Elin̄olo ku
HEBELU
Okulimukisa
1
Amaywi a Nyambe Okubitela mwa Mwanaye
1 Mu tinako ni mu mikwa no kupula Nyambe kame ana kwambanga na sitetu naku kale okubitela mwa anuhi aye, 2 kono mu tinako tino no mamaneneno, kame aamba kwaaci mwa Mwanaye woyo abekile oku yola einu yonje, woyo kame mwa yonyene kame anatende elitunga. 3 Yokame woyo omonisa ekanya ya Nyambe ni sifekiso esi ali mwa sonyene, kame a shimba einu yonje mu liywi no maata aye. Aba ana kumana okukenisa eibi, sebeli oikala ku lyooko no silyo lya Nyambe no maata onje naku wilu.
Okuneneba kwa Mwana Nyambe
4 Kakuli yo bita amangeloi ku maata no kuneneba, simba elitina elyo ana biwi ni lya utokwa onene okubitelela oo. 5 Kakuli ku lingeloi li bine eli a naamba Nyambe nji,
“Tiwe Mwanange,
balelo kame nina futuka Sitowe.”
Simba kame libine elingeloi eli anambele Nyambe nji,
“Kame sani tende Sitowe,
mi yonyene kame satende Mwanaye.”
6 Mi kame aba sa lite mwanaye no mweli mu litunga, sebeli wamba nji,
“Mulesele amangeloi onje a Nyambe amu lumbeke.” 7 Nyambe ku mangeloi onje kame ana kwamba nji,
“Anyine otenda amangeloi aye emebo,
mi abika aye kame aatenda amalimi no mulilo.”
8 Kono kwa Mwanaye kame aamba nji,
“Olubona lowe, wene Nyambe, ni lwakuta oku no kwaabwa!
Omulamu wowe Mbumu no kuluka omulamu no mubuso wowe no kuluka.
9 Kame osinga esi no kuluka, mi kame otimbile eyi no kwaluka.
Abo cwale Nyambe, Nyambe wowe, kame ana waa wene
ni maati no ku wabelelwa onene,
kame oli beulu no alikani.”
10 Kame sebeli wamba nji,
“Weene, Mbumu, ku matatekelo kame ona kuumba elitunga,
mi amawilu kame atendile omusebezi no maoko owe.
11 Eyo yonje mba ibu, kono wene mbusiyala,
yonje mba ikulubala kanyi esikumango.
12 Mbu ipungu kanyi mukanjo,
mi mbai futuka.
Kono wene mbusiyala kanyi omo oikalele,
mi emyaka yowe ka itamba kubwa.”
13 Kono ku mangeloi libine anambele nji,
“Oikale ku lyoko lyange no silyo,
oku twala abo sa ni tende eiila yowe
esipula no malyatelo no makondo owe.”
14 Kasanji onje amangeloi kame atendile emebo eyi isebeleza Nyambe, eyi itumiwangwa oku sebeleza awo sawane okuyoyisiwa?