1 Migkaǥi is Nengazen kayi te kedì te, 2 “Hengkey is ibpesavut te kegkaǥi kayi he erubasa mehitenged te Israel: ‘Migkaan is amey te mepezes he paras, ne iyan nengingilu is menge anak din?’

3 “Siak, is Nengazen he MEGBEVAYÀ he uuyag, edsaad a he kenè niw en egkeuman egkeerubasa heeyan kayi te Israel. 4 Pemineǥa niw heini! Is langun he untung ne kedì–is untung te menge ǥinikanan wey is untung te menge vatà. Iyan dà ebpatey tenged te rimeǥas te salà sikan is etew he nekesalà. 5 Penenglitan duen etew he metazeng he mibaal te hustu he menge vaal. 6 Wazà sikandin med-azap te menge ed-ezapen kayi te Israel wey wazà megkaan te menge pemuhat he para kayi he menge ed-ezapen diyà te menge simbahan diyà te menge vuntud. Wazà sikandin mebpekidhilavet te esawa te zuma etawa bahi he midlengesahan. 7 Wazà sikandin mebpendaagdaag, wey in-ulì din is insandà te mid-utang diyà te kandin. Wazà sikandin mebpenakew, kekenà, impekaan din is egkengevitil wey mibeǥayan din te visti is menge wazà bisti. 8 Wazè din ipetuvù is impeutang din. Wazà sikandin mebaal te mezaat, wey wazè din midepiǥan diyà te kedhukum din. 9 Ebpurungan din edsunuza is menge sulunuzen wey menge suǥù ku. Metazeng heeyan he etew ne ebpedayun is kegkeuyag-uyag din. Iyan a, is Nengazen he MEGBEVAYÀ, is migkaǥi kayi.

10 “Piru penenglitan duen din anak he maama he mesipala wey kriminal etawa mibeelan din is minsan hengkey kayi he menge vaal 11 he wazà beeli te amey zin: Egkaan sikandin te menge pemuhat he para te menge ed-ezapen diyà te menge simbahan diyà te menge vuvungan, wey ebpekidhilavet te esawa te zuma. 12 Edèdaaǥen din is menge pubri wey is menge egkaayuayu. Tekawen sikandin, wey kenè din id-ulì is insandà te menge nekeutang diyà te kandin. Ed-azap sikandin te zuma he menge ed-ezapen, wey ebaal te utew mezaat he menge vaal. 13 Ebpeutang sikandin te ibpetuvù. Egkeuyag-uyag be sikandin? Kenà! Ebpatey heini he etew tenged kayi te langun he utew mezaat he menge vaal he mibeelan din. Iyan dà sikandin egkevasul tenged te kemetayen din.

14 “Ne penenglitan heini is lalung he etew zuen din anak he maama, ne minsan neehè din is langun he menge salà he mibeelan te amey zin, piru wazè din mulà heini iringi. 15 Wazà sikandin med-azap te menge ed-ezapen kayi te Israel wey wazà megkaan te menge pemuhat he para kayi he menge ed-ezapen diyà te menge simbahan diyà te menge vuntud. Wazà sikandin mebpekidhilavet te esawa te zuma. 16 Kenà sikandin ebpendaagdaag, wey kenà sikandin ebpesandà te menge mid-utang diyà te kandin. Kenà sikandin ebpenakew, kekenà, ebpekaan sikandin te egkengevitil wey ebeǥayan din te visti is menge wazà bisti. 17 Kenà sikandin ebaal te mezaat, wey kenà sikandin ebuyù te tuvù te ed-utang diyà te kandin. Edtumanen din is menge suǥù ku wey menge sulunuzen. Heini he etew kenà ebpatey tenged te salà te amey zin, kekenà, ebpedayun is kegkeuyag-uyag din. 18 Piru is amey zin, ebpatey mulà tenged te salè din su nenlimbung sikandin, nenakew wey mibaal te mezaat diyà te menge zuma zin he meǥinged.

19 “Piru ed-insè kew te, ‘Maan is kenà ereg he edsilutan is anak tenged te salà te amey zin?’ Emun is anak ebaal te metazeng wey hustu, wey ebpurungan din edsunuza is menge sulunuzen, ebpedayun is kegkeuyag-uyag din. 20 Iyan dà ebpatey tenged te rimeǥas te salà is nekesalà. Is anak kenà ereg he edsilutan tenged te salà te amey zin, iring din daan is amey su kenà ereg he edsilutan tenged te salà te anak din. Is keupiyaanan tenged te ketazeng egkeraǥun te metazeng, is silut tenged te kelelalung egkeraǥun te lalung.

21 “Iyan, emun ed-engkezan te lalung he etew is langun he salà he neveelan din, ne edtuman te sulunuzen wey ebaal te hustu wey metazeng, kenà sikandin ebpatey, kekenà, egkeuyag-uyag sikandin. 22 Kenà en sikandin edsukutan tenged te langun he menge salà he nehimu zin te nehuna he timpu, tenged te mibeelan din he metazeng ebpedayun is kegkeuyag-uyag din. 23 Siak, is Nengazen he MEGBEVAYÀ, kenà a egkelipey emun ebpatey is lalung he etew. Egkelipey a emun ed-engked sikandin te mezaat he ulaula wey ebpedayun he egkeuyag-uyag.

24 “Piru emun ed-engked he edtinazeng is etew he metazeng ne ebpengungubpaan duma is kebaal te salà wey kebaal te utew mezaat he menge vaal he ebeelan te lalung he menge etew, ebpedayun be is kegkeuyag-uyag din? Kenà! Su edlipatan is langun he metazeng he menge vaal zin. Ne tenged te kedluib din kedì wey te menge salà he neveelan din, ebpatey sikandin.

25 “Ne sikiyu mulà, iyan niw egkeǥiyen is, ‘Kenà metazeng is menge paaǥi te Nengazen.’ Pemineg kew is menge etew te Israel: Iyan be kenà metazeng is kediey he menge paaǥi etawa iyan is keniyu? 26 Emun is etew he metazeng ed-engked he edtinazeng su ebaal te salà, ebpatey sikandin tenged keniyan. 27 Piru is lalung he etew he ed-engked he edlalunglalung su ebaal te metazeng wey hustu, egkelibri zin is untung din. 28 Kenà sikandin ebpatey su mid-iniyuǥan din man is langun he salè din. 29 Ne egkaǥi kew pa is menge etew te Israel te, ‘Kenà metazeng is paaǥi te Nengazen.’ He menge etew te Israel, iyan be kenà metazeng is paaǥi ku etawa iyan is keniyu?

30 “Umbe egkeǥiyan ku sikiyu is menge etew te Israel, te siak, is Nengazen he MEGBEVAYÀ iyan a edhukum te kada sevaha keniyu sumalà te menge vaal niw. Guntaan sendit kew ne iniyuǥi niw is menge salè niw su wey kew kenà mezeeti. 31 Engkezi niw en is kebaal niw te salà ne beǥuwa niw en is kebpengungubpaan niw su kenè kew ereg he ebpatey is menge etew te Israel. 32 Su kenà a egkelipey emun duen ebpatey. Umbe engkezi niw en is mezaat he ulaula su wey mebpedayun is kegkeuyag-uyag niw. Iyan a, is Nengazen he MEGBEVAYÀ, is migkaǥi kayi.”