1 Nayan, tepad te kwarta ibegay niyo itabang te menge kedowa tadon sakop te Timanem doton te Jerusalem, taking kaw heman te impunù ko diyà te menge otaw egsimba doton te probinsya te Galasya. 2 Seini se inangen niyo. Kelikit te Linggo, itagò te teg sebad-sebad kenyo se kwarta ibegay lekat te neabat niyo te monà simana, amon tapay meketagad se ibowang niyo aw lomaoy a todà kidoen kenyo. 3 Aw domateng a kidoen kenyo, isogò ko se menge otaw egkeseligan niyo amon mengibing dan te tabang niyo doton te Jerusalem. 4 Aw keilangan domoton a heman te Jerusalem, tomaking dan kanak.

5 Aw domoton a kenyo, mokit a te probinsya te Masidonya, so ibeg ko onà a mokit doton te eked kenamay. 6 Meneng aw domateng a kidoen kenyo, menamay a meg-ogpà kidoen, lamig te meobos se pengodan. Aw metoman iyan, sikiyo se megtabang kanak amon meketagad a domeleg pengkey doton te doma ogpeanan. 7 Eked a keibeg aw olò a mapit kenyo te eked kenamay, so ibeg ko meg-ogpà a kidoen kenyo te menamay, aw mepakay diyà te Pengolo tadon.

8 Meg-ogpà a dini te Efeso taman te pista iningedanan Pentekostes, 9 so ontò measeb se otaw dini menenalan te itoladà ko, aw doen pa medita inangen ko, pengkey medita se otaw meibeg megsagda kanak.

10 Aw domateng si Timoteo kidoen kenyo, liyag kaw kandin amon eked sikandin kelemitan, so sikandin heman se insogò te Pengolo iling kanak. 11 Yan eked kepakay aw eked kaw pegsagman kandin. Meneng tebangi niyo sikandin, amon melinaw se pedowan din aw molì diyà kanak, so migpeliman a te peg-olì din dini, sipat menge doma kedowa tadon dini.

12 Se kedowa tadon si Apolos, ontò ko pinemoyò te tomaking sikandin te menge doma kedowa domoton kenyo, meneng ibeg din ekon eked pa tagmon doton kenyo. Aw doen ketagad din, yan domoton kenyo.

13 Nayan, peg-ahà kaw. Lobosi niyo se pedowan te pegsalig niyo ki Cristo. Ikà niyo egketalaw, meneng pekeaseb kaw. 14 Pengkey eden se inangen niyo, keilangan dakel se pedowan niyo.

15 Nayan menge kedowa ko, netegahan niyo te si Estepanos aw pamilya din se tagnà simalig ki Cristo doton te probinsya niyo te Gresya, aw lekat te ibeg te pedowan dan gayed dan egpenabang te menge doma sakop te Timanem. Na, pemoyoen ko den sikiyo 16 te tekingan niyo se otaw iling kenyan aw menge doma egtelaban kandan.

17 Ontò a neluba te pegdateng i Estepanos aw si Partonato aw si Akayko, so pengkey netetana a kenyo, meneng neabat te pegdateng dan. 18 Migkagsen se pedowan ko pineokit kandan, aw netegahan ko te migkagsen heman se kenyo pedowan pineokit kandan. Mèpiya aw iduyun niyo se otaw iling kandan.

19 Se kedita te otaw egpemenal dini te probinsya te Asya, ibeg dan metaga-taga kaw te eg-aneng-aneng dan kenyo. Doen heman inikagi i Akilas aw esawa din si Priscila, sipat kedita te otaw egtipon aw egsimba doton te balay dan, te eg-aneng-aneng dan kenyo, so migsebad se pedowan niyo te Pengolo tadon. 20 Onawa se kagi te kedita te kedowa tadon dini.

Pegpeliyagay kaw se kedita niyo egpemenal, so yan se pengilala te egpedekelay kidon te pedowan.

21 Siak si Pablo, somolat a kani te dakel heman se pedowan ko kenyo.

22 Pengkey sinu se wedad pedowan diyà te Pengolo tadon, ipelumun dan.

Lomikò se Pengolo tadon te eked kenamay.

23 Ibeg ko, tebangan kaw te Pengolo tadon si Jesus.

24 Gayed dakel se pedowan ko diyà te kedita niyo migpesakop diyà ki Jesu Cristo.