1 Migkaǥi is Nengazen kayi te kedì te, 2 “Sikew is etew, keǥiya nu heini is sempità diyà te menge etew te Israel, 3 ne keǥiyi nu sikandan he iyan a, is Nengazen he MEGBEVAYÀ migkaǥi kayi: duen dekelà he kulaǥu he midlayang pehendiyà te Lebanon. Meluag is menge pakpak din wey merapung is bulvul zin he nekedseselekawà is barek. Ne midlatun heini ziyà te purù te kayu he sidru, 4 ne midtamped kayi is lumbey te kinepuruan he subpang. Mid-uwit din heini ziyà te lugar te menge nigusyanti ne impemula zin dutun.

5 “Ne hein nepasad migkuwa haazà is kulaǥu te lisu he ebpuun diyà te tanà he Israel ne impemula zin heini ziyà te egkeveluyan he tanà he kilid te wahig ne zutun utew meǥaan is kedtuvù din. 6 Midtuvù heini he mevavà he pinemula he ebpenguyabpat. Is menge subpang kayi nenguyabpat pehendutun te kulaǥu, ne mezalem is nesenevan te menge zalid din. Ne mibpurung mebpenubpang ne mibpeneringsing.

7 “Piru zuen nekeuma he selakew en he zekelà he kulaǥu. Meluag daan is menge pakpak din wey merapung is bulvul zin. Is menge zalid wey menge subpang duen te pinemula nenguyabpat pehendutun te kulaǥu su para mewehiǥi heini duen te kulaǥu te lavew pa te wahig duen te tanà he mibpemulaan kandin. 8 Midhimu heini zutun te pinemula minsan diyè en sikandin ikepemula te meupiya he tanà, he zuen duen dekelà he wahig he ebpekeveǥey kandin te meupiya he tuvù, wey ebpekepeveǥas, wey ebpekeveǥey kandin te kekempet.

9 “Ne ǥuntaan, siak, is Nengazen he MEGBEVAYÀ, ed-insà a te: Ebpekepedayun be heini te kedtuvù? Kenà! Ebezuten heini ne egkuwaan is menge veǥas din, ne ebey-anan en ke meǥangu. Melemu zà heini he ebezuten, kenè en egkinahanglan te mezesen he etew etawa mezakel he menge etew is kebazut kayi. 10 Minsan id-uman pa heini ibpemula ziyà te selakew en he lugar kenà gihapun heini edtuvù. Egkepurung heini egkeǥangu emun egkeremaǥen te meinit he keramag he ebpuun te edsilaan.”

11 Ne migkaǥi is Nengazen kayi te kedì te, 12 “Insai nu heini is mesinupaken he menge etew te Israel ke netuenan dan be is kehuluǥan duen te sempità. Keǥiyi nu sikandan te iyan heini kehuluǥan din: Midhendiyà is hadì te Babilonia te Jerusalem ne mibihag din is hadì kayi wey menge upisyal, ne miduma zin diyà te Babilonia. 13 Mibpilì sikandin te sevaha zuen te menge kevuwazan te hadì te Juda ne nekid-uyun sikandin kandin, ne impepenangdù din heini he mebpenilbi kandin. Mibihag din daan is lavew he menge etew ziyà te Juda 14 su para kenè en mekeuman mekeenew heini he ginhedian ne kenè en mekesukul kandin. Ebpekehimu zà he ebpedayun heini he ginhedian emun ebpedayun heini edtuman te neuyunan dan te Babilonia. 15 Piru midsukul is hadì te Juda te hadì te Babilonia pinaaǥi te kedsuǥù te menge etew pehendiyà te Ehipto te kedhangyù te menge kudà wey mahabet he menge sundaru. Edlampus be sikandin? Egkelikayan din be wey egkepeleǥuyan is silut kandin tenged te kedrapas din te neuyunan dan te hadì te Babilonia? 16 Kenà! Su siak, is uuyag he Nengazen he MEGBEVAYÀ, nenangdù a he heini is hadì te Juda, siguradu he ebpatey ziyà te Babilonia, su midrapas din is uyun he mibpenengduan din diyà te hadì te Babilonia he iyan ingkehimuwa kandin he hadì. 17 Kenà ebpekeuǥup kandin te kebpekidtebek is hadì te Ehipto wey is mahabet wey mekeǥeǥehem he menge sundaru zin emun edsurung en is menge tig-Babilonia te kebpenhimatey te mahabet. 18 Ne ǥeina te wazè din beliya is impenangdù din wey wazè din tumana is neuyunan, kenè sikandin ebpekelingkawas.

19 “Umbe siak, is uuyag he Nengazen he MEGBEVAYÀ, ebpenangdù a he edsilutan ku sikandin su midrapas din is kebpekid-uyun ku ne migamit din is ngazan ku te kebpenangdù din he edtumanen din heini. 20 Edhingutelen ku sikandin ne ed-uwiten ku ziyà te Babilonia, ne zutun edsilutan ku sikandin tenged te kedluib din kedì. 21 Ebpematey is ebpemelaǥuy he menge sundaru zin, ne is egkesamà ebpekepeyapat diyà te minsan hendei he lugar. Ne human niw egketuenan he iyan a, is Nengazen migkaǥi kayi.”

22-23 Mibpedayun megkaǥi is Nengazen he MEGBEVAYÀ te, “Egkuwa a te lumbey ziyà te kinepuruan te subpang te kayu he sidru ne ibpemula ku heini ziyà te puntur te metikang he vuntud diyà te Israel. Ebpenubpang heini ne ebpemeǥas, ne egkehimu he utew mekempet he sidru. Edsesalag dutun is langun he kelasi te menge tagbis ne ebpekehelung sikandan diyà te menge subpang kayi. 24 Ne egketuenan te langun he menge kayu kayi te tanà he iyan a is Nengazen edtamped te metawis he menge kayu wey ebpeketawis te mevavà he menge kayu. Iyan a zaan egangu te merapung he menge kayu wey ed-uman ebpetuvù te neǥangu he menge kayu. Iyan a, is Nengazen, midsaad kayi ne edtumanen ku heini.”