1 Migkeǥiyan ni Saul si Jonatan wey is langun he menge suluǥuen din he edhimetayan si David. Piru utew mibmahal ni Jonatan si David, 2 umbe mitudtulan din si David. Migkeǥiyan din te, “Ed-ehè dà te lugar is amey ku te kedhimatey kenikew, umbe andam ka. Keeselem hendiyè ka te vevesukà ne pen-ehè ka te lugar he ed-elesan nu, ne kenè ka awà dutun. 3 Ed-uwiten ku is amey ku ziyà ne edlelaǥan ku sikandin mehitenged kenikew. Ne idtazem ku kenikew is egketuenan ku.”

4 Ne miduma ni Jonatan si Saul ziyà te vevesukà, ne midalig ni Jonatan si David etuvangan te amey zin. Ke sikandin te, “Amà, kenè nu himetayi si David he suluǥuen nu. Wazè din neveelan he salà kenikew. Utew ganì dekelà is neveelan din he keupiyaanan kenikew. 5 Imbelavag din is untung din te kedhimetayi zin duen te Filistihanen he si Goliat, ne impezaag te Nengazen is tivuuk he Israel. Neehè nu heini ne utew ka nesuat. Ne maan is edhimetayan nu is sevaha he etew he wazà peleng he etew iring ki David te wazè nu zuen ibpuun?”

6 Mibpezumazuma si Saul ki Jonatan, ne nenaad sikandin pinaaǥi te uuyag he Nengazen he kenè din en ebpehimetayan si David. 7 Hein nepiraan impetawag ni Jonatan si David ne midtudtul zin is neupekatan dan ki Saul. Miduma zin si David diyà te ki Saul, ne zutun midsilbiyan ni David si Saul iring ded duen te nehuna.

8 Neuma en maan is tebek te menge Filistihanen wey te Israilihanen, ne mibpenguluwan ni David te kebpekidtebek is menge sakup din. Mibpelehilas en si David dutun te kebpekidtebek dan, umbe nemekepelaǥuy is menge Filistihanen.

9 Sevaha zutun he andew, nekeume en maan diyà te ki Saul is mezaat he mulin-ulin he midsuǥù te Nengazen hein ebpimpinuu sikandin diyà te valey zin is egawed te vangkew. Ne zutun te edtukar si David te alpa, 10 ne mibangkew ni Saul si David su tuyù din he edhimetayan din. Piru nekelikey si David. Ne mibpelaǥuy si David te haazà kezukilemi.

11 Ne zutun midsuǥù si Saul te menge etew he para ibpevantey te valey ni David wey ibpehimatey kandin te kegkepawà. Piru migkeǥiyan si David ni Mical he esawa zin te, “Emun kenè ka ebpelaǥuy guntaan te heini he kezukilemi, keeselem edhimetayan ka.” 12 Umbe, mid-uǥupan ni Mical si David he mekepelaǥuy, diyè din ibpevayà te bintanà, ne mibpelaǥuy si David. 13 Migkuwa si Mical te ledawan ne impehizeǥè din dutun te hizeǥaan. Mibmelungan din ne midsevukan te bulvul te kambing diyà te ulu. 14 Hein nemekeuma is menge etew he midsuǥù ni Saul te kedakep ki David, migkeǥiyan sikandan ni Mical te edezaru si David. 15 Hein midtudtul zan heini ki Saul, ne impelikù sikandan ni Saul su para ibpaahà kandan si David, ne migkeǥiyan din sikandan te, “Uwita niw sikandin kayi te kediey is edhidhizeǥà te hizeǥeey zin su edhimetayan ku sikandin.” 16 Hein midseled dan dutun te valey ni David, netuenan dan he haazà is dutun te hizeǥaan ne ledawan bes he midsevukan te bulvul te kambing is ulu zin.

17 Migkeǥiyan ni Saul si Mical te, “Maan is midlimbungan a kenikew ne impepelaǥuy nu is kuntada ku?” Midtavak si Mical te, “Migkeǥiyan e zin te edhimetayan e zin emun kenè ku sikandin edtevangan he mekepelaǥuy.”

18 Umbe, nekepelaǥuy si David ne midhendiyà te ki Samuel diyà te Rama, ne midtudtulan din te langun he mid-ulaula kandin ni Saul. Ne zutun midhendiyè dan ki Samuel te Nayot ne ziyè dan med-ubpà.

19 Duen neketudtul ki Saul he ziyà si David te Nayot diyà te Rama. 20 Ne midsuǥù sikandin te menge etew he edakep ki David. Hein nekeuma zan neehè dan is menge ebpeneuven he mibpenguluwan ni Samuel he mibpen-ulinan he ebpenagnà. Ne zutun mid-ulinan te Mulin-ulin te Megbevayà haazà is menge sakup ni Saul ne nekepenagnè dan daan. 21 Hein nezineg ni Saul is neulaula, midsuǥù en maan sikandin te menge sakup din he edakep ki David, piru hein nekeuma zan, ne nekepenagnà daan sikandan. Ne mid-uman en maan medsuǥù si Saul te iketelu he timpu, ne iyan ded neulaula is nekepenagnè ded sikandan. 22 Umbe, iyan en si Saul midhendiyà te Rama. Hein nekeuma sikandin dutun te dekelà he vudsi he punduwà te wahig diyà te Secu, nenginginsà sikandin ke hendei si Samuel wey si David. Midtudtulan dan te ziyà te Nayot. 23 Dutun te ebpehendiyè en sikandin, mid-ulinan sikandin te Mulin-ulin te Megbevayà ne nekepenagnà sikandin taman te nekeuma sikandin diyà te Nayot. 24 Hein diyè en sikandin, midluwas din is kumbalè din, ne ebpenagnè en sikandin dutun te etuvangan ni Samuel. Midluluwas sikandin te tivuuk andew wey mezukilem. Iyan heini menge insà te menge etew, “Nehimu en be he menenagnà si Saul?”