1 Migkeǥiyan te Nengazen si Moises te, 2 “Belesi nu is menge Midianhen te mibeelan dan diyà te menge Israilihanen. Ne kegkepasad nu zutun, ebpatey ke en.”

3 Umbe, migkeǥiyan ni Moises is menge etew te, “Ipepengandam niw is duma keniyu para te kebpekidtebek te menge Midianhen su egkesuat is Nengazen he ebelesan tew is menge Midianhen. 4 Kada tribu ne 1,000 kandan is ebpekidtebek.”

5 Umbe 12,000 he menge etew he ebpuun diyà te 12 he tribu te Israel is nengandam te tebek. 6 Midsuǥù sikandan ni Moises pehendiyà te tebek, 1,000 is ebpuun diyà te kada tribu, he ebpenguluwan ni Finehas he anak ni Eleazar te memumuhat. Mid-uwit si Finehas te menge gelemiten he ebpuun diyà te Tulda he Edtelevukaayan wey menge trumpita he egemiten te kebmandar.

7 Nekidtebek sikandan te menge Midianhen, sumalà te insuǥù te Nengazen ki Moises ne mibpenhimetayan dan is langun he menge maama. 8 Ragkes dutun te mibpenhimetayan dan is lelima he hadì diyà te Midian he iyan ensi Evi, Rekem, Zur, Hur, wey Reba. Midhimetayan dan daan si Balaam he anak ni Beor pinaaǥi te ispada. 9 Ne mibihag dan is menge Midianhen he menge vahi wey menge vatà, wey mibpenguwa zan is menge uyaǥen wey menge azen. 10 Mibpeminsulan dan is langun he menge inged wey is langun he menge kampu te menge Midianhen. 11 Ne mid-uwit dan is langun he naaǥew zan, ragkes en is menge etew wey menge uyaǥen, 12 diyà te ki Moises, ki Eleazar he memumuhat, wey ziyà te langun he menge Israilihanen he ziyà te kampu zan he ziyà te suǥud te Moab he kilid te Jordan he uvey te Jerico.

13 Midsinuǥung sikandan ni Moises, ni Eleazar he memumuhat, wey te menge pengulu te Israel diyà te gawas te kampu. 14 Ne nepeukan ni Moises is menge upisyal he ebpuun te kebpekidtebek. 15 Migkaǥi si Moises diyà te kandan te, “Maan is wazè niw penhimetayi is menge vahi? 16 Iyan sikandan midsunud te sambag ni Balaam te ked-iniyat te menge Israilihanen te kedselikwey te Nengazen hein diyè kiw te Peor, he iyan hinungdan te kebpekesaǥad te limas te menge etew te Nengazen. 17 Umbe, geraa niw is langun he menge vatà he maama wey is langun he menge vahi he nehilevetan en te maama. 18 Piru semaa niw para keniyu is menge raǥa he wazè pa mehileveti. 19 Is langun keniyu he nekepatey etawa nekesamsam te minatey, kinahanglan he kayi zà te gawas te kampu seled te pitu he andew. Dutun iketelu wey ikepitu he andew, kinahanglan he mebpekelumpiyu kew wey is menge vihag niw. 20 Lumpiyuwi niw is langun he menge visti niw, ragkes en is langun he gelemiten niw he lundis, bulvul te kambing etawa kayu.”

21 Ne migkeǥiyan ni Eleazar he memumuhat is menge sundaru he ebpuun diyà te tebek te, “Iyan heini sulunuzen diyà te kesuǥuan he imbeǥey te Nengazen diyà te ki Moises: 22-23 Is minsan hengkey he azen he kenà egketutung iring te vulawan, pelata, brunsi, putew, wey timeǥà, kinahanglan he idsavuk niw ziyà te hapuy su wey mehimu he lumpiyu. Ne kegkepasad dutun, ne lùlui niw zuen te wahig he egemiten he para te kebpenlumpiyu. Is menge azen he egketutung edlùluan dà mulà duen te wahig. 24 Dutun te ikepitu he andew kinahanglan he ebpìpian niw is menge visti niw, ne kegkepasad dutun ed-isipen kew en he lumpiyu ne ebpekeseled kew en diyà te kampu.”

