1 Nayan menge kedowa ko, todà a meg-indan kenyo tepad ki Cristo, so yan se Mèpiya Indan intoladà ko kenyo, aw pinemenalan niyo, aw in-awop niyo te pedowan. 2 Aw dimasel se pegpemenal niyo, aw nelobos se pedowan niyo, nekelowà kaw den lekat te salà pineokit te pegpemenal niyo te kebenalan intoladà ko kenyo.

3 Se intoladà te Timanem kanak, yan se ingkeliwat ko heman diyà kenyo. Seini se kebenalan ontò melangkaw te kedita. Nematay si Cristo amon megpelowà kenitadon lekat te salà, aw yan netoman se kagi te Timanem tapay insolat gebii. 4 Inlebeng sikandin, aw penga niyan te iketelo te aldaw, inantay sikandin te Timanem lekat te nematay, aw yan netoman se kagi te Timanem tapay insolat. 5 Penga te pegkeantay din lekat te nematay, onà migpekità diyà ki Pedro, aw penga niyan migpekità heman diyà te menge doma tinoledaan din. 6 Penga niyan, migpekità heman diyà te otaw tapay egtaking kandin, aw lampas te lima gatos se otaw netipon kimità kandin. Doen den nematay kandan, meneng doen pa medita kandan wedà kematay lamig songkani. 7 Migpekità heman si Cristo diyà ki Santiago, aw penga niyan migpekità heman diyà te kedita te sogounun i Cristo. 8 Siaken se temanan modi kimità kandin, pengkey wedad palos migpeliman te pegpemenal ko.

9 Siaken se ontò medanà diyà te kedita te sogounun i Cristo. Eked a peden tewali sogounun i Cristo, so kedengan te wedà a pa pemenal ki Cristo, gayed a egpemilang te menge otaw egpemenal te Timanem. 10 Meneng pineokit te tabang te Timanem kanak, ininang a din sogounun i Cristo. Doen detengan te tabang din kanak, so labi a pa measeb diyà te kedita te doma sogounun i Cristo te peg-inang ko. Meneng kenà lekat te kanak eneg se nebatog ko, so Timanem se migtabang kanak. 11 Pengkey sinu se measeb, pengkey siak aw pengkey doma, meneng kebenalan se intoladà day, aw yan se pinemenalan niyo.

12 Nayan, so migtoladà kay te inantay te Timanem si Cristo lekat te nematay, eked kepakay aw doen kidoen kenyo mikagi te eked palos keantay se otaw nematay. 13 Simpana wedad palos keentayan lekat te nematay, wedà peden keantay si Cristo. 14 Simpana wedà keantay si Cristo lekat te nematay, yan wedad ontong te pegtoladà day, aw wedad heman ontong te pegpemenal niyo kandin. 15 Aw iling kenyan, migkebolalaw kay tepad te ininang te Timanem, so migtoladà kay te Timanem se mig-antay ki Cristo lekat te nematay. Meneng simpana wedad palos entayen te Timanem, kebolalaw se intoladà day. 16 Simpana wedad keentayan lekat te nematay, yan wedà entayi te Timanem si Cristo lekat te nematay. 17 Simpana wedà entayi si Cristo, wedad ontong te pegpemenal niyo ki Cristo, aw doen pa salà niyo. 18 Aw iling kenyan, dinetengan den te pelumun te Timanem se otaw nematay, pengkey simalig dan diyà ki Cristo kedengan. 19 Simpana wedad palos mèpiya pelimanan tadon ki Cristo penga te pegkematay tadon, labi kidon pa mekelelayò diyà te menge doma otaw, aw eked kidon keantay lekat te nematay.

