31
Is menge Erubasa ni Hadì Lemuel
Iyan heini menge erubasa ni Hadì Lemuel he tig-Masa, he impenurù kandin te iney zin:
Mama, neetew ka he iyan tavak te menge kebpengemuyù ku. Migkeǥiyan ku sikew he kenè nu usiki is timpu wey selapì nu para te menge vahi, su iyan sikandan hinungdan he nezeetan is menge hadì. Lemuel, kenà dait he ed-inum is menge hadì te vinu. Kenà dait he edtinguhà is menge pengulu te minsan hengkey he ebpekelangut he menge inumen. Su emun egkelangut sikandan, ne kela ke melipati zan is menge kesuǥuan, ne ed-ewaan dan te ketenged is menge pubri. Iyan ereg he ebpelelangut is etew he egkeewaan en te perateng, wey mesakit is gehinawa zan. Ereg sikandan he ed-inum te vinu su wey zan melipati is kewewezai zan ne wey zan kenà metenuzi is menge elentusen dan.
Levani nu is ebpekevenar he mekehizuhizu he etew, he kenà metau he ebpengetezengan he iyan ebpekeuǥup kandin. Emun egkukum ka ne ipeikul nu te hustu he kukuman, ne levani nu is ketenged te menge pubri.
Is Buutan he Esawa
10 Is buutan he esawa mahal pa kenà is menge rubi, iyan, utew mereǥen he ebpen-ahaan.
11 Is maama he buutan is esawa zin, utew zekelà is kedsarig din dutun te esawa zin, ne kenà sikandin egkeǥansi.
12 Is buutan he vahi ne taman en te kebpatey zin, ne kenà sikandin ed-ula-ula te minsan hengkey he ebpekezezaat te esawa zin.
13 Meǥied sikandin he ebpemaal te manggad he welin wey linu.
14 Igkepetug-iring sikandin te varku te menge nigusyanti; ne ed-uwit sikandin te keuyaǥan minsan te meziyù is ebpuunan din he menge inged.
15 Merusirem pa ne ed-enew en sikandin is ed-andam te egkekaan para te pemilya zin, wey egkeǥiyan din is menge suluǥuen din he menge vahi ke hengkey is ebeelan dan.
16 Metau sikandin he ebpilì te tanà, ne ebpemesahan din heini. Ebpepemulaan din heini te paras he ebpemesahan din te selapì he netiǥum din.
17 Meviserviser sikandin wey utew mesigudu he edterebahu.
18 Metau sikandin he ebpetiǥayun, ne mesigudu sikandin he edterebahu su taman en te ebmerusirem.
19 Iyan en sikandin ebpenhavel te ebeelan he kumbalà.
20 Igkeǥaǥew zin is menge pubri wey ebpenginahanglan.
21 Emun timpu te meǥenew, ne kenè din igkeseeng haazà su zuen mekepal he manggad para te pemilya zin.
22 Ebpengavel sikandin te para te idempas diyà te hizeǥaan. Ne ebivisti sikandin te mekempet wey mahalen.
23 Diyà te inged dan, ne telehuzen is esawa zin wey sevaha te menge edlingahaan dutun.
24 Haazà is bahi ebpenahì te mekempet he menge visti su manggad he linu, wey ebpemaal zaan sikandin te vakes ne haazà pudu zin ibpemelegyà diyà te menge tumitinda.
25 Melig-en sikandin wey edtehuzen, ne kenè din igkehandek is egkehitavù te huziyan he menge andew.
26 Emun egkaǥi sikandin ne egketuusan ta he uluwanen sikandin, ne meelima sikandin he ebpenurù.
27 Meǥied sikandin, ne edsusiyen din ebpurungi is dutun te pemilya zin.
28 Utew sikandin egkezeliǥi te menge anak din wey te esawa zin. 29 Ne egkaǥi is esawa zin diyà te kandin te, “Mahabet he vahi is meupiya is menge vaal zan, iyan, kenè dan ebpekerepeng kenikew.”
30 Is kekempet te vahi ebpekelimbung, ne edlavey zà. Is bahi he edtahud te Nengazen ne iyan dait he edeliǥen.
31 Dait sikandin he edsuhulan tenged te meupiya he menge vaal zin wey edeliǥen diyà te mezakel he menge etew.