1 Taking kaw kanak, so si Cristo se egtekingan ko.

2 Na, mèpiya se ininang niyo, so gayed a niyo egkeeneng-enengan, aw egtekingan niyo heman se ketanem intoladà ko kenyo. 3 Meneng ibeg ko ketegahan niyo ini. Si Cristo, yan se olo te kedita te meama, aw se meama yan se olo te esawa din, aw se Timanem Amay yan se olo i Cristo. 4 Aw megsimba kaw, aw tedongan te meama se olo din te pegtawal-tawal din aw pegkeliwat din te kagi te Timanem, yan mekeyèyaay sikandin, so kenà din egbesahan si Cristo. 5 Meneng aw wedad tedong te bayi te pegtawal-tawal din aw pegkeliwat din te kagi te Timanem, mekeyèyaay sikandin, so kenà din egbesahan se meama. Se bayi wedad tedong, yan se iling te bayi binolo se olo din, 6 so aw eked keibeg se bayi megtedong te olo doton te simbahan, yan se pengilala te eked din toloi se meama. Mèpiya beling aw domeleg sikandin megpegopit iling te bawa te meama. Meneng aw mekeyèyaay se bayi bolowen aw mebabà se logay din, yan mèpiya aw tedongan se olo din. 7 Se meama, eked kepakay aw tedongan se olo din aw megtawal-tawal, so yan se pengilala te ininang te Timanem se meama melangkaw diyà te kedita dini te keneyonan. Meneng se bayi, yan se keilangan megtedong te olo din aw megtawal-tawal, so yan se pengilala te egtolò se bayi te meama. 8 Gebii te peg-inang te Timanem ki Adam aw si Eva, kenà lekat te bayi se meama, meneng lekat te meama se bayi. 9 Kenà aw meama se ininang amon meluba se bayi, meneng bayi se ininang amon meluba se meama. 10 Yan mèpiya aw megtedong se bayi te olo din doton te simbahan, amon pengkey menge anghil metaga-taga te egpemasa se bayi te meama. 11 Meneng eked kepakay diyà te Pengolo aw eked pegpetebangay se meama aw bayi. 12 Gebii te peg-inang te Timanem te otaw, inabat din se bayi lekat te meama, penga niyan ipetebaw din heman se meama lekat te bayi, meneng se kedita niyan, tomalag lekat te Timanem.

13 Eneng-enengi niyo ini. Medaet se bayi megtawal-tawal diyà te Timanem doton te simbahan aw wedad tedong din. 14 Netegahan tadon diyà te pedowan tadon te eked kepakay aw melayat se logay te meama iling te bayi. 15 Netegahan tadon heman te mèpiya aw melayat se logay te bayi, so yan se keluba din. Imbegay te Timanem se melayat logay diyà te bayi amon ketegahan te keilangan tedongan se olo te bayi aw megtawal-tawal doton te simbahan. 16 Aw doen otaw eked pemenal te inikagi ko tepad te pegtedong te bayi te olo, seini se itaba ko kandin te yan se ipegtoladà day, aw egtekingan iyan te kedita te otaw egpemenal te Timanem pengkey kenan.

17 Na, tepad te modi pegtoladà ko kenyo, eked ko sikiyo duyuni, so medaet se eg-inangen niyo. Pegtipon niyo te pegsimba, doen egpekebelabag te pegkinawà niyo te mèpiya. 18 Tagnà ikegiyen ko kenyo, dinineg ko te egpedàtay kaw ekon te pedowan pengkey kidoen te simbahan niyo, aw nepuluk se pedowan ko aw benal iyan. 19 Doen kèpiyaan aw wedà pegsebad se pedowan niyo, so pineokit kenyan, ketegahan aw sinu se egtaking te kebenalan. 20 Medaet se eg-inangen niyo, so pengkey egtipon kaw ekon komaen amon keeneng-enengan se pegkematay te Pengolo tadon, meneng kenà kaw egpemasa kandin. 21 Aw egdateng se oras te pegkaen, gayed kaw ekon egkegallat se egpengaen. Kenà kaw ekon egtagad te doma otaw, aw kenà kaw ekon egtalad kandan. Yan se doun te medita se melasing, aw bellosen se doma, so wedad den kànen. 22 Medaet se eg-inangen niyo. Aw olò kànen se ibeg niyo, labi pa mèpiya aw komaen kaw doton te kenyo balay, amon eked keyàyà se doma otaw egpemenal wedad kànen. Eked a duyun te eg-inangen niyo sìyan, so ontò iyan medaet diyà te Timanem.

23 Seini se intoladà te Pengolo kanak, sìyan ingkeliwat ko kenyo kedengan tepad te peg-aneng-aneng te pegkematay te Pengolo. Te delem te wedà pa dekepi si Jesus, nengabat sikandin te pan, 24 aw penga te pegpesiontong din, binelà-belà din iyan aw minikagi, “Se pan seini, yan se lawa ko imetayan amon mekelowà kaw. Inangi niyo iling kani amon gayed a niyo keeneng-enengan.” 25 Penga te pegkaen dan, inabat din heman se tabò aw minikagi, “Se meinem seini, yan se pengilala te doen kaling peokit ininang te Timanem pineokit te dipanog ko. Kelikit niyo minem iling kani, inangi niyo ini te doen peg-aneng-aneng niyo kanak.”

26 Yan dalem te eked pa likò se Pengolo, kelikit te pegkaen niyo te pan aw peg-inem niyo diyà te tabò, ipetaga-taga niyo te nematay se Pengolo amon megpelowà kenyo. 27 Yan aw doen otaw komaen te pan aw minem, aw wedà kelobos se pedowan din, yan se otaw ipelumun te Timanem, so kenà sikandin egpemasa te lawa aw dipanog te Pengolo. 28 Yan keilangan ontò tadon ehaen se kenitadon pedowan te eked kidon pa kaen te pan aw inem. 29 Aw doen otaw makop komaen aw minem, aw eked din eneng-enengi te yan se pengilala te pegkematay te Pengolo, yan se otaw mekekinawà te pelumun lekat te pegkaen din aw peg-inem. 30 Yan se doun te nesekitan se medita doton kenyo, aw migkelomay, aw doen heman nematay. 31 Meneng aw onà tadon ehaen se kenitadon pedowan aw melobos te eked kidon pa kaen, yan eked kidon pelumuni. 32 Meneng aw impelumun kidon den te Pengolo, mèpiya iyan, so yan se toladà din kenitadon te keilangan tomolò kidon kandin, amon eked kidon pekeakop te pelumun din te modi aldaw diyà te otaw kenà egpemenal.

33 Yan menge kedowa ko, aw megtipon kaw komaen te pan pengilala te lawa te Pengolo, keilangan megpetegaday kaw. 34 Aw doen otaw eked peketagad te doma otaw, mèpiya aw komaen sikandin doton te kandin balay, amon eked kaw pelumuni te Timanem kidoen te kenyo pegtipon. Na, se doma insà niyo kanak, yan se tebahen ko aw domateng a kidoen kenyo.