20 Meneng seini se kebenalan. Inantay man si Cristo lekat te nematay, aw yan se ipetaga-taga te metoman heman entayen te Timanem lekat te nematay se kedita te otaw simalig kandin. 21 Pineokit te medaet inang te sebad otaw, doen den kemetayun domateng diyà te kedita te otaw, meneng pineokit te mèpiya inang te sebad otaw, doen den keentayan lekat te nematay. 22 Pengkey egkematay se kedita tadon menge bowad-bowad i Adam, meneng entayen se kedita tadon menge otaw migsebad ki Cristo. 23 Entayen kidon te Timanem te aldaw pinemallì din, so onà inantay si Cristo, aw penga niyan te peglikò din dini te keneyonan, entayen se kedita tadon menge sakop din. 24 Penga niyan, metoman se kedita, so domaeg si Cristo te kedita te poon din pengkey kenan. Penga niyan, ipetunung din se peglowan din, aw iolì se kelangkaw te peglowan diyà te Timanem Amay, 25 so lomowan pa si Cristo lamig te aldaw dàgen din se kedita te poon din aw tomolò dan kandin. 26-27 Aw dàgen i Cristo se kedita te poon din, se temanan te poon dàgen din, yan se kemetayun. Pengkey dàgen se kedita, meneng eked dàgi se Timanem nemegay te kedita diyà ki Cristo. 28 Aw metoman ipetolò i Cristo se kedita, penga niyan, tomolò heman si Cristo sipat kedita te timolò kandin diyà te Timanem Amay nemegay te kedita diyà kandin, amon Timanem se lomowan diyà te kedita.

29 Simpana wedad keentayan lekat te nematay, wedad besi ontong aw bonyagan se otaw egpeliman te todà din kitaen se otaw nematay, so simpana wedad palos entayen lekat te nematay, wedad pelimanan te otaw megpebonyag. 30 Simpana wedad keentayan, wedad heman ontong te pegtayod ko te kelimahan egdateng kanak te kelikit te aldaw. 31 Menge kedowa ko, Pengolo tadon si Jesu Cristo se netaga-taga te benal a neluba kenyo. Netegahan din heman te agpet a eg-imetayan te kelikit te aldaw tandà te pegtaking ko kandin. 32 Dini te Efeso, ontò mebolot se otaw, so iling a te migbolaw te menenanap te kebenesan, so kenà dan egtolò te toladà ko. Meneng wedad ontong te pegtayod ko kenyan aw simpana eked palos entayi se otaw nematay. Simpana wedad keentayan, labi pa mèpiya aw tomaking kidon te otaw eg-ikagi te mepakay aw olò kidon komaen aw minem so agpet kidon den matay.

33 Peg-ahà kaw amon eked kaw keekali, so kebàtan te otaw medaet se menge otaw tomaking kandan. 34 Peketòlid kaw. Lengai niyo den se peg-inang niyo te salà. Simolat a kani kenyo amon meyàyà kaw, so medita pa se otaw kidoen kenyo eg-inang te salà, aw wedà ketaga-taga te kebenalan tepad te inang te Timanem.

35 Doen pa besi doton kenyo eg-insà aw menonen te Timanem se peg-antay din te otaw matay, aw doen besi heman otaw eg-insà aw eden se bawa te otaw aw entayen. 36 Wedad inenengen te otaw eg-insà kenyan, so wedà dan eneng-enengi se benì ipanggas. Eked tobò se benì singed aw onà ilebeng. 37 Wedà tapay tilles se ipanggas, meneng olò benì wedà pa tilles se ipanggas, pengkey trigo aw doma kemolò te benì. 38 Timanem se egpemallì aw eden se tomobò lekat te benì ipegpanggas niyo, so pengkey eden kemoloi te benì se ipanggas niyo, gayed iyan tomobò.

