Xi³ ti¹tjon² xon⁴xi³ pa²stro⁴Pablo qui³squi³-le⁴cho⁴ta⁴ tesalonicenses
1
Pablo si¹ti²ˀnta³
Jin⁴-jin⁴ Pablo cao⁴ Silvano cao⁴ Timoteo ti³chji³-lai²⁴jin⁴ nca³tsˀio³ xi³ na⁴xi⁴na³nta¹-le⁴ Cristo xi³ cho⁴ta⁴ tesalonicenses ˀmi²-no³, xi³ ti³yo³cao⁴³ Ni³na¹ Nˀai³-na¹ cao⁴ Nai³-na¹ Jesucristo: Ca²ta³tsjoa¹-no³ cjoa⁴nta³, ca²ta³si¹qui³njen³nchˀan¹jin³ ni⁴ma⁴-no³ Ni³na¹ cao⁴ Nai³-na¹ Jesucristo.
Jo³-sˀin² nca³ nta³ ma³cjain¹-le⁴ cho⁴ta⁴ tesalonicenses
Cˀoa⁴-sˀin² vˀai²-lai⁴jin⁴ cjoa⁴nta³ nca³ntsjai² Ni³na¹ xi³ tˀa³tsaon⁴³ nca³tsˀio³. Ni²cja³ˀai³tsjen³-lai²⁴jin⁴ nca³ jon² cˀia⁴ nca³ vˀe²tsˀoai³⁴-jin⁴. A³li² cˀia³ ni²cha³jin³-jin⁴ nca³ ni²cja³ˀai³tsjen³-lai²⁴jin⁴ nqui³xcon⁴ Ni³na¹ Nˀai³-na¹, jo³ nˀiaon²³ nca³ ma³cjain¹-no³, jo³-sˀin² ni²xao¹³ nca³ tsjoa³chao³, jo³-sˀin² tjin¹-no³ cjoa⁴tse³jta³ nca³ cho³ya²-lao⁴³ Nai³-na¹ Jesucristo. Ntsˀe³², xi³ tjao²que³-no³ Ni³na¹, ˀya³-ni¹⁴jin⁴ nca³ je² xi³ tsa³cja³ˀa¹jin³-no³. Je² en¹nta³ xi³ tˀa³tsˀe⁴ Cristo xi³ qui³no²cjoa⁴ya³jin³-lai²⁴jin⁴, a³li² to⁴ˀen¹-jin² xi³ ji³cho²-no³, cˀoa⁴-ti⁴ tjin¹-le⁴ nca³nˀion¹ cao⁴ Espíritu Santo, cˀoa⁴ cao⁴ cjoa⁴nˀion¹jin³ qui³no²cjoa⁴ya³-no³. Je³ˀyao³ jo³-sˀin² tsa³nquin¹coai⁴-jin⁴ yao³-na⁴jin⁴ ya⁴jin³-no³ nca³ jon², nca³ tjao²cha³-lai²⁴jin⁴. Cˀoa⁴ jon² qui³chjen³nqui²-na³jin⁴ nca³ jin⁴-jin⁴ cao⁴ je² Nai³-na¹. Qui³chjoao¹³ en¹-le⁴ Ni³na¹ cao⁴ cjoa⁴tsjoa³ xi³ tsˀe⁴ Espíritu Santo, nta³ tsa² tse³ cjoa⁴ñˀain³ qui³cha³ˀao²³. Cˀoa⁴-sˀin² tsa³cja³ntiao⁴² xi³ tˀa³tsˀe⁴ nca³tsˀi³ xi³ coan³cjain¹-le⁴ ya⁴ Macedonia cao⁴ ya⁴ Acaya. Jon² xi³ cˀoa⁴-sˀin² qui³ni²cˀa³vi¹son² en¹-le⁴ Nai³-na¹, a³li² tsa² to⁴ya⁴ Macedonia cao⁴ ya⁴ Acaya, to⁴nca³ cˀoa⁴-ti⁴ nca³qui³jnta² ˀnte³ tsˀa³vi¹son² jo³-sˀin² ma³cjain¹-no³ tˀa³tsˀe⁴ Ni³na¹. Coi³ cjoa⁴ li²coi³ ma³chjen¹-na³jin⁴ nca³ coi⁴no²cjoa⁴-sai³⁴jin⁴. Ti⁴je²ni³ cho⁴ta⁴ vˀe¹ na⁴jmi¹ jo³-sˀin² qui³chjoe¹tjao²-na³jin⁴, jo³-sˀin² qui³ni²cˀo¹fa³ya³tˀa³-lao⁴³ Ni³na¹ nca³ qui³njion²³ xco¹son², jme¹-ni³ nca³ cji³ma³chjen¹-si¹ni³lao⁴³ Ni³na¹ xi³ ti¹jna³con³, xi³ ña³qui³ Ni³na¹. 10 Ti³cho³ya²-lao⁴³ ˀnti¹-le⁴ Ni³na¹ xi³ cjoa⁴ˀai¹-ni³ ncˀa³jmi³, je² xi³ Ni³na¹ qui³si³cja³ˀa¹ya³-ni³le⁴ ya⁴jin³-le⁴ cˀen³, je² Jesús xi³ fa³ˀa¹xin²-na¹ cjoa⁴ñˀain³ xi³ cjoa⁴ˀai¹.