Elin̄olo lya Paulusi kwa
FILIMONI
Okulimukisa
Ebuka no kwibiba ya Filimoni kame ina kun̄oliwa kwa mutumiwa Paulusi (1.1). Paulusi kame ana kun̄ola ebuka eyi yoli mutolngo, okutalusa nji kame ana kwin̄ola luli yoli mu Loma. Nji kame ana kwikalanga mu Loma cwale kame ifanena okun̄oliwa mu myaka makumi atanu ni likumi limweya munyima (60) no kuleiwa kwa Kilesite, mi enako imweya eyo ana kun̄ola ebuka no Makolose.
Kame ana kun̄ola ebuka eyi ku mulume oisaniwa Filimoni. Filimoni neli omunjili no Keleke mane nakwikala naabika. Paulusi nakumun̄olela oku mukumbela nji alese okuba ekoto ku mubika waye Onesimasi woyo ona kushotoka kwa Filimoni. Ku mulawo no siloma, Filimoni nakwikala ni tukelo no kuba omubonda Onesimasi. Paulusi kame akutusisa amaywi no kukandimeka Filimoni okutambula Onesimasi kanyi omulumeli mane kame anahana nji Onesimasi apumenwe okusebeza ni Paulusi (1.13-14)
Emitwa no titaba
Paulusi kame akeeta Filimoni mu (1.1-3)
Cwale Paulusi kame akumbela musibaka sa Onesimasi nji Filimoni amutambule kanyi minaye mu ulumeli (1.4-21)
Paulusi kame amana mu kulimukisa omunahano waye no kupota mi kame atuma okukeeta kwaye (1.22-25)
1
1 Okutunda kwa mene Paulusi elipantiti mulibaka lya Kilesite Jesu ni Timoteya omwabetu,
Kame tun̄olela kwa wene Filimoni omusingiwa ni mwabetu mu musebezi 2 ni kwa Afiya mandetu ni Akipasi, omwabetu omusole ni keleke mu ndoo yowe.
3 Esishemo siikale nanyi ni kozo itunda kwa Nyambe Sitetu ni kwa Jesu Kilesite.
Elilato ni Tumelo ya Filimoni
4 Kame ni kutumelanga kwa Nyambe enako yonje aba nimi pulukanga mu titapelo tange. 5 Kakuli kame niyupa eyi no lilato ni tumelo eyo uli nayo kwa Mbumu Jesu ni kwa asikupumena onje a Nyambe. 6 Kame ni lapela nji okutabela no tumelo yowe ifanene okukulisa ezibo no uwa wetu wonje mwa Kilesite. 7 Kakuli kame niwabelelwe onene ni kombaombiwa okutunda mu lilato lyowe omwabange. Kakuli emicima no aasikupumena kame ninatende eyi no ubya mwa wene.
Paulusi yo Kumbela Filimoni nji Atambule wino Onesimasi
8 Abo cwale simba nji kame nili ni undume mwa Kilesite kame nitwisa oku milaela okutenda eso mufanena oku tenda. 9 Mulibaka no lilato kame ni singa okukumbela kwa wene mene Paulusi omunume mukulu mi bano nili elipantiti kame mulibaka lya Kilesite Jesu, 10 Kame ni kumbela kwa wene mulibaka lya mwanange Onesimasi woyo inakutenda sitaye abo menili mu tolongo. 11 Ku matatekelo kasikwikalanga ni tuso kwa wene, kono bano niwautokwa luli kwa wene ni kwa mene.
12 Kame nimuusa kwa wene, okumutuma yo mucima wange wonje. 13 Simba nji kame ninakusinga okwikala naye kuno, mulibaka nji ani sebeleze mu sibaka sowe mu nako no kunungiwa kwange mulibaka no liywi no kuwaba. 14 Kono kame nina kusinga okwatenda esinjili me kawasilimuka oweli. Nji ouwa sotende olese kuutenda mu kukandimekwa kono outende mu kusinga kowe. 15 Mwendi eli elibaka ana kutundela Onesimasi kwa wene mu nako icana nji cwale wikale naye okuta oku no kwaabwa, 16 cwale kasa kanyi mubika kono okubitelele omubika, omwabetu osingiwa, onene kwa mene, kono cwale ngasibine kwa wene, bamweya mu lutu mane ni mwa Mbumu. 17 Cwale nji kamo nishimba nji kame nili omukowe mu musebezi, niyonyene omutambule omoso tambwele mene.
18 Nji kame anaku kufoseze onene simba oku kukolotela esinu sonje, osibalele sitende omubonda wange. 19 Mene Paulusi kame nin̄ola eyi ni lyoko lyange, mi mbani siteneke. Kulese okwambiwa esinjili ku sikoloti sange mane ni sowe. 20 Ee mwabange, kame nisinga nji onitendeleko esi mwa Mbumu. Okatuluse omucima wange mwa Kilesite. 21 Mu kusepa okuyupela kowe kame nikun̄olela muku limuka nji mbutende okubitelela eyi ninaamba.
22 Ba nako imweya onilukisete omuzuzu, kakuli kame nisepa mu titapelo tenu mba nimiusetwe.
Omulaano no Mamaneneno
23 Epafalasi omwabange lipantiti mwa Kilesite Jesu, kame amikeeta.
24 Mane ni Maleka, Alisitakasi, Demasi ni Luka akwange ni belekanga noo. 25 Esishemo sa Mbumu Jesu Kilesite siikale mu myoyo yenu.