39 Pengkey doen lawa te teg sebad-sebad ininang te Timanem, meneng kenà dan onawa, so sebad kemolò se lawa te otaw, aw sebad se lawa te ayam-ayam, aw sebad heman se lawa te manok, aw sebad pa heman se lawa te ikan. 40 Doen lawa te tege langit, aw doen heman lawa te tege tanà. Meneng kenà onawa se palas te lawa te tege langit aw palas te lawa te tege tanà. 41 Sebad kemolò se palas te aldaw, aw sebad heman se palas te bolan, aw sebad pa heman se palas te menge bitoen. Pengkey pa diyà te menge bitoen, kenà onawa se palas te kedita niyan. 42 Iling heman kenyan aw entayen te Timanem se otaw nematay, so se lawa tadon dini te keneyonan, yan se kemolò te lawa matay aw ilebeng. Meneng se lawa meantay, yan se kemolò te lawa eked palos kematay. 43 Pengkey medaet se bawa tadon, meneng aw entayen kidon, ontò den mèpiya se bawa tadon. Pengkey egkelomay kidon songkani, meneng eked pegkelomay se kaling lawa tadon. 44 Se lawa tadon ilebeng, yan se lawa tadon dini te keneyonan. Meneng aw entayen kidon te Timanem, doen heman kaling lawa ibegay din kenitadon doton te langit.

So netegahan niyo den te doen lawa tadon dini te keneyonan, yan ketegahan niyo heman te doen kwani heman kaling lawa tadon doton te langit. 45 Doen kagi te Timanem insolat, te peg-inang te Timanem te tagnà otaw si Adam, yan se binegayan din te pedowan. Meneng si Cristo ingedanan Temanan Adam, sikandin se egpemegay te kaling pedowan. 46 Kenà monà se kaling lawa doton te langit, meneng monà se lawa tadon dini te tanà, aw penga niyan doen lawa tadon doton te langit. 47 Se Tagnà Adam, yan se lekat te tanà, so ininang te Timanem se lawa din lekat te tanà. Meneng se Ikedowa Adam si Cristo, yan se lekat te langit. 48 Se kedita tadon dini te tanà, iling kidon te tagnà otaw ininang lekat te tanà. Se kedita tadon migsebad se pedowan tadon ki Cristo, aw domateng kidon doton te langit, meinang kidon iling ki Cristo. 49 Aw ininang te tanà se lawa tadon seini iling te lawa i Adam, doen aldaw domateng mebaloy se lawa tadon doton te langit iling te lawa i Cristo.

50 Menge kedowa ko, seini se kedegdagan te inikagi ko. Se lawa tadon seini dini te tanà, eked palos pekeakop diyà te peglowan te Timanem, so se lawa tadon egkematay, eked peketayod te wedad temanan.

51 Nayan, ikegiyen ko den kenyo se kebenalan wedà pa petega-tegahi te Timanem. Eked kematay se kedita tadon, meneng tigbayà se lawa tadon keselilinan te kaling lawa. 52 Tigbayà iyan meinang te sebad pegpulà-pulà. Meinang iyan aw dinegen se peg-edop te bodyong ipetaga-taga te dimateng den se temanan. Aw edopen se bodyong, penga niyan entayen te Timanem se nematay diyà te kaling lawa eked palos kematay. Aw sikitadon wedà pa kematay, inangen heman kaling se lawa tadon, 53 so se lawa tadon doen temanan, keilangan selilinan te lawa wedad temanan. Se lawa tadon egkematay, keilangan selilinan te lawa eked palos kematay.

54 Nayan, se lawa tadon doen temanan aw egkematay, aw keselilinan den te lawa wedad temanan aw eked heman kematay, yan metoman den se pakang insolat diyà te kagi te Timanem, te megkewedad se kemetayun so dàgen den.

58 Menge kedowa ko egkedekelan ko te pedowan, lobosi niyo se pegtaking niyo te Pengolo tadon. Ikà niyo egpedaeg te toladà kebolalaw. Pegpekeaseb kaw tolò te ibeg te Timanem kenyo, so netegahan niyo den te doen ontong te kedita te inangen tadon aw tomolò kidon te Pengolo tadon.