me koany gihre tooro.
18 Abea ngo ubeehr ngaa mooge kea, “Mari yihri ne yiiho abea mara yihra ne giih me beeye maa atiihya.”
Kea noono nyoadh yiiho gihri yihra ge yea tooro tiihy giih me beeye, e yiiho gihra ke dhe yoohn tiihy giih me beeye ngo nyoadha nyoadho yihri. 19 *2:19 Atiihb ukeehg: Mat 8:29; Mak 1:24 Ngahdu kejea yiiho kejea Juog beehda acielo cog e ne boadh wun? Keehd atiihb ukeehg e ayiih gene kejea Juog beehda acielo cog kedea ge utudo yihre kwaade tooro.
20 Yih ngaa maa gihn ge wiihi atahg! Yih daahd gihn me nyoadh ngo yihri kejea yiiho me yea tooro tiihy giih me beeye, ngo yiiho me gihr nyinge tooro ne? 21 2:21 Rom 4:1-5, 13-16, 19-22; Judea 11:17 Ngahda kuowo Abraahm anaa anyoadh Juoge ne ngaa maa abiohgrwaal ke en ke nying gihn atiihye naa aceje waahde ke naah ne gihr kweehr yihr Juog wiih kar lam ne? 22 Kuu aniidu kaa abeehn yiiho gihre kedea giih atiihye ucaahdh gene tiehd kedea e naa kaa abeehn gihn atiihye unienge ne cohg utoor gihn me daage ke nying gihn atiihye. 23 2:23 Rom 4:3 E naa kaa abeehn gihn agweed yi kitaab Juog upahdhe kare. Agweed naa,
“Abraahm Juog ayiihe ke cwihnye acielo
e naa kaa anyoadh Juoge en ne ngaa maa abiohgrwaal ke Juog.”
Kedea maa acuohne ne gom Juog. 24 Kuu aniidu kejea dhaano ngo nyoadh Juoge naa abiohgrwaal kaa nying tiihy giih me beeye abea padh ke nying yiiho e keede!
25 2:25 Mat 1:5; Judea 11:31 Ke dhe yoohn ni, Raahb ge anahg ajaba, ngo anaa anyoadh Juoge naa abiohgrwaal ke nying gihn atiihye naa acube kar budo yihr yaa Yijarael giih anaa aoohr ne leng kedea unyoadhe ke dhe yooh moogo yihr gen ne aay. 26 2:26 2:17, 20 Yiiho neehn kuohm. Nea wahy a'aay oogo rih kuohm e athow. Wa gihn nu yiiho me be tiihy giih me beeye ngo athow thiow.
2:1 2:1 2:1-9; Mat 5:45; Tiihy 10:34; Rom 2:11; 10:12; Gal 2:6; Epi 6:9; Klo 3:25; 1Pii 1:17
2:5 2:5 1:9; Luk 6:20-21; 1Kor 1:26-28; Any 2:9
2:8 2:8 Mat 22:39; Rom 13:9
2:9 2:9 2:1
2:10 2:10 Mat 5:19; Gal 3:10; 5:3
2:12 2:12 1:25
2:13 2:13 Mat 5:7; 7:1; 18:32-35
2:14 2:14 Mat 7:21; 1Jon 3:17
2:15 2:15 Mat 25:35-36
2:17 2:17 Gal 5:6, 16, 22-24; 1Jon 3:18
*2:19 2:19 Atiihb ukeehg: Mat 8:29; Mak 1:24
2:21 2:21 Rom 4:1-5, 13-16, 19-22; Judea 11:17
2:23 2:23 Rom 4:3
2:25 2:25 Mat 1:5; Judea 11:31
2:26 2:26 2:17, 20