M̃aki Nasumo Nap̃a Pol Siri
Pa Pan Li Nalelagaena Wa Lala Nae Garu
KOREN
Visayuena Na Tusi Nene
Komp̃asnen suniena plas na tusi nini
M̃aki nini pe m̃aki nap̃a Pol siri p̃esa pa le Koren lala nap̃a amlelaga e Yesu. Naga siria komin suri viowa la sum̃alu e maliena kiena li nalelagaena lala nae yo nene, a naga mligan m̃aki nene pano vena iila la. Sum̃are nae Koren, Pol ke narui naga siaria.
Koren naga pupia pulkumali kiena le Kris lala, a naga pe pulkumali keviu na lepas nap̃a Akaea, nap̃a m̃eke vatanon p̃arin sup̃e nae pulkumali nap̃a Rom. Yaru nae purvanua tap̃ena la moki asike e nene, a naga pe yo tai nap̃a yaru la akila ruruia e lepas na kilaen yum̃aena na tauluen kilavaru, a e lepas na kiela p̃elaga marua. A la nae yo nene, kiela kia keviu e yomarava komin kiela p̃elaga viowa lala, a nap̃a amlotun ke ntewa tap̃ena la moki.
Suri kerkeviu la nap̃a Pol pisayu e kiena m̃aki nene sanini:
pisayu napiowaena nap̃a yaru na sum̃are la asum̃a amlip̃ere la,
pisayu napiowaena nap̃a la asum̃a akila ke piowa pa sira lala,
pisayu mrapa mesmesu na kilaen talovaena,
pisayu sanape e kinanena lala nap̃a akila kup̃ap̃aena e la van nono lala.
Pol pisatam̃e kiela naviuniena lap̃asa, ana pian la e mrapa mesmesu na taveveena vena alotu e sum̃are, amio m̃areraena la nap̃a Ninuna Wa sum̃a kian ke pa sum̃are, a nalelagaena nap̃a yaru kilia mali sina. Pol kila meraravan nap̃a kilia ruru napiowaena a navisatam̃eena la nene, a pisa meraravan nap̃a lologena wo kiena Yesu ga kilia la navisatam̃eena van la.
E marana na keviu 13 pisayu p̃elaga na sinesien Ntewa amio yaru lala nap̃a pe p̃elaga keviu tai nap̃a yeririna kiena Ntewa la monar atavevea. Marana na keviu nene pe komp̃asnen visena kiena ne Ntewa nap̃a yaru la akilia ruruia, taulu komp̃as tap̃ena la na tusi nene.
Komp̃asnen tusi lap̃as nene
Visena p̃esa 1:1-9
Yaru na sum̃are la amlip̃ere la 1:10—4:21
Mlamulena viowa amio sira, a malena na mratava 5:1—7:14
Li nalelagaena lala a yaru la nap̃a amninue Ntewa 8:1—11:1
Mrapa kiena li nalelagaena lala na kilaena lotena 11:2—14:40
Yesu mali sina, a yaru la nap̃a alelaga ea akilia amali 15:1-58
Nalaena nap̃a aligan va van li nalelagaena lala nae Yutea 16:1-4
Visena maro 16:5-24
1
Pol sike gar Episas, pisa pokolulagi pona pokolemalo pan le Koren lala
Erau nae Koren lala, inu nap̃a nesiri m̃aki nini pim̃asu pan amiu, inu Pol, nap̃a Ntewa sinenan sape neimi neve nalologena tai kiena narina Yesu Kristo, ana pio inu, pisirlua inu vena nouarar yum̃aena na sanini.
Nesike e yo nini nemio kieta erau Sostinis, ana imimi lua mepisa pokolulagi pona pokolemalo pan amiu punu ga, Yum̃aena 18:1nae sum̃are kiena ne Ntewa e pupia pulkumali nene Koren. Kam ke narui nap̃a Ntewa pio amiu aimi vena asikol amiu amio kiena li nalelagaena tap̃ena lala, nap̃a asutetae asike e yo punu ga nap̃a asum̃a amlotun naga nap̃a kila ita tepe wa ruru rui, nane Yesu Kristo nap̃a naga pe kieta Sup̃e ita punu ga.
Memlen mesape lemamiena kiena ne Yesu Kristo a sum̃are kiena ne Ntewa arimata sike amio amiu.
Pol pisa potena pa Ntewa komin naviawaena kiena le Koren lala
Nepisu sane pogos nap̃a apim ape yeririna kiena Kristo Yesu, lemamiena kiena ne Ntewa sum̃a miyum̃ae keviu e kiamiu malena lala, ana silaga nesum̃a nepisa potena keviu vanonia.
