1 Migkaǥi is Nengazen kayi te kedì te, 2 “Sikew is etew, andam ke en be he edhukum te Jerusalem? Andam ke en be te kedhukum kayi te inged te menge kriminal? Petueni nu kandin is utew mezaat he menge vaal zin. 3 Keǥiyi nu heini is inged he siak, is Nengazen he MEGBEVAYÀ, migkaǥi a te: He inged te menge kriminal, ebpekeuma ziyà te kenikew is limas. Midremerikan nu is keugelingen nu pinaaǥi te kebaal te menge ed-ezapen. 4 Nekesalè ka pinaaǥi te kebpenhimatey nu wey kedremeriki nu te keugelingen nu pinaaǥi te kebaal nu te menge ed-ezapen. Neume en is ketepusan nu. Umbe ed-engitan ka wey ed-un-undahan te menge nasyun. 5 Sikew is inged, nevantug ka te kelelalung wey kesamuk, edsudien ka te menge nasyun he ziyà te uvey wey meziyù. 6 Ahaa nu is menge pengulu te Israel he ed-ubpà diyà te kenikew, migamit dan is gehem dan wey zan mekepenhimatey. 7 Keniyan te lugar nu wazè en tehuza is menge ǥinikanan. Is kenà menge Israilihanen he ed-ubpà diyà te kenikew ebpenepian, ne edèdaaǥen is menge ilu wey menge valu. 8 Mibey-anan nu is segradu he menge azen ku ne wazè nu isipa he segradu is Andew te Kedhimeley he ibpetuman ku. 9 Duen menge etew ziyan te kenikew he mid-uluǥan dan te kewusa is duma su wey ikepehimetayi. Diyà te menge simbahan diyà te menge vuvungan duen daan duma he migkaan te menge pemuhat he impemuhat diyà te zuma he menge ed-ezapen wey zutun utew mahawag is menge vaal zan. 10 Duen daan menge etew ziyan he nekidhilavet te esawa te amey zan etawa bahi he edlengesahan. 11 Duen daan mibpekidhilavet te esawa te zuma, etawa te ambey zin, etawa etevey zin. 12 Is duma mibpesuhul te kedhimatey te etew, is duma mibpeutang te utew zekelà is tuvù din, wey is duma midsepian tenged te kedlimbungi zin te zuma he etew. Nelipatan e zan en. Iyan a, is Nengazen he MEGBEVAYÀ, is migkaǥi kayi.

13 “Menge tig-Jerusalem, edsumbaǥen ku is palad ku he tuus te utew ku kegkepauk tenged te kebpenapì niw wey kebpenhimatey. 14 Duen niw vuwa kevurut wey kelig-en dutun te timpu te kedsiluti ku keniyu? Wazà, su iyan a, is Nengazen migkaǥi te, edsilutan ku sikiyu, ne ebeelan ku iyan heini. 15 Ibpeyapat ku sikiyu ziyà te nekedseselekawà he menge nasyun, ne ibpeengked ku sikiyu te kebaal te nekeremerik keniyu. 16 Egkepeel-elezan kew ziyà te zuma he menge nasyun, ne zutun egketuenan niw he iyan a Nengazen.”

17 Migkeǥiyan ad maan te Nengazen te, 18 “Sikew is etew, is menge etew te Israel nehimu he wazè dan pulus para kediey. Iring sikandan te tangis te brunsi, lata, putew, etawa timeǥà he netaǥak diyà te tunawà he midlunsayan te pelata. 19 Umbe siak, is Nengazen he MEGBEVAYÀ, migkaǥi a te, ‘Geina te wazè niw pulus su iring kew te tangis, ne edtiǥumen ku sikiyu ziyà te Jerusalem. 20-21 Iring a te etew he ed-amur-amur te pelata, te brunsi, putew, timeǥà wey lata ziyà te edriyubriyub he edtunawan duen. Uya, ed-em-emuren ku sikiyu ziyà te Jerusalem tenged te kegkepeuki ku keniyu, ne zutun edsilutan ku sikiyu he iring te mital he edtunawen. 22 Iring te lata he edtunawen diyà te tunawà, edtunawen ku zaan sikiyu ziyà te Jerusalem, ne egketuenan niw he iyan a is Nengazen, mibpeǥezam keniyu te pauk ku.’ ”

23 Migkaǥi en maan is Nengazen kayi te kedì te, 24 “Sikew is etew, keǥiyi nu is menge Israilihanen he ǥeina te kenè dan egkesuat he edlumpiyuwan ku ne kenè ku en sikandan egkehizuwan dutun te andew te kebpeǥezama ku kandan te pauk ku. 25 Is menge pengulu zan mibpelanu te mezaat. Iring sikandan te edhiniǥer he erimaung he ebpenhimatey te menge etew. Ebpenguwa zan te menge ketiǥeyunan wey mahalen he menge azen. Mahabet is egkevalu tenged te kebpenhimatey zan. 26 Is menge memumuhat dan wazà medtuman te kesuǥuan ku, ne midremerikan dan is segradu he menge azen ku. Imped-iring dan dà is segradu wey kenè segradu, is lumpiyu wey meremerik, ne wazè dan tumana is menge ibpetuman ku emun Andew te Kedhimeley. Umbe nekekaǥi a te pinaaǥi keniyan wazè e zan tehuza. 27 Is menge upisyal zan iring te zumezaas he menge asu he ebpitaspitas te egkezawi zan. Edhimatey zan para zà mekeselapì sikandan. 28 Is menge ebpeneuven diyà te kandan edtembunan dan is menge salè dan pinaaǥi te uvag kebpekelawas dan wey menge tagnè dan he vinèbeelan dan dà. Egkeǥiyen dan he iyan kun haazà migkaǥi te Nengazen he MEGBEVAYÀ minsan pa te iyan tutuu is wazà haazà keǥiya te Nengazen. 29 Umbe, nenlimbung wey nenakew is menge etew. Edèdaaǥen dan is menge pubri wey menge egkaayuayu, wey is kenà menge Israilihanen he zuma zan he meǥinged. Wazè dan heini veǥayi te hustu he kukuman.

30 “Nengahà a te etew he ebpekelavan te inged su egkehimu he zatù diyà te pid-elangan ku wey menge etew su wey ku kenà mevengkag heini is inged. Piru wazà a meketuredu. 31 Umbe, ebpeǥezaman ku kandan is utew ku kegkepauk. Edezeetan ku sikandan tenged te mibeelan dan. Iyan a, is Nengazen he MEGBEVAYÀ, is migkaǥi kayi.”