1 Nepasad is kebpelelaǥey ni David wey si Saul, ne neked-elukuy si David wey is anak ni Saul he si Jonatan. Utew zin mibmahal si David he iring te keugelingen din. 2 Puun dutun wazè en ipeulì ni Saul si David diyà te kandan. 3 Midsaad si Jonatan ki David he ebpeelukuyè dan taman te taman su mibmahal ni Jonatan si David iring te keugelingen din. 4 Impeehè din is tuus he tutuu is penangdù din, ne midluwas din is pendivavew he visti zin ne imbeǥey zin ki David, minsan is samput, ispada, panà, wey bakes.

5 Midmelempusen si David te mibpeveelan kandin ni Saul, umbe midhimu ni Saul sikandin he egalen te menge sundaru. Nesuatan sikandin te menge etew minsan is menge upisyal ni Saul.

6 Hein nepatey en ni David si Goliat ne nen-ulì is menge Israilihanen ne midsinuǥung si Saul te menge vahi he ebpuun te langun he inged he sakup te Israel. Melipayen dan he ebpemenganta wey edsesayew he zuen tamburin wey menge lira. 7 Iyan heini kanta zan:

“Tignengkelibu is nepatey ni Saul, piru is ki David mulà tigsepulù he libu.”

8 Nepauk si Saul te nezineg din is kanta zan. Neisip din is, “Egkaǥi sikandan te tig-10,000 is nepatey ni David piru is kedì ne tig-1,000 zà. Ne sunud ne edhimuwen dan sikandin he hadì.” 9 Umbe, puun dutun he andew ebenteyanan ni Saul si David su nesina sikandin.

10-11 Sunud dutun he andew, midselezan si Saul te mezaat he mulin-ulin he midsuǥù te Megbevayà, ne ebmutegmuteg sikandin dutun te seled te valey zin. Ne migkuwa ni David is alpa ne intukar zin para ki Saul iring te layun din en ebeeli. Neisip ni Saul zutun te egawed te vangkew is, “Ebengkawen ku si David para mekezeket sikandin kayi te elavat.” Ne zutun mibangkew zin si David te kezezuwa, ne nekelikey si David.

12 Nahandek si Saul ki David su edumahan te Nengazen si David, ne sikandin mulà ne mid-ewaan en te Nengazen. 13 Umbe, impekeziyù din si David kandin, ne midhimu zin he peremandar te 1,000 he sundaru. Umbe iyan si David egalen te menge sundaru te kebpekidtebek. 14 Midmezeeǥen si David te langun he menge vaal zin tenged te midumahan sikandin te Nengazen. 15 Hein nezineg ni Saul he midmezeeǥen si David, utew sikandin nahandek. 16 Piru utew nengesuat is langun he Israilihanen wey tig-Juda ki David, tenged te iyan sikandin ebpengulu kandan te kebpekidtebek.

17 Ne zutun migkeǥiyan ni Saul si David te, “Andam ad he ibpeesawa ku kenikew is kinekekayan he anak ku he si Merab asal ibpeehè nu kedì is kevurut nu te kebpekidtebek para te Nengazen.” Diyà te isip ni Saul he te heini he paaǥi ne kenè en iyan sikandin ebpekepatey ki David ke kenà menge Filistihanen is ebpekepatey kandin. 18 Midtavak ni David si Saul te, “Hentei e ves wey is pemilya ku he egkehimu a he mekeamung te hadì?”

19 Neuma is telaan he ibpeesawa si Merab ki David, impeesawa maan ni Saul si Merab ki Adriel he tig-Mehola.

20 Duen anak ni Saul he vahi he si Mical he mibmahal zin si David. Nezineg haazà ni Saul ne utew sikandin nesuat. 21 Neisip din is, “Ibpeesawa ku si Mical ki David, ne edhimuwen ku sikandin he epan para mepatey si David te menge Filistihanen.” Umbe migkeǥiyan ni Saul si David te, “Duen pa penahun he egkehimu ku sikew he mekaamung.”

22 Netegteǥaad dutun midsuǥù ni Saul is menge sakup din he lelaǥi zan si David he wazà duma he egketau. Ibpekeǥiyan kandan te, “Egkesuatan ka utew te hadì wey is langun he menge suluǥuen din. Umbe pemineg ke en he ebmekeemungen din.” 23 Hein migkeǥiyan dan en si David, ne migkaǥi si David te, “Kenè ku egkeveleveg is sungguzanan diyà te ki Saul para meesawa ku is anak din. Pubri a ne kenè e pa egkekilala.”

24 Hein midtudtul zan is menge ketezengan ni David diyà te ki Saul, 25 migkaǥi si Saul te, “Keǥiyi niw si David te iyan dà ebuyù en ku he sunggud te kebpengesawa zin te anak ku is menge lundis te purù te sudiyà te 100 he menge Filistihanen, he iyan kebpekevales ku kandan te menge kuntada ku.” Iyan haazà planu ni Saul para mepatey si David te menge Filistihanen.

26 Hein midtudtul haazà dutun te menge suluǥuen ni Saul diyà te ki David, utew nesuat sikandin he mehimu he mekaamung te hadì. Umbe te wazè pa mauma is telaan ni Saul ki David, 27 nenurung si David wey is menge sakup din te menge Filistihanen ne nekepatey zan te 200 he menge Filistihanen. Impekuwa zin is menge lundis te purù te sudiyà te menge Filistihanen ne mid-uwit dan diyà te hadì, su wey mehimu he mekaamung sikandin te hadì. Umbe impeesawa ni Saul si Mical ki David.

28 Hein naahà ni Saul he is Nengazen miduma ki David wey nesuatan te anak din he si Mical si David, 29 utew sikandin egkahandek ki David. Wey pedayun is kegkuntedaha zin ki David te uuyag pa sikandin.

30 Pedayun is kebpekidtebek te menge Filistihanen te menge Israilihanen. Ne kada tebek dan, ne lelayun ebpekezaag si David lavew sikandin te zuma he menge sineriǥan ni Saul. Umbe nehimu he ventuǥan si David.