Asum̃a apim apo manene laa e lepas na visawalen Lologena Wo, a asum̃a apa ke metava e lepas na kiamiu nakiliaena, e m̃ena ga e lepas na p̃elaga wo tap̃ena make ga lala. Pogos nap̃a nepisu nene, nepisu sa ga kiau yum̃aena la nanua ne, nap̃a nepian amiu e Kristo, nagane sum̃a p̃ar ke pupia mrasa.
Nalaena lala pona nam̃areraena lala nap̃a Ninuna Wa sum̃a kian pan amiu, pe tai re nap̃a pe atol re poli wa, ana asum̃a amiyum̃ae ke amio la po pap̃isi, komin akirakiravan ke nap̃a kieta Sup̃e Yesu Kristo kilia imi m̃alivi si e yomarava nini.
Naga pe pimi m̃alivi re poli wa, ana naga sum̃a miila ita silaga vena tesum̃alu m̃arera tesum̃a ga vano-o tol legiena maro nene, ana pogos nap̃a tesum̃alu tese marana ne Ntewa, yoko naga kila nap̃a naviowaena tap̃atete se ita.
Ntewa pisaar rui vena viewo ita, ana tekilia towasine ruru kiena visena nene, komin naga pio ita, p̃ere ita sikol ita teve erau wo temio narina, Yesu Kristo kieta Sup̃e.
Sum̃are sum̃a mlilip̃ere pap̃isi
10 Kiau namratava lala kiena kieta Sup̃e Yesu Kristo, nesape neviun manene van amiu e kiena kia, nesape ap̃ionli nap̃a aim ave taaga sina. Popon ve alilip̃ere amiu re, ana amiu, kiamiu sitomena a kiamiu visena monar ve taaga.
11 Nepisa visena la nene, komin la nap̃a puna yaru nene Kloe apim apisawal pan inu asape veveyuena sike likan amiu, olai lala a vineu lala.
12  Yum̃aena 18:24Nemloge nap̃a amiu peve taaga asum̃a apisasa ke kiamiu p̃egas lala asape “In na yoko netaveve Pol,” pona tap̃ena sape “O, in na nepe kiena Apolos,” pona tai sina, sape “O, in na nesikol inu e p̃egas kiena Kep̃as.” A lap̃as sina, apisirilua si kiela narin p̃egas lap̃asia, akoven plan tap̃ena lala, asape “O, imimi ga mepe yeririna kiena Kristo lelaga.”
13 Ke, ya ne akila ke sanene? ?Pona popon tetewowa Kristo ve kinakinasa, teliwerwere e kiamiu narin p̃egas la sanene? ?Pona lap̃as asape ape kiau Pol, komin nap̃a asitom asape in ke narui nap̃a netelan inu e laki torovia vena netamalia la? ?Pona lap̃asia sinela p̃esan nap̃a akeela e kia kiena Yesu, ana asitom asape akeela e kiau kia?
14-16  Yum̃aena 18:8, Yum̃aena 19:29; Rom 16:23 1Kor 16:15Sanene, nepisu pogaga nap̃a nanua ne, pe nekee amiu re nena tai poli, Krispas ga lalua Kaias, pona sineu p̃esania, nekee m̃ena Step̃anas amio namratava puna, a pe nesitom̃al re si po laa rui, sane la ga nene, pona lap̃as sina? Nepisa sanene komin nap̃a visae nekee amiu ve moki, pona asum̃alu avis vilaveena rui, asum̃a avisave “!O, imimi ke narui, nap̃a Pol kee imimi e kiena kia!”
17 Sanene piowa ga, komin Kristo pe mligan inu re nepimin keen yar la poli, ana mligan inu nepimin lologonen kiena Lologena Wo van la. A pogos nap̃a nemlologon ke sanene, pe nekila re nemio m̃areraena na manmaruaena na yomarava nini poli, ana nekila amio m̃areraena na laki torovia kiena ne Kristo.
Kristo kipian manmaruaena a m̃areraena kiena ne Ntewa
18 Ana yaru la nap̃a asum̃a ataveve ke mrapa na kovioena, amloge visena na laki torovia kiena ne Kristo sane suri tai nap̃a pe sur korena ga pan la, ana ita la nap̃a tetaveve ke mrapa na malena, temloge visena na kiena laki torovia sane m̃areraena kiena ne Ntewa natamalia itaena.
