1 Jon² xi³ nai³ ˀmi²-no³, cˀoa⁴ti⁴cao⁴³ cho⁴ˀnta³-no³ jña³-le⁴ xi³ nta³ tjin¹, xi³ ña³qui³ cjoa⁴qui²xi⁴, nca³ ˀya³-nio¹³ nca³ cˀoa⁴-ti⁴ jon² tjin¹-no³ Nai³ ya⁴ ncˀa³jmi³. 2 A³li² ni²cha³jin³-jion²³ nca³ vˀe²tsˀoa³ntsjao²³. Ti⁴yo³chon³ˀntao³ nca³ vˀe²tsˀoao³. Cˀoa⁴-ti⁴ tˀao²³ cjoa⁴nta³. 3 Cˀoa⁴-ti⁴sˀin² tˀe²tsˀoa³ntjai²-na³jin⁴, jme¹-ni³ nca³ je² Nai³-na¹ tsjoa¹ˀnte³-si¹ni³na³jin⁴ xi³ tˀa³tsˀe⁴ en¹-vi⁴, nca³ coi⁴no²cjoai⁴-jin⁴ je² cjoa⁴ˀma³ xi³ tˀa³tsˀe⁴ Cristo. To⁴jo³ ti²jna⁴ cjoa⁴ñˀain³ to⁴tˀa³tsˀe⁴. 4 Tˀe²tsˀoa³ntjai²-nao¹³ jme¹-ni³ nca³ si³qui²xi⁴ya³nta³-si¹nia³ je² en¹ jo³-sˀin² nca³ ma³chjen¹ nca³ coi³nchja²³. 5 Nta³ tain¹cao⁴³ yao³-no³ cao⁴ cjoa⁴ˀi³sen³ta³con² nqui³xcon⁴ je² xi³ tso²ˀva³tˀa³xin². A³li² ni⁴čhjin³-jin² ni²chao³. 6 Je² en¹-no³ ña³qui³ nta³ ti⁴no²cjoao⁴³ cao⁴ cjoa⁴nta³. Ca²ta³ma³-le⁴ jo³-ni³ tsa² tso³jmi² xi³ nta³ chi³ne³, jme¹-ni³ nca³ jcha⁴-si¹nio³ jo³-sˀin² ma³chjen¹ nca³ chja²cao⁴³ nca³ jnco¹jnco¹ cho⁴ta⁴.

7 Je² nca³yi³je³ cjoa⁴-na⁴ Tíquico si⁴²cji³nčhˀoe¹-no³, je² ntsˀe³² xi³ cjai¹nca³ tjao²que⁴. Cjai¹nca³ nˀion¹tˀa³con³, si¹xa¹-na³, cˀoa⁴-ti⁴ cho⁴ˀnta³xi¹ncjin¹-le⁴ Nai³-na¹. 8 Je² xi³ coi³ xa¹ ca²si³ca³sen¹³-nia³, jme¹-ni³ nca³ scoe³-nia³ cjoa⁴-no³ nca³ jon², cˀoa⁴ je² si⁴²je³con³-si¹ni³ ni⁴ma⁴-no³. 9 Cˀoa⁴-ti⁴ ca²si³ca³sen¹³ Onésimo, je² ntsˀe³² xi³ cjai¹nca³ tjao²que⁴, xi³ cjai¹nca³ nta³ fi²cao⁴-na¹, je² xi³ tsaon⁴³ nca³ jon². Je² nca³ jao² si⁴²cji³nčhˀoe¹-no³ nca³yi³je³ jme³ xi³ cji³ma³ i⁴-vi⁴. 10 Je² Aristarco, je² xi³ ti¹jna³cao⁴-na³ i⁴ nto⁴ya¹-vi⁴, si¹-ti²ˀnta³-no³, cao⁴ Marcos, ˀnti¹cja⁴ˀme³-le⁴ Bernabé. Je³ji³cho²-no³ cjoa⁴te¹xo³ma³ xi³ tˀa³tsˀe⁴. Cˀia⁴ tsa² ya⁴ cjoi⁴cho³con³-no³, tˀai²ˀnte³-lao⁴³. 11 Cˀoa⁴-ti⁴ Jesús, je² xi³ Justo ˀmi² si¹ti²ˀnta³-no³. To⁴je² cho⁴ta⁴ xi³ tsˀe⁴ cjoa⁴circuncisión xi³ tjio¹si¹xa¹cao⁴-na³ tˀa³tsˀe⁴ cjoa⁴te¹xo³ma³-le⁴ Ni³na¹, to⁴je²-sa³ xi³ si¹je³con³-na³. 12 Si¹ti²ˀnta³-no³ Epafras, je² xi³ tsaon⁴³ cho⁴ta⁴, cho⁴-ˀnta³-le⁴ Cristo. Si¹xi¹ti¹ya³ntsjai²-le⁴ yao³-le⁴ xi³ tˀa³tsaon⁴³ nca³ vˀe¹tsˀoa³ntjai²-no³, jme¹-ni³ nca³ nˀion¹ nta³ coan⁴-si¹ni³no³, nca³ ña³qui³ nta³ si⁴tjo³son²-si¹ni³lao⁴³ nca³yi³je³ xi³ me³-le⁴ Ni³na¹. 13 Ti²vˀe³-no³ na⁴jmi¹ xi³ tˀa³tsˀe⁴ Epafras, nca³ cjai¹nca³ to⁴nˀion¹ si¹xa¹ xi³ tˀa³tsaon⁴³, cao⁴ xi³ tˀa³tsˀe⁴ xi³ tjio¹ ya⁴ Laodicea, cao⁴ tˀa³tsˀe⁴ xi³ tjio¹ ya⁴ Hierápolis. 14 Si¹ti²ˀnta³-no³ je² Lucas, je² chji⁴ne⁴xqui³ xi³ cjai¹nca³ tjao²que⁴, cao⁴ Demas. 15 Ti⁴ti²ˀntao³ nca³tsˀi³ ntsˀe³² xi³ tjio¹ ya⁴ Laodicea, cao⁴ Ninfas, cao⁴ je² cho⁴ta⁴na⁴xi⁴na³nta¹-le⁴ Cristo xi³ ma³ña³ ya⁴ ntˀia³-le⁴. 16 Cˀia⁴ nca³ je³cˀoe¹xquia⁴jin³-lao⁴³ xi²nquio⁴³ xon⁴-vi⁴, cˀoa⁴-ti⁴ ca²ta³ma³xquia⁴jin³-le⁴ na⁴xi⁴na³nta¹-le⁴ Cristo xi³ tsˀe⁴ cho⁴ta⁴ laodicenses, cˀoa je² xon⁴ xi³ tsˀe⁴ Laodicea, cˀoa⁴-ti⁴ jon² tˀe²xquiao⁴³. 17 Cˀoa⁴tˀin²-lao⁴³ Arquipo nca³ ca²ta³si¹tjo³son² je² xa¹ xi³ qui³tsjoa³-le⁴ Nai³-na¹. 18 An³ xi³ Pablo ˀmi²-na³ xi³ ti²cji³-ni³no³ cao⁴ ntsa⁴. Tja³jin³-ta³con²³ nca³ cjoa⁴ñˀain³ ti²jna⁴. Cjoa⁴nta³ ca²ta³sˀe³-no³. Cˀoa⁴ ca²ta³ma³.