1 Menge kedowa day, netaga-taga kaw den te dakel se nebatog day te pegdoton day kenyo kedengan. 2 Te wedà kay pa doton kenyo, ontò medaet se ininang kenami, aw tinompuyus kay doton te Filipos. Meneng pegdateng day doton kenyo, tinebangan kay te Timanem aw yan wedad ketalaw day te pegtoladà day kenyo te Mèpiya Indan lekat te Timanem. Yan se ininang day pengkey medita se otaw migpoon kenami. 3 Kenà kebolalaw se ipegtoladà day. Kenà heman medaet se tod day. Kenà heman amon meg-akal kay kenyo. 4 Meneng egtoladà kay so netaga-taga se Timanem te mèpiya se tod day, aw sineligan kay din te Mèpiya Indan tepad ki Cristo. Egtoladà kay kenà amon meluba se menge otaw kenami, meneng ibeg day meluba se Timanem kenami, so sikandin se egketaga-taga te ontò ibeg te pedowan tadon. 5 Ontò niyo netegahan te wedà kay peg-akal kenyo pineokit te pegluba day kenyo. Wedà kay heman pegpelingo-lingo amon meglegawa kay kenyo. Netaga-taga heman se Timanem kenyan. 6 Wedad ibeg day te iduyun kay te menge doma otaw, aw wedad heman ibeg day te iduyun kay niyo. 7 So sogounun kay i Cristo, mepakay aw somogò kay kenyo. Meneng peg-ogpà day doma kenyo, wedà kay sogò kenyo, so neido kay kenyo iling te pegkeido te inay diyà te menge batà din eg-ipaten din. 8 So dakel se pedowan day kenyo, ibeg day kenà olò megtoladà kay kenyo te Mèpiya Indan lekat te Timanem, meneng neketagad kay heman imetayan aw yan se meketabang kenyo. Ontò dakel se pedowan day kenyo.

9 Menge kedowa day, wedà niyo besi kelibeli te ontò kay migpekeaseb te peg-ogpà day doton kenyo. Pegtoladà day kenyo te Mèpiya Indan lekat te Timanem, gayed kay migterbaho te aldaw aw delem amon eked kaw kelimahi te pegpenogpò niyo kenami. 10 Netegahan niyo aw netegahan heman te Timanem te wedad palos mekesila te ininang day diyà kenyo egpemenal, so timolò kay te ibeg te Timanem aw metòlid se ininang day. 11 Netegahan niyo heman te mèpiya se ininang day diyà te teg sebad-sebad kenyo, iling te eg-inangen te mèpiya amay diyà te menge batà din. 12 Migtoladà kay kenyo te metòlid. Mig-antag kay te pedowan niyo. Migpunù kay kenyo te keilangan metòlid se eg-inangen niyo mekeluba te Timanem. Sikandin se timawal kenyo amon sekopen kaw din diyà te peglowan din, aw amon mekekinawà kaw te kèpiya din.

13 Gayed kay heman egpesiontong diyà te Timanem tepad kani. Pegtoladà day kenyo te kagi te Timanem, nemenal kaw kenyan, so netegahan niyo te kenà iyan olò kagi te otaw, meneng ontò benal kagi te Timanem. Pineokit te kagi te Timanem, doen eg-inangen din diyà te kedita niyo egpemenal. 14 Menge kedowa day, neinang kaw den iling te menge sakop te Timanem egpemenal ki Jesu Cristo doton te Judiya. Pinemilang dan te menge doma dan Judiyo, aw iling kaw kandan so pinemilang kaw heman te menge doma niyo kenà Judiyo. 15 Nengimatay se menge Judiyo te menge telekeliwat te kagi te Timanem gebii. Nengimatay heman se menge Judiyo te Pengolo tadon si Jesu Cristo, aw nemilang dan heman kenami. Kenà egkeibeg se Timanem te eg-inangen dan. Iling te egpoon dan te kedita te otaw, 16 so migsagda dan te pegtoladà day te menge otaw kenà Judiyo te mekelowà dan lekat te salà. So egsagda dan te pegtoladà day, egdogangan dan se menge salà dan. Meneng agpet den dan detengan te pelumun te Timanem.

17 Menge kedowa day, pegkesayo day lekat kenyo, wedà kay kelibel kenyo. Pengkey wedà kenamay, meneng ontò kay dimela kenyo. Doen ontò ibeg day megkità kay kenyo. 18 Ibeg day lomikò kay doton kenyo. Pengkey gayed a migpetagad te peglikò ko, meneng nebelebagan a i Satanas. 19 Ibeg ko lomaoy a doton kenyo so pineokit kenyo doen egpelimanan day, aw doen keluba day. Aw komità kay te Pengolo tadon si Jesus te peglikò din, eked kay keyàyà tepad kenyo, 20 so pineokit kenyo ontò kay meluba.