19 Naga nene sane visena kiena Siriena Wa tai, nap̃a Ntewa pisa sanini, sape
“Yoko nowe plan manmaruaena kiena la nap̃a asitom ke asape ape manmarua,
yoko nekilawo nakiliaena kiena la nap̃a asitom ke asape akilia suria.” Ais 29:14
20 Ana visena nene pe lelaga pap̃isi, komin nap̃a tepisusu yomarava, tekilia teviun tevisa sanini tevisave awa kiena yaru na manmaruaena lala? Awa yaru la nap̃a apisuveve ruru kiliaena la nap̃a sike e tus lala? Awa yaru la nap̃a akilia avisayu ruru sitomena la nap̃a pe tap̃ena pe tap̃ena nap̃a tetelivi ke nagane? Tepisu sane peraga yo, a tepisu sane Ntewa kila manmaruaena lala na yomarava nini apimi sane sur wowe ga tai rui.
21 Ntewa ga pe manmarua, a e kiena manmaruaena, naga kila sane manmaruaena na yomarava nini tap̃atete kilia kila yaru kilia naga. Ana naga pisu sane po laa sane vena kila nap̃a kiamimi lologena lala, nap̃a yaru la asitom ke asape pe wowe ga, kilia tamalia yaru nap̃a mlelaga ea.
22 Le Yu la moki liu nap̃a yepela mavin lelagaena, asum̃a apisavisa ke asape visae mekila kile lala, yoko alelaga ga na wa, a le Krik la moki liu yepela mavin lelagaena, asum̃a apisa ke asape visae mevis mesmesu nena e kiela nakiliaena marua lala, yoko alelaga ga na wa, 23 ana pe mekila re sanene pan la poli. Memlologon ga Yesu pan la, mesape naga marewo kiela mlamulena viowa lala e laki torovia, ana visena nene, le Yu lala asape tap̃atete alelaga ea, a le Krik lala, asape visena na wowe ga nene.
24 Ana e lepas kiena ne la nap̃a Ntewa pio la vena ave kiena, sane ita, nap̃a ita lap̃as tepe le Yu a ita lap̃as tepe le Krik, pe sa re nene poli. Ve tesitom re tesape tevisu kile tap̃ena, komin nap̃a tepisu kilale m̃areraena kiena ne Ntewa e yum̃aena kiena Kristo rui, a ve tesitom re tevisave tetaveve kiliaena tap̃ena, komin nap̃a tepisu kilale namanmaruaena kiena ne Ntewa e mrapa kiena Kristo natamalia itaena.
25 Yaru tap̃ena lala apisu nap̃a Ntewa tam̃an Kristo mare e laki torovia, asitom ke asape Ntewa malumu ga, ana peraga. Sur nene kila meraravan kiena m̃areraena nap̃a m̃arera laa sane, taulu m̃areraena kiena yaru. Apisu sur nene, asitom asape Ntewa pe wowe ga, ana peraga, kipian kiena manmaruaena nap̃a po manene laa taulu manmaruaena kiena yaru.
26 Wolai a vineu lala, asitomyuli sane kam na sanapen nap̃a Ntewa pio amiu ape kiena? Pe ita moki re poli nap̃a e lepas na visuena na yomarava, ita temanmarua, pona tepe yaru m̃arera, pona tepe yaru kerkeviu lala. 27 Yomarava nini sape tepe wowe, ana Ntewa p̃ere ita, ana kome ita sum̃a kila plan ke manmaruaena na yomarava. Yomarava nini sape ita temalum ga, ana Ntewa p̃ere ita, ana kome ita, sum̃a kila ke m̃areraena na yomarava pito tano. 28 Yomarava nini pisa ke sape ita yaru korena ga nap̃a tesike tano, ana Ntewa p̃ere ita, ana kome ita, sum̃a kila ke pupia sur kerkeviu la pito tano, kila apimi ape suri korena.
29 Sanini, pe yar re nena tai nap̃a kilia visirlua naga e marana Ntewa, sape naga pe manmarua, pona naga m̃arera, pona naga yar tai ne, 30 ana Ntewa ga pe purp̃es nen kieta malena viu temio Kristo Yesu. Naga ke narui pitetalia Yesu pimi kilologia mrapa pan ita, ana Yesu pul plan ita, kila ita temesmesu e marana, kila ita tepimi tepe kiena yaru wa lala.
31 Ana komin suri ne nanene, tepisu nap̃a visena kiena ne Tusi Wa tai pe lelaga pap̃isi, nap̃a pisa sanini, sape
“Yaru nap̃a sinenan sape warwaria, naga kilia warwarian ga kieta Sup̃e.” Ser 9:24

1:2 Yum̃aena 18:1

1:12 Yum̃aena 18:24

1:14-16 Yum̃aena 18:8, Yum̃aena 19:29; Rom 16:23

1:14-16 1Kor 16:15