1 Migkaǥi is Nengazen kayi te kedì te, 2 “Sikew is etew, dengan duen telesuled he vahi, 3 hein betan-en dan pa, mibelegyè dan te zengeg dan diyà te Ehipto. Wazè dan en beliya is menge maama he ebpemuluspulus te lawa zan. 4 Is ngazan te kakey si Ohola, ne is hazi iyan si Oholiba. Mid-esawa ku sikandan is dezuwa ne mid-anak key. Si Ohola iyan is Samaria, ne si Oholiba iyan is Jerusalem.

5 “Minsan esawa ku en si Ohola, mibpedayun gihapun sikandin mebelegyà te zengeg din, ne edteltelukunan din en is menge kumpadi zin he menge tig-Asiria he siringan din. 6 Mezagwey sikandan wey vetan-en he menge maama. Menge kepitan sikandan wey menge peremandar he nekeyuyunipurmi te meitem is kaavuavu zin ne metau sikandan he pereuntud te kudà. 7 Mibpehilavet si Ohola te langun he menge upisyal ziyà te Asiria, ne midremerikan din is keugelingen din pinaaǥi te ked-azap te menge ed-ezapen te menge tig-Asiria. 8 Wazà sikandin med-engked he ebelegyà te zengeg din, puun pa te timpu he ziyè pa sikandin te Ehipto. Su hein betan-en pa sikandin mibpehilavet en sikandin te menge maama he nemuluspulus te lawa zin he sikan pa mekeremaǥi.

9 “Umbe, imbeǥey ku sikandin te menge kumpadi zin he menge tig-Asiria he midtelukunan din. 10 Midlevasan dan sikandin, migkuwa zan is menge anak din, ne midhimetayan dan sikandin pinaaǥi te ispada. Tenged te nehitavù he kedsiluti kandin nehimu sikandin he ed-ituken te menge vahi.

11 “Minsan pa te naahà ni Oholiba is nehitavù te suled din, mibpedayun gihapun sikandin mebelegyà te zengeg din, ne midlavew pa is kandin he kezaat te kezaat duen te suled din. 12 Edteltelukun daan sikandin te menge tig-Asiria he menge mezagwey wey menge vetan-en he menge maama. Heini sikandan menge kepitan wey menge peremandar he nekeyuyunipurmi wey memetau he pereuntud te kudà. 13 Neehè ku he iring ded sikandin duen te suled din, midekiyan din daan is keugelingen din.

14-15 “Ne mid-iseg pa is kebpelelevag ni Oholiba. Neeriǥan sikandin te menge kekerwahi he menge upisyal te menge tig-Babilonia hein neehè din diyà te elavat is menge litratu zan. Heini he menge upisyal nekeyuyunipurmi te meriǥà. Duen dan menge vakes wey menge tengkulu. 16 Umbe, impehendiyè din te Babilonia is menge menunudtulà te ked-imbita kayi he menge upisyal te kedhendiyà te kandin. 17 Umbe, midhendiyà te kandin haazà is menge upisyal ne nekidhilavet dan kandin. Pinaaǥi keniyan midekiyan dan sikandin. Piru hein neuǥet nepezaan ded sikandin kandan.

18 “Nepeukan ku si Oholiba ne mid-iniyuǥan ku en iring te mibeelan ku ziyà te suled din su utew keladu he mibpedayun sikandin mebpelelevag. 19 Piru minsan pa te iyan haazà, nasì en med-iseg is kebpelelevag din, mibpedayun sikandin te kebelegyà te zengeg din iring te mibeelan din diyà te Ehipto hein betan-en pa sikandin. 20 Mibpenelukunan din is menge kumpadi zin he iring kezekelà is sudiyà dan te sudiyà te asnu wey iring te egawas diyà te kudà is egawas duen. 21 Umbe, sikew Oholiba midlikuan nu is mezaat he menge vaal nu, he mibeelan nu zengan diyà te Ehipto hein betan-en ke pa. He zutun mibpemulpulusan te menge maama is lawa nu.

22 “Umbe siak, is Nengazen he MEGBEVAYÀ, egkeǥiyan ku sikew Oholiba te ibpesurung ku sikew te menge kumpadi nu he mid-iniyuǥan nu en hein nepezaan ke en kandan. 23 Heini sikandan iyan is menge tig-Babilonia wey menge tig-Caldea he ebpuun diyà te Pekod, Shoa, Koa, wey menge tig-Asiria. Heini he menge tig-Asiria menge mezagwey wey menge vetan-en he menge maama. Is duma kandan menge kepitan, menge peremandar, menge upisyal te ebpemen-untud te kerwahi wey zuma pa he lavew he menge upisyal. Ne nemen-untud sikandan te kudà. 24 Edsurung heini kenikew he ebpuun diyà te zizaya duma te mahabet he menge sundaru, menge kudà, wey menge kerwahi. Duen dan menge kelasag wey menge hilmit, ne edliǥuyan ke zan. Ibeǥey ku sikew kandan, ne edsilutan ke zan sumalà te egkesuatan dan he idsilut. 25 Tenged te utew ku kegkepeuki kenikew, ebpesilutan ku sikew kandan. Ne tenged te pauk dan edtinglasen dan is izung nu wey telinga nu. Ebihaǥen dan is menge anak nu, ne is egkesamà diyà te kenikew ebpenhimetayan dan te ispada etawa ebinsulan dan. 26 Edlevasan ke zan ne egkuwaan dan is menge elahas nu. 27 Ne egkeengked en is mezaat he vaal nu he iyan is kebelegyè nu te zengeg nu, he ziyè nu zà puuni te Ehipto. Kenè nu en heeyan egketenuzan, ne egkelipatan nu en is Ehipto. 28 Su iyan a, is Nengazen he MEGBEVAYÀ migkaǥi he ibeǥey ku sikew ziyà te menge etew he midumutan nu, he iyan sikan is midsuwayan nu hein nepezaan ke en kandan. 29 Tenged te pauk dan edsilutan ke zan, ne egkuwaan dan is langun he hineǥuan nu. Ed-ewaan ke zan is lelevas, ne egkezayag is mekeeled-eled he kebpekesavuk nu tenged te mahawag he vaal nu he iyan is kebelegyè nu te zengeg nu. 30 Egkehitavù heini kenikew su mibpehilavet ka te menge etew ziyà te selakew en he nasyun wey midremerikan nu is keugelingen nu pinaaǥi te ked-azap te zuma he menge ed-ezapen. 31 Mid-iringan nu is mibeelan te suled nu he vahi, umbe edsilutan ku zaan sikew iring te kedsiluti ku kandin.

32 “Uya, iyan is Nengazen he MEGBEVAYÀ, migkaǥi te, ‘Edsilutan ku sikew iring te kedsiluti ku te suled nu he vahi. Is silut ku, ne iring te inumen he ziyà te tasa he zekelà wey mezalem. Emun egkeinum nu en is nekepenù kayi te tasa he iyan is pauk ku, ed-un-undahan ka wey ed-engitan. 33 Egkelangut ka wey egkeseeng, su heini he tasa nepenù te handek wey kezeetan. Iyan heini tasa te ked-antus he neinuman te suled nu he iyan is Samaria. 34 Ed-eminen nu zaan ed-inuma is taǥù kayi, ne zutun edrupeten nu heini is tasa, ne edtempelingen nu is kumeng nu tenged te kegkeseeng nu. Iyan a, is Nengazen he MEGBEVAYÀ, is migkaǥi kayi. 35 Ne ǥeina te midlipatan a kenikew wey mid-iniyuǥan, ne siak is Nengazen he MEGBEVAYÀ, egkaǥi a he egkerasey ka tenged te mahawag he vaal he iyan is kebelegyè nu te zengeg nu.’ ”

36 Mid-uman megkaǥi is Nengazen kayi te kedì te, “Sikew is etew, hukumi nu si Ohola wey si Oholiba. Keǥiya nu kandan is utew mezaat he menge vaal zan. 37 Nekepenapew zan wey nekepatey pinaaǥi te ked-azap te zuma he menge ed-ezapen, is menge anak dan he inhalad dan kayi te kediey zutun te kegkeetew kayi, impekaan dan te menge ed-ezapen pinaaǥi te kebpemuhata zan duen. 38-39 Ne mibpendezeisey zan daan is baley ku wey is Andew te Kedhimeley he ibpetuman ku kandan. Su zutun te andew te kebpemuhata zan te menge anak dan diyà te zuma he menge ed-ezapen dan, midseled dan diyà te valey ku, ne timpu haazà te Andew te Kedhimeley. 40 Mibpaangey pa ganì sikandan te menge maama he ebpemuun diyà te meziyù he menge lugar. Ne kebpekeuma kayi te menge maama, nemeziǥù dan wey mibpeguwapa, wey mid-eelahas sikandan. 41 Ne heini, si Ohola wey si Oholiba, mibpinuu zan diyà te mekempet he katri, ne ziyà te egkesineruwan kayi zuen lemisahan he midsevukan dan te veyewà wey lana he ibpemuhat dan kun kediey. 42 Egkezineg puun te ruǥu zan is keǥurub te egkengelangut wey kedlipeylipey te menge etew, he ebpemuun diyà te sibsivayan. Midrintian wey migkurunahan sikandan kayi te menge etew. 43 Ne migkaǥi a ziyà te ǥehinawa ku te, ‘Ebey-anan en sikandan dutun te kebpenigudu zan kebpekidhilavet keniyan te menge vahi he neǥurang en te kebelegyà te zengeg dan.’ 44 Ne ebeelan dan iyan heini. Nekidhilavet sikandan ki Ohola wey ki Oholiba, he iyan kes dezuwa he meremerik he vahi he ebelegyà te zengeg dan. 45 Piru edsilutan sikandan te menge etew he metazeng te silut he ereg kandan te menge menenapew wey teremunù.

46 “Iyan a, is Nengazen he MEGBEVAYÀ, edsuǥù a te menge etew te kedsurung kandan. Ne igkeherati zan heini he menge etew, ed-eǥawen kayi is menge azen dan, 47 ebpenuleng heini kandan te vatu wey edhimatey kandan pinaaǥi te ispada. Ebpenhimetayan daan is menge anak dan wey ebinsulan is menge valey zan. 48 Pinaaǥi kayi edhimesazen ku is mahawag he vaal kayi he nasyun. Ne egkehimu zaan heini he petizaan te langun he menge vahi he kenè bes ereg he ed-iringan is mibeelan dan. 49 Sikiyu is dezuwa he telesuled, igkerasey niw utew is silut tenged te keremerik te vaal niw, wey ked-azap niw te zuma he menge ed-ezapen. Ne zutun egketuenan niw he iyan a Nengazen he MEGBEVAYÀ.”