25 Migkaǥi is Nengazen diyà te ki Moises te, 26 “Bilanga niw ki Eleazar he memumuhat wey te langun he menge pengulu te menge pemilya te tivuuk he menge Israilihanen is langun he menge azen he netavan ragkes en is menge uyaǥen wey menge etew he nevihag. 27 Ne liwezaa niw heini ziyà te menge sundaru he mibpekidtebek wey menge Israilihanen he wazà mebpekidtebek. 28 Ne zutun te menge vahin te menge sundaru, sivey ka te para te Nengazen te sevaha te kada 500 he binihag he menge etew, etawa vaka, asnu, kerehidu, wey menge kambing. 29 Ne iveǥey nu heini ziyà te ki Eleazar he memumuhat su iyan heini vahin te Nengazen. 30 Ne zutun te menge vahin te menge Israilihanen he wazà mebpekidtebek, is kada 50 terini nu te sevaha is binihag he menge etew, menge vaka, menge asnu, menge kerehidu, wey menge kambing etawa zuma he kelasi te menge uyaǥen. Ne iveǥey nu heini ziyà te menge Levihanen he ketengdanan dan is ked-atur zuen te Tulda te Nengazen!” 31 Umbe, mibeelan ni Moises wey ni Eleazar he memumuhat haazà is insuǥù te Nengazen ki Moises.

32-35 Iyan heini nekuwa te menge sundaru puun te tebek: 675,000 he menge kerehidu, 72,000 he menge vaka, 61,000 he menge asnu, wey 32,000 he menge vahi he wazè pa mehileveti. 36-40 Iyan heini liwazà he vahin te menge sundaru he nekidtebek: 337,500 he menge kerehidu, ne is 675 kayi imbeǥey para te Nengazen, 36,000 he menge vaka, ne is 72 kayi imbeǥey para te Nengazen, 30,500 he menge asnu, ne is 61 kayi imbeǥey para te Nengazen, wey 16,000 he menge vahi, ne is 32 kayi imbeǥey para te Nengazen!

41 Imbeǥey ni Moises diyà te ki Eleazar he memumuhat is vahin te Nengazen sumalà te insuǥù kandin te Nengazen. 42-46 Iyan heini bahin te menge Israilihanen he liwazà duen te imbeǥey ni Moises diyà te menge sundaru he nekidtebek: 337,500 he menge kerehidu, 36,000 he menge vaka, 30,500 he menge asnu, wey 16,000 he menge vahi. 47 Midtarin si Moises diyà te kada 50 he etew etawa uyaǥen sumalà te insuǥù te Nengazen kandin, ne imbeǥey zin heini ziyà te menge Levihanen he ketengdanan dan is ked-atur zuen te Tulda te Nengazen!

48 Ne midhendiyà te ki Moises is menge upisyal te menge sundaru. 49 Ne migkaǥi sikandan te, “Datù, sikami is menge suluǥuen nu, mibilang dey is menge sundaru he sakup dey ne wazà minsan sevaha he netarin. 50 Umbe, idhalad dey ziyà te Nengazen is bulawan he menge azen he nekuwa zey ziyà te tebek–menge rintì, menge sising, menge eritis, wey menge velieg, su para mevelukasi is untung dey ziyà te etuvangan te Nengazen.”

51 Midawat ni Moises wey ni Eleazar is langun he vulawan he menge elahas. 52 Is keveǥat dutun te menge vulawan he mid-uwit duen te menge upisyal he inhalad ni Moises wey ni Eleazar ziyà te Nengazen menge 200 he kilu. 53 Ebpuun heini ziyà te nekuwa te kada sundaru ziyà te tebek. 54 Kegkezewata ni Moises wey ni Eleazar zuen te menge vulawan he imbeǥey te menge upisyal, mid-uwit dan heini ziyà te Tulda he Edtelevukaayan su para tentenuzi te Nengazen is menge Israilihanen.