3
Jowãw nu gahem'uun do panyyg n'aa hahỹỹh
1-2 Ti m' 15 ta baab tabahado däk bä m' Tiberijo häd näng do Roma bä tabag'ããs noo gó, tabanawäng hẽnh P'op Hagä Do ban'oo kän mä ta panyyg Jowãw hã, ta wób tamaher'oot hyb n'aa. Sakarija m' Jowãw yb. Ti noo gó, Judah häj n'aa bä Pon-Sijo Pirato häd näng do sa wahë n'aa. Garirej häj n'aa bä, Eróts häd näng do sa wahë n'aa. Eróts hỹỹj mä Pirip häd näng doo, Itureej, Tarakonit häd enäh do häj n'aa bä m' sa wahë n'aa. Risããn häd näng doo, Abirẽn häj n'aa bä sa wahë n'aa.* Roma buuj had'yyt nado Tiberijo bag'ããs. Hajõng ta wób sa häj n'aa na-ããj hẽ tabag'ããs. Pon-Sijo Pirato, Eróts, Pirip, Risããn na-ããj hẽ Tiberijo karom tii, Tiberijo kyy gó ta wób sa häj n'aa bä rabag'ããs doo. Anas, Kajapas häd enäh doo, P'op Hagä Do tób n'aa yt hã moo heb'ooh do sa wahë n'aa heh'äät do ti noo gó. Ti m', P'op Hagä Do panyyg Jowãw gado däk jawén paa bä kä m', tamaher'ood hõm mä sahõnh hẽ tamii Joradãn nabyy me habong doo. Taher'oot sa hã raberéd hõm hyb n'aa nesaa doo, ranu kemuun hõm hyb n'aa nesaa do raberéd hõm do heen n'aa, P'op Hagä Do awug hõm hyb n'aa nesaa do sa h'yyb tym gó hanäng doo.
Hahỹỹ da P'op Hagä Do ky n'aa rod Isajas häd näng do erih do paa Jowãw ky n'aa:
 
“Hahỹỹ da tabanawäng bä her'oot do kyyh:
Bë tyw n'aa bak'ood däg da Tak'ëp Hyb N'aa Jawyk Doo.
Baad ub da bë tyw n'aa daj'aah.
Bë geh'aa hõm gaderoh doo.
Bë epug hõm wajau doo, waëë na-ããj hẽ.
Bë deja hõm ta tyw n'aa gajeroh doo.
Bë benyyw däg baad ta tyw n'aa.
Tii bä da sahõnh hẽ badäk hahỹỹ hã habong do rahapäh da
nyy da P'op Hagä Do ji tabed'ëëp nesaa do mahǟnh.” Isajas 40.3‑5
 
Ti m' hajõk rakata däk Jowãw wë ranu kemuun hyb n'aa. Ti m' Jowãw ky hadoo sa hã:
—Aw'yy p'yym näng do taah hadoo bëëh! —näng mäh. —Nyy da bë ed'oo bë kejën nesaa do bë hã P'op Hagä Do banoo do mahǟnh? J'ooj madäk doo me bë ed'oo bë nu kemuun nesaa do mahǟnh. Taw'ããts hẽ pooj jé bë metäh te hub tado bä nesaa do bë eréd hõm bä. Bë metäh hanäm do hã bë moo bok do hã. Bë daab yb manä Abaraãm panaa bë hanäk do hã. Bë edoo manäh: “Ãã P'op Hagä Do gadoo Abaraãm panaa ãã bahadoo do hyb n'aa.” P'op Hagä Do karẽn bä, tahajaa hahỹ pä tawareem bä Abaraãm panaa rado padäg bä —näng mäh. Edaa däk h'yy kawanereem do P'op Hagä Do ky n'aa etyy doo. Aj'yy myym joom kóm pa tadahëë däk do tabagëëm hyb n'aa hadoo tii. Sahõnh hẽ joom tëëg neaak do tagëëw jat da, ti tabaju hõm da —näng mä Jowãw kyyh.
10 Ti m' rabeaanh ta hã:
—Nyy d' ãã bad'oo hỹỹ kä?
11 Ti m' Jowãw ky hadoo:
—Pawóp hẽ saroor näng péh, sét tanoo saroor tamah pé hã. Waa näng doo, tanoo waa tamah do waa ta waa uuh —näng mä Jowãw kyyh.
12 Ti m' sa wahë n'aa dajẽẽr n'aa gedaag n'aa an'aa mä Jowãw wë tanu gemuun hyb n'aa.
—Ma matëg —näk mäh. —Ãã ẽnh, nyy d' ãã bad'oo?
13 Ti m' Jowãw ky hadoo sa hã:
—Bë wad'ii manä ta wób —näng mäh. —Dooh ta bahǟnh bë ets'ẽẽ sa hã dajẽẽr. Jããm hẽ bë ets'ẽẽ Roma buuj ky kajäk doo —näng mäh.
14 Ti m' warahén reaanh:
—Ãã ẽnh? Nyy d' ãã bad'oo? —näk mä warahén sa kyyh.
Ti m' Jowãw ky hadoo:
—Bë eǟm manä ta wób dajẽẽr rabanoo hyb n'aa bë hã. Bë ky n'aa tapa manä daap hẽ ta wób. Bë h'yy gadeja dajẽẽr bë wahë n'aa bë hã rep'aak do hã, bë hyb n'aa hũũm manä ti bahǟnh —näng mä Jowãw sa hã.
15 Ti m' hajõk do t'ĩĩ hẽnh kat'aa do rah'yy kahas'ããp Jowãw hyb n'aa. Sa h'yyb gó m' rahyb n'aa newëë. Sa h'yyb gó m' raky hadoo: “Hahỹ né g'eeh P'op Hagä Do H'yyb Däng Doo, Kristo häd näng doo?” 16 Ti m' Jowãw ky hadoo sa hã:
—Ỹ ti hỹỹh, bë ỹ nu gemuun naëng me. Ti awät da tak'ëp hyb n'aa jawyk do bahǟnh ỹỹ. Hã ỹỹ, ỹ hyb n'aa sakog its ta hã. Ti hyb n'aa dooh ỹ haja bä ta tsyym suun kabo n'aa ỹ do bä P'ooj ub sa karom rakeboo paa m' sa kariw n'aa tsyym suun. Tii bä sa kariw n'aa tsyym rahets'yyt. Tak'ëp hyb n'aa sakog its Jowãw Jesus matym gó, ta hã hẽ Jowãw hegãã bä. Ti hyb n'aa dooh tahaj'as pé Jesus wë tamoo wäd bä ta hã hẽ tahegãã bä, tahanäng pé tii. —näng mäh. —Tii kä P'op Hagä Do Sahee tabanoo da bë hã, tabajëë suun hyb n'aa bë h'yyb tym gó, bë tah'yyb mahũũm hyb n'aa. Tëëg hõõ hadoo me baad tabanäw däk bë h'yyb tym, bë d' tametyy —näng mäh. 17 Tsyt hẽ tabetyn hõm da P'op Hagä Do karẽn do moo heb'ook doo, tsyt hẽ ta wób. P'op Hagä Do karẽn do moo b'ook doo, banäm doo hẽnh tabetyn hõm, tabanesaa hẽnh ta wób, aj'yy ta nahëë me tetyn hõm do hadoo tiriig ta bóg mahǟnh. Ta joom ag tiriig tabataa ta tób n'aa yt hã. Ta bóg taju toonh tëëg hõõ me, nadëëk doo me —näng mä Jowãw kyyh Kristo ky n'aa hã.
18 Hajõng mä Jowãw her'oot sa hã. Panyyg wób gó tabeh'ũũm. Baad tametëëk sa hã. Panyyg hanäm do taher'oot mä sa hã.
19 Ti m' Jowãw nabuuj gedoo mä Garirej häj n'aa wahë n'aa Eróts häd näng doo, ta hỹỹj ỹỹm, Erodija, tagat'ëë däk do hyb n'aa. Hajõng baad nadoo do wób Eróts moo wät do hyb n'aa na-ããj hẽ Jowãw nabuuj gedoo mä Eróts. 20 Ti m' ti bahǟnh tabegyyts wät. Tamejũũ mä Jowãw radawäts gëët ragadahew'ëës doo gó.
Jesus Jowãw nu gemuun do panyyg n'aa hahỹỹh
21 Ti m' ragadahew'ëës doo gó radawäts g'ëëd pooj jé m', hajõk do Jowãw nu gemuun bong bä m', Jesus na-ããj mä tanu gemuun wät. Tanu gemuun bä m', Jesus ky n'aa etsẽẽ bä m', wë kabasëëts wät. 22 Ti m' P'op Hagä Do Sahee ahyng mä ta wë gurii-i hadoo mäh. Ti m' hỹ pong jé naa tamaa ena kän P'op Hagä Do kyyh. Hahỹỹ da m' ta kyyh:
—Õm tah ỹỹ, tak'ëp ỹ kamahǟn up doo. Baad ỹ mah'yyb n'yym —näng mäh.
23  30 ta baab Jesus bahado däk bä m' tadu doo tamoo wät do sa mahang.
Jesus wahë makũ sa häd ketsén do hahỹỹh
Joséh t'aah red'oo mä Jesus.
Joséh yb makũ häd Eri.
24 Eri yb makũ häd Matat.
Matat yb makũ häd Rewi.
Rewi yb makũ häd Mew-Ki.
Mew-Ki yb makũ häd Janaj.
Janaj yb makũ häd Joséh.
25 Joséh yb makũ häd Matatijas.
Matatijas yb makũ häd Amos.
Amos yb makũ häd Naũm.
Naũm yb makũ häd Eseri.
Eseri yb makũ häd Nakaj.
26 Nakaj yb makũ häd Maat.
Maat yb makũ häd Matatijas.
Matatijas yb makũ häd Semej.
Semej yb makũ häd Josek.
Josek yb makũ häd Jodah.
27 Jodah yb makũ häd Jowanan.
Jowanan yb makũ häd Resa.
Resa yb makũ häd Serubab.
Serubab yb makũ häd Saratijéw.
Saratijéw yb makũ häd Neri.
28 Neri yb makũ häd Mew-Ki.
Mew-Ki yb makũ häd Adih.
Adih yb makũ häd Kosãn.
Kosãn yb makũ häd Ew-Madãn.
Ew-Madãn yb makũ häd Eer.
29 Eer yb makũ häd Josuwéh.
Josuwéh yb makũ häd Erijés.
Erijés yb makũ häd Jorĩm.
Jorĩm yb makũ häd Matat.
Matat yb makũ häd Rewi.
30 Rewi yb makũ häd Simijãw.
Simijãw yb makũ häd Judah.
Judah yb makũ häd Joséh.
Joséh yb makũ häd Jonam.
Jonam yb makũ häd Erijakĩm.
31 Erijakĩm yb makũ häd Mereja.
Mereja yb makũ häd Mena.
Mena yb makũ häd Matatah.
Matatah yb makũ häd Natãn.
Natãn yb makũ häd Dawi.
32 Dawi yb makũ häd Jesé.
Jesé yb makũ häd Obed.
Obed yb makũ häd Buwas.
Buwas yb makũ häd Saramon.
Saramon yb makũ häd Nasõm.
33 Nasõm yb makũ häd Aminadab.
Aminadab yb makũ häd Adimih.
Adimih yb makũ häd Rãm.
Rãm yb makũ häd Eserõm.
Eserõm yb makũ häd Peres.
Peres yb makũ häd Judah.
34 Judah yb makũ häd Jakóh.
Jakóh yb makũ häd Isak.
Isak yb makũ häd Abaraãm.
Abaraãm yb makũ häd Terah.
Terah yb makũ häd Nahóh.
35 Nahóh yb makũ häd Serug.
Serug yb makũ häd Rakaw.
Rakaw yb makũ häd Pereg.
Pereg yb makũ häd Eber.
Eber yb makũ häd Serah.
36 Serah yb makũ häd Kaj-Nan.
Kaj-Nan yb makũ häd Apasad.
Apasad yb makũ häd Sẽm.
Sẽm yb makũ häd Nowéh.
Nowéh yb makũ häd Ramék.
37 Ramék yb makũ häd Metusarẽm.
Metusarẽm yb makũ häd Enók.
Enók yb makũ häd Jaréd.
Jaréd yb makũ häd Marareew.
Marareew yb makũ häd Kenan.
38 Kenan yb makũ häd Enós.
Enós yb makũ häd Seet.
Seet yb makũ häd Adãw.
P'op Hagä Do t'aah hadoo Adãw makũũh, P'op Hagä Do pahuunh do hyb n'aa.

*3:1-2 Roma buuj had'yyt nado Tiberijo bag'ããs. Hajõng ta wób sa häj n'aa na-ããj hẽ tabag'ããs. Pon-Sijo Pirato, Eróts, Pirip, Risããn na-ããj hẽ Tiberijo karom tii, Tiberijo kyy gó ta wób sa häj n'aa bä rabag'ããs doo.

3:6 Isajas 40.3‑5

3:16 P'ooj ub sa karom rakeboo paa m' sa kariw n'aa tsyym suun. Tii bä sa kariw n'aa tsyym rahets'yyt. Tak'ëp hyb n'aa sakog its Jowãw Jesus matym gó, ta hã hẽ Jowãw hegãã bä. Ti hyb n'aa dooh tahaj'as pé Jesus wë tamoo wäd bä ta hã hẽ tahegãã bä, tahanäng pé tii.