1 Is tribu ni Reuben wey ni Gad duen dan utew mezakel he menge uyaǥen. Umbe hein neehè dan he meupiya he lugar para te menge uyaǥen is tanà diyà te Jazer wey Gilead, 2 midhendiyè dan te ki Moises wey ki Eleazar wey zuen te menge pengulu te kezekelan, ne ke sikandin te, 3-4 “Is menge lugar he midezeetan te Nengazen pinaaǥi te menge Israilihanen he iyan is Atarot, Dibon, Jazer, Nimra, Heshbon, Eleale, Sebam, Nebo, wey Beon–meupiya he lugar para te menge uyaǥen, ne sikami is menge suluǥuen nu mahabet is menge uyaǥen dey. 5 Umbe, emun nekepenunuat key kenikew, datù, is menge suluǥuen nu, iveǥey nu en nasì kenami haazà he tanà, iyan en heini kenami he vahin ne kenè key en kenikew zumaha ziyà layun te Wahig he Jordan.”

6 Ne migkaǥi si Moises diyà te tribu ni Gad wey ni Reuben te, “Iyan be ibpesavut niw he kayi kew zà mulà minsan ebpekidtebek is duma niw he menge Israilihanen? 7 Maan is id-awè niw is kezasig te menge Israilihanen te kedhendiyà te tanà he imbeǥey kandan te Nengazen? 8 Iyan daan heini mibeelan te menge kepuun niw hein impehipanew ku sikandan puun te Kadesh Barnea su wey zan mesusi heini is tanà. 9 Hein nekeuma zan en diyà te zal-ug he Eshcol wey nesusi zan en is tanà, mid-awè dan is kezasig te menge etew te kedhendiyà te tanà he imbeǥey kandan te Nengazen. 10 Utew nepauk is Nengazen dutun he andew ne utew meheǥet is kegkaǥi zin: 11 ‘Geina te wazè dan medsunud kedì te ebpuun diyà te gehinawa zan, ne wazà minsan sevaha kandan te ebpenuiǥen te 20 pehendiyà te metikang he migawas puun te Ehipto he ebpekaahà duen te tanà he insaad ku ki Abraham, ki Isaac wey ki Jacob 12 gawas ki Caleb he anak ni Jefune he Kinishen wey ki Josue he anak ni Nun su mibpezumazuma sikandan kediey te ebpuun diyà te tivuuk he gehinawa zan.’ 13 Utew nepeuki te Nengazen is menge Israilihanen. Umbe, midtazintazin din sikandan diyà te sibsivayan seled te 40 he tuig, taman te nemematey haazà is tivuuk he lapis te kevuwazan he mibaal te mezaat diyà te etuvangan din.

14 “Ne sikiyu is kevuwazan te menge mekesesalà ne iyan kew en maan ed-ilis te menge kepuun niw, ne ed-umanan niw is kegkepeuki te Nengazen te menge Israilihanen. 15 Emun kenè kew ebpezumazuma te Nengazen ne ed-iniyuǥan din en maan kayi te sibsivayan heini is menge etew, ne iyan kew egkehimu he hinungdan te kegkezeeti zan.”

16 Piru mid-uvey pa sikandan diyà te ki Moises he ke sikandan te, “Ebaal key zà kayi te menge tudil para te menge uyaǥen dey, wey menge inged he para te menge vahi zey wey menge anak dey. 17 Piru andam key he ebpengegalen te menge zuma zey he menge Israilihanen te kebpekidtebek taman te egkeuwit dey sikandan diyà te kandan he lugar. Dutun te ebpekidtebek key, ne kayi zà mulà is menge vahi zey wey menge anak dey ne ed-ubpè dan diyà te binerengbeng he menge inged he ebeelan dey, su wey zan mekelikey te menge meǥinged kayi he lugar. 18 Kenè key ed-ulì taman te ebpekaangken te tanà he egkepengevilin dan is langun he menge Israilihanen. 19 Piru kenè key en egkesuat he ed-angken te tanà he egkepengevilin dey zuma kandan diyà layun te Jordan, su iyan en heini kenami he egkepengevilin is diyà te zapit te edsilaan te Jordan.”

20 Migkeǥiyan sikandan ni Moises te, “Emun tutuu ziyà te ǥehinawa niw kayi te etuvangan te Nengazen is kebpekiduma niw te kebpekidtebek, 21 ne edlayun is menge sundaru niw te Jordan taman te egkesegseg te Nengazen is menge kuntada zin, 22 ne emun egkepurung en egkaangken te menge Israilihanen haazà is tanà, ne egkehimu en he edlikù kew kayi su egketuman niw en is ketengdanan niw ziyà te Nengazen wey ziyà te menge zuma niw he menge Israilihanen. Ne heini he tanà egkehimu en he keniyu ziyà te etuvangan te Nengazen.

23 “Iyan, emun kenè niw heini edtumanen, ne ebpekesalè kew ziyà te Nengazen, ne siguradu he ebeyazan niw is salè niw. 24 Sigi, bangun kew te menge inged he para te menge vahi niw wey menge anak niw, wey vaal kew te menge tudil he para te menge uyaǥen niw. Piru kinahanglan he edtumanen niw is insaad niw.”

25 Ne midtavak is tribu ni Gad wey ni Reuben te, “Datù, sikami is menge suluǥuen nu, edtumanen dey is menge suǥù nu. 26 Kayi zà, te Gilead is menge esawa zey, menge anak dey, wey menge uyaǥen dey. 27 Piru sikami is ebpekehimu he ebpekidtebek edlayun key te Jordan te kebpekidtebek sumalà te mandù nu kenami zatù.”

28 Ne mibmenduan ni Moises si Eleazar he memumuhat, si Josue he anak ni Nun, wey is menge pengulu te menge tribu te Israel. 29 Ke sikandin te, “Emun tutuu ziyà te ǥehinawa niw kayi te etuvangan te Nengazen he edlayun te Jordan is menge sakup te tribu ni Gad wey ni Reuben te kebpekidtebek, ne emun egkaaǥew niw en haazà is tanà, ne iveǥey niw kandan is tanà he Gilead he kandan he tanà. 30 Iyan, emun kenè dan edlayun duma keniyu, kinahanglan he ed-angken sikandan te tanà duma keniyu ziyà te Canaan,”

31 Migkaǥi is menge tribu ni Gad wey ni Reuben te, “Sikami is menge suluǥuen nu edtumanen dey is migkaǥi te Nengazen. 32 Tutuu kayi te ǥehinawa zey diyà te etuvangan te Nengazen is kedlayun te Jordan pehendiyà te Canaan te kebpekidtebek, piru is ebpengevilinen dey, iyan heini is tanà he zapit te edsilaan te Jordan.”

33 Umbe, imbeǥey ni Moises te menge tribu ni Gad, ni Reuben, wey te ketengà he tribu ni Manase he anak ni Jose is ginhedian ni Sihon he hadì te menge Amorihanen wey is ginhedian ni Og he hadì diyà te Bashan; pudu zin imbeǥey is tivuuk he tanà he nesakup keniyan he menge ginhedian ragkes is menge inged wey menge lugar he nekeliǥuy kayi.

34 Mibangun umana te tribu ni Gad is menge inged he Dibon, Atarot, Aroer, 35 Atrot Shofan, Jazer, Jogbeha, 36 Bet Nimra, wey Bet Haran. Midliǥuy zan heini te menge verengbeng. Mibaal zaan sikandan te menge tudil he para te menge uyaǥen dan. 37 Is tribu ni Reuben mid-umanan dan benguna is menge inged he Heshbon, Eleale, wey Kiriataim 38 ragkes is menge lugar he egngezanan dan hein aney te Nebo wey Baal Meon, wey Sibma. Mid-ilisan dan is menge ngazan te menge inged he mid-uman dan benguna.

39 Is menge kevuwazan ni Makir te anak ni Manase midsurung dan is Gilead, mid-aǥew zan heini ne midsegseg dan is menge Amorihanen he ed-ubpà kayi. 40 Umbe, imbeǥey ni Moises is Gilead diyà te menge kevuwazan ni Makir, he menge kevuwazan daan ni Manase ne zutun dan en med-ubpà. 41 Si Jair he kevuwazan daan ni Manase nekaaǥew te zezeisey he menge inged diyà te Gilead ne migngezanan din heini te “Menge Inged ni Jair.” 42 Naaǥew zaan ni Noba is Kenat wey is dezeisey he menge inged diyà te peliǥuy zin ne migngezanan din heini te “Noba” he iyan ngazan din.