1 Nayan menge kedowa ko, ibeg ko ontò niyo kelebetan tepad te ipegpemegay te Espiritu Santo. 2 Netegahan niyo te gebii te wedà kaw pa taking ki Cristo, neallang kaw so timolò kaw te kenà benal timanem, sìyan kenà eg-ikagi, so neibing kaw timolò kandan. 3 Megtoladà a den kenyo amon ketegahan niyo aw Espiritu Santo se egbayà-bayà te otaw. Aw doen otaw menollon ki Jesus, ketegahan niyo te kenà Espiritu Santo se egbayà-bayà kandin. Meneng aw mikagi se otaw te si Jesus se Pengolo din, yan ketegahan niyo te Espiritu Santo se egbayà-bayà kandin.

4 Pengkey medita se kemolò te ipegpemegay din diyà kenitadon, meneng olò sebad se egpemegay, aw yan se Espiritu Santo. 5 Doen heman medita kemolò te inang tadon amon megpetebangay kidon, meneng sebad olò se Pengolo toloen tadon. 6 Medita se kemolò te terbaho tadon, meneng sebad se Timanem egpemegay te keseg diyà te kedita tadon egterbaho. 7 Se teg sebad-sebad kenitadon, doen den kebiyasa imbegay te Espiritu Santo diyà kenitadon amon megtabang kidon te doma otaw egpemenal. 8 Se sebad otaw, doen imbegay te Espiritu Santo kandin kebiyasa amon megtoladà te kebenalan diyà te doma otaw. Se sebad otaw, doen imbegay te Espiritu Santo kandin kebiyasa amon meg-indan-indan te toladà amon mekelabet se doma otaw. 9 Se doma otaw, doen imbegay te Espiritu Santo kandin dakel pegsalig diyà te Timanem amon meketabang te doma otaw. Se doma, doen imbegay te Espiritu Santo kandin kebiyasa megpegolì te menge kemolò te mesakit. 10 Doen heman doma binegayan te Espiritu Santo te kebiyasa amon mekeinang te metolos inang diyà te doma otaw. Doen doma otaw mekekeliwat te kagi te Timanem. Se sebad otaw, doen imbegay kandin kebiyasa amon ketegahan din aw kenan lekat se tolos, aw lekat iyan te Timanem aw lekat te bosaw. Se sebad otaw, doen imbegay kandin amon mekeikagi te menge doma kagi eked din kelebeti. Se sebad otaw, doen imbegay kandin kebiyasa amon mekeobad te kagi eked kelebeti. 11 Se kelekatan te kedita te kebiyasa sìyan, yan se Espiritu Santo, aw lekat te ibeg din egpemegay diyà te teg sebad-sebad kenitadon egpemenal.

12 Na, se lawa te otaw, pengkey medita se kemolò diyà te lawa, meneng sebad olò se lawa, so se kedita te kinemoloan niyan netibok diyà te sebad lawa. Iling heman te menge kemolò diyà te lawa se kedita tadon egpemenal, so pengkey medita kidon, meneng migsebad kidon diyà ki Cristo. 13 So se kedita tadon, pengkey Judiyo aw kenà Judiyo, aw pengkey allang aw kenà allang, meneng binonyagan se kedita tadon pineokit te Espiritu Santo amon meinang kidon sebad lawa, aw binegayan se kedita tadon te Espiritu Santo meg-ogpà diyà te pedowan tadon.

14 Ininang se lawa te otaw amon medita se mebatog din inangen, kenà olò sebad se inangen. 15 Pengkey eked pekeawid se benis iling te belad, meneng eked kepakay aw metani se benis diyà te lawa, so kolang se lawa aw wedad benis. 16 Pengkey eked pekekità se telinga iling te mata, meneng eked kepakay aw metani se telinga diyà te lawa, so kolang se lawa aw wedad telinga. 17 Simpana tomalag mata se lawa, eked iyan pekedineg. Simpana tomalag telinga se lawa, eked iyan pekeadek. 18 Meneng se lawa tadon, yan se ininang te Timanem lekat te kandin ibeg, aw doen kekemowan te kedita te kinemoloan diyà te lawa tadon, so insawol te Timanem se kedita niyan kidoen te lawa. 19 Simpana sebad olò se kekemowan te kedita te kinemoloan, eked keinang lawa. 20 Meneng se lawa tadon, pengkey medita se kinemoloan niyan, meneng netibok diyà te sebad lawa.

21 Nayan, eked kepakay aw doen olò mata meneng wedad belad. Eked heman kepakay aw doen olò olo meneng wedad benis, 22 so doen kekemowan tadon te kedita te kinemoloan diyà te lawa, pengkey eneng-enengen tadon te wedad kekemowan. 23 Pengkey aneng-aneng tadon kenà mèpiya se sebad kinemoloan diyà te lawa, meneng yan se ontò eg-ipaten. Aw sìyan kinemoloan diyà te lawa eked kepakay kitaen, yan se ontò tigmesen. 24 Meneng se mepakay kitaen, yan se wedad kekemowan te pegtigmes. Peg-inang te Timanem te lawa tadon, insawol din iyan amon ontò tadon tigmesen se kinemoloan diyà te lawa tadon, amon wedad kolang. 25 Yan kenà egpedindilay se menge kinemoloan diyà te lawa tadon, meneng egpetebangay se kedita niyan. 26 Aw elegen se sebad, imenmanen te kedakel te lawa se kesakit. Aw iduyun se sebad, yan meluba se kedakel te lawa.

27 Se kelebadan te tegdeyanan ko seini, se kedita niyo, iling kaw te lawa i Cristo, aw se teg sebad-sebad kenyo, yan se iling te menge kinemoloan diyà te lawa din. 28 Se kedita tadon egpemenal ki Cristo, tinapid kidon te Timanem te mèpiya, so doen eg-inangen te teg sebad-sebad kenitadon. Monà te kedita, yan se sogounun i Cristo. Se ikedowa, yan se otaw egkeliwat te kagi te Timanem. Se iketelo, yan se otaw megtoladà te kebenalan. Tondog niyan se mekeinang te metolos inang, aw otaw binegayan te kebiyasa amon megpegolì te menge mesakit, aw otaw egpenabang te doma, aw otaw biyasa egpengolo, aw otaw mekeikagi te menge doma kagi eked din kelebeti. 29 Netegahan niyo te kenà kedita tadon tomalag sogounun i Cristo. Kenà kedita tadon egkeliwat te kagi te Timanem. Kenà kedita tadon egtoladà te kebenalan. Kenà kedita tadon binegayan te peg-inang te metolos inang, 30 aw kenà kedita tadon binegayan te kebiyasa amon megpegolì te menge mesakit. Kenà kedita tadon mekeikagi te doma kagi eked kelebeti, aw kenà heman kedita tadon se binegayan te kebiyasa amon mekeobad te kagi eked kelebeti. 31 Meneng keilangan ontò niyo keibegan se ontò mèpiya kebiyasa ibegay te Espiritu Santo kenyo, amon megpetebangay kaw.

Meneng ipekità ko kenyo se inang labi pa mèpiya diyà te menge doma kebiyasa